K1 大作戰 Round 10 - 藍田靈糧堂幼稚園

二零一四年十一月十五日     星期六

 

今日又係星期六，又係面試日喇，今朝有 2 個面試要出席，之後就再返 Playgroup~

 

今朝出門口時有少少阻滯，所以旔咗 5 分鐘先到達 - 藍田靈糧堂幼稚園，好彩都比我哋入~

 

去到學校先係報到，再等叫名入等候課室，之後就係課室度玩玩具~

 

大約等咗 15 分鐘度，就有老師叫彤彤出去拎 Label，再玩多 5 分鐘度，就可以排隊去面試嘅課室，原先有 10 位小朋友的，暫時要分為 2 組，分別去唔同嘅課室面試~

 

入到去，有好多唔同嘅玩具，老師係一對一的，老師先問彤彤叫乜名，我同老師講佢仲未識的，老師都無迫佢，之後老師就教彤彤玩唔同嘅樂器，開頭彤彤都唔太肯跟老師丈嘅玩法，後來我再教下佢，佢就發現要跟我同老師嘅方法，先可以敲響個琴，咁佢就跟我哋個方法去玩喇~

 

之後又去玩下煮飯仔，老師叫彤彤煮比我食，佢都有照做，之後就夠鐘會合埋其他小朋友，一齊去音樂室見副校長同主任，同老師一齊唱遊~

 

其實個形式同上星期鑽石山靈糧堂幼稚園一樣，連個故仔都係一樣，今次彤彤學精了，知道唔係真係有蛋糕食，所以都算有坐定定聽老師講故意同埋唱歌，不過就唔太投入去跳舞，有時都想起身四圍行，但比我氹掂坐返係度~

 

最後就要排隊同副校長同主任 Say Bye Bye，同埋拎埋學校嘅小冊子就可以離開~

 

 

離開學校後，同老公傾返彤彤嘅表現，大家都覺得一 d 都唔突出，只係普普通通，所以應該機會不大~