K1 大作戰 Round 6 - 佛教金麗幼稚園

二零一四年十一月八日     星期六

 

又到星期六，又係幼稚園面試嘅日子~ 原先今日收到 7 間幼稚園嘅面試通知書的，但因為撞期，所以只能出席其中四間，連我自己最心儀嗁劍鳴幼稚園都出席唔到~ (考慮到機會太小，唯有揀去見村校，希望可以增加成功嘅機會)

 

其實前晚彤彤有少少發燒(只係返了 2 日學就病到，真係無用豬呢~)，我哋第二朝見佢退咗燒都照帶佢去睇醫生，退燒後都無再燒返，但安全起見，我哋都唔比佢返學(彤彤到中午時仲自己拎住對白波鞋行出門口，想去返學添~)，等佢休息一日，可以出席星期六嘅面試~

 

今朝一早，9:20AM 就要出席第一間幼稚園嘅面試 -- 佛教金麗幼稚園，呢間幼稚園係屋企附近；學校無 N 班，所以比較多位；雖然係學卷學校，但好多報導都話呢間幼稚園係隱世名校/學卷學校中嘅名校(簡介會時校長都係咁講)；最重要係我細個時都係讀呢間，應該會優先考慮收返彤彤(如果面試表現 OK 嘅話)，所以我寧願放棄劍鳴，都要帶彤彤來呢間出席面試~

 

我哋準時就到達，但只能一位家長陪同出席面試，所以就由我陪彤彤入去，面試先由 6 位小朋友一組 (但有一位小朋友無出席)，一齊入課室，睇一段唱遊嘅片段，再同老師一齊唱下歌，做下動作跳舞，彤彤跳得唔太投入(可能仲未瞓夠嘅關係)，但都有耐唔時跳幾下 / 指下手咁~

 

之後就再分為 2 個小朋友一組，同老師一齊傾計，好不幸地，彤彤嘅同組小朋友 (男仔) 比佢大，仲要係响迦南讀緊 N 班，已經識講好多嘢，對答都好好，仲識用英文對答添 (佢媽咪話平時同工人姐姐用開英文溝通)~

 

老師先同 2 位小朋友打招呼講早晨，2 位小朋友都有同老師揮手打招呼，之後老師問小朋友叫乜名，同幾多歲，對方一一作答，但彤彤都無出聲~

 

之後老師叫小朋友玩玩具，每人有一籃仔玩具，彤彤先玩形狀同埋顏色配對盒，我教彤彤玩，彤彤一教就知點玩，跟住老師就問我平時邊位照顧彤彤，我就話日間係公公婆婆照顧，夜晚就係我同老公照顧返。

 

之後老師再問，點解要揀呢間學校，我就話因為我係舊校友，親身經歷過，知道呢間學校好好，而且多年來，學校係區內都好出名，坊間口碑好好，再加上又近屋企，所以都好想彤彤入來讀書~

 

老師叫小朋友收拾玩具，再交換玩具來玩~ 今次呢籃玩具係一 d 小朋友的日用品來的，我係彤彤耳邊提佢幫公仔刷牙同埋用匙餵公仔食嘢，彤彤都有照做~

 

之後老師叫小朋友收拾玩具，再推返籃玩具比老師，2 位小朋友都有做到，之後老師叫另一位小朋友伸手入一個袋度拎一件物品出來，再問佢係乜嘢來，然後再叫佢伸手入另一個袋拎一件物品出來，又再問佢係乜嘢來?

 

之後就到彤彤了，彤彤係第一個袋拎出來嘅係橙，老師問佢係乜嘢來? 彤彤答係 Orange ，老師再問佢係乜嘢色，彤彤唔肯再講，之後再係另一個袋拎了一個紅蘿蔔出來，老師問彤彤係乜，彤彤無出聲，之後老師叫小朋友幫手放返 d 物品入個袋度，2 位小朋友都有到~

 

最後老師送了一份小禮物比 2 位小朋友，2 位小朋友都有講多謝，之後就可以離開，彤彤無講 Bye Bye，同埋無推返埋張櫈，但就有揮手~

 

 

面試後出來同老公會合，傾返彤彤嘅表現，覺得應該機會不大，除非學校見我係舊校友，肯優先收返彤彤~

 

其實都唔多時間做 Review，因為我哋趕時間截的士去下一站，點知仲要等咗好耐都有車，激 c 人!~