牛欄牌樂童 BB 大召集拍攝

二零一五年五月廿七日      星期三



今晚一放工就返去公公婆婆家接彤彤，再搭車過去柴灣，參與拍攝「牛欄牌樂童 BB 大召集」嘅硬照廣告~



今次參與拍攝，係無錢收嫁，純粹係想為彤彤留個紀念，等佢大個咗，知道自己都曾經做過「代言人」~



到達拍攝地點，彤彤第一次搭貨 lift，當然要影返張相啦~





到達拍攝現場門外，例牌又影返張相先~





入到去，先登記，然後填表，之外拎件自攜嘅紅色衫比職員睇，可惜我自攜果件衫，職員話偏粉紅唔合規格，所以就要換過件佢哋提供的衫~



換好衫後，就可以係等候區玩一陣先，之後就等叫名，就可以過去攝影區影相~

 



 



 



 



 





大約玩咗 10 分鐘度，就輪到彤彤去影相喇，先坐係個白色盤內，影返張有名的相先~

 



 



 





之後攝影師就叫我哋試下引彤彤笑，可惜唔太成功，根住攝影師就拎咗枝 Bubble 出嚟同彤彤玩，彤彤見到有得玩，當然係好開心咁笑啦，所以拍攝過程好順利就完成 (大約 15 分鐘度)，彤彤仲玩得唔捨得走添，要攝影師哥哥同佢玩多一陣 Bubble 先得~

 



 



 



 



 



 



 



 



 



 



 



 



 





完成拍攝後，就換返自己衫，之後彤彤話想係等候區玩多陣，所以我哋就比佢係度玩多 15 分鐘先離開~

 

























廣告出街日期係大約 7 月，真係好期待呢~

 

坑口單車公園

二零一五年五月廿五日     星期一

 

一連落咗幾日雨，今日佛誕不單止無落雨，仲要好好陽光，又焗又熱添~

 

見咁好天氣，我哋就帶咗彤彤去坑口單車公園行下，果度都好大下，地方又乾淨舒服，可惜今日真係太熱了~

 

 

 

 

 

 

 

 

行行下，原來呢度有個兒童遊樂場的，就比彤彤係度玩一陣，但彤彤話瀡滑梯好熱，驚驚，所以我哋都只係停留咗一陣就離開，行返入商場行下好過~

 

 

 

 

 

 

晚上我哋返咗公公婆婆家食飯，回家後，彤彤又急不及待要求我哋砌好個車場比佢玩~

 

 

 

 

 

 

 

Shopping @ 一田

二零一五年五月廿四日     星期日

 

原先見今日無落雨，仲有小小陽光，就諗住帶彤彤去大埔海濱公園行下，之後再去大埔一田 shopping~

 

點知架車一出大老山隧道就落雨，去到大埔仲越落越大，唯有取消大埔海濱公園之行，直接去大埔一田 shopping，但今次真係太多人，無乜心機同人迫，所以只係行咗一轉玩具部同 BB 部，買咗個車場比彤彤 (真係好低，原價 $429，減到 $249)，就打道回府了~

 

 

回家後，我哋急不及待，一齊砌好個車場，彤彤都好心急想玩，砌好後，彤彤開頭唔太識玩，後來睇咗我哋試玩幾次後，佢就知道點玩了~