K1 大作戰 Round 8 -- 鑽石山靈糧堂幼稚園

二零一四年十一月八日     星期六

 

見完協恩，一出門口就截到的士，即刻趕去下一站 - 鑽石山靈糧堂幼稚園，好彩趕到過去仲有 5 分鐘剩~

 

去到先登記，之後就有職員幫我哋貼上 Label，再帶我哋去等候室，先係等候室玩玩具，裡面有 1X 位小朋友同 2 位老師，唔知有無計緊分，我哋只係專心同彤彤係度玩，同埋控制住佢唔好四圍走~

 

大約玩咗 20 分鐘度，老師就叫所有小朋友出來，跟 Label 上的編號排隊，由老師帶去大肌肉活動區自行玩耍，有一位老師全程跟住我哋玩，點知彤彤玩玩下嘅時候竟然跌咗條片片落地下 (呢排彤彤唔鍾意著片片，成日自己伸手入去除咗條片，但佢又未戒到片，真係激 c)，果時真係勁 fish lor!~ 不過老師都好好人，即時帶我哋去洗手間，再係洗手間門口等埋我幫彤彤包返好張片片，然後再帶我哋返去面試 (但由於要包片片的關係，變相我哋比其他人的面試同觀察時間小咗)，老師叫彤彤推一間大車車比佢，彤彤有做到。再叫彤彤推住架車沿住地下嘅跑道來行，彤彤係我扶助下，都可以做到~

 

之後就去 Sir 滑梯果邊，睇下彤彤嘅大肌肉發展成點~

 

玩咗大約 5 分鐘，所有小朋友又要再排隊去音樂室見副校長同埋主任，彤彤意猶未盡，所以有小小扭計，我即時抱起佢，再同佢講去另一度玩，仲同佢唱住歌咁行，佢先唔再扭計~

 

入到音樂室，副校長同埋主任已經坐係度，另有一位老師同各小朋友唱歌，同講故事，而副校長同埋主任就係比分，同睇小朋友嘅反應，彤彤初時都好投入，當老師講到有生日蛋糕食，又話吹完 Candle 就分蛋糕比小朋友食，彤彤信以為真，到等多幾分鐘都仲未有蛋糕，就檸轉頭問我想食嘢，仲開始有少少扭計，不過好彩 Story Time 都完喇 (其實都講咗成 20 分鐘，真係有 d 長同埋悶)，之後要小朋友排隊去同副校長同埋主任 Say Bye Bye，彤彤有小小喊住咁行埋去揮手，副校長問我乜嘢事，我話佢有小小肚餓，所以有小小扭計~

 

離開課室後，有職員送上一份學校嘅質素評核報告比我哋，之後就可以離開，我哋就返入去荷里活廣場開奶比彤彤飲先~

 

 

我哋都覺得 Story Time 真係太長，唔好講小朋友，大人聽佢講 20 分鐘都覺得悶啦，小朋友邊有咁嘅耐性呀? 所以我哋估計，呢間應該唔得了~