第十九至廿一堂學畫畫

其實呢幾堂畫班，老師對彤彤嘅 comments 大致上都係話佢油顏色時油得唔夠密，同埋多數都係打橫/直咁油，好少會打圈咁油，除非係佢身體睇實佢，先會用打圈方法油得好少少~



而貼紙方面做得好好，知道應該貼邊度，唔應該貼邊度~



但老師話彤彤有個小小懷習慣，就係油完顏色之後，好鍾意用隻手去擦，所以會攪到有 d dirty，叫我哋多點留意下~

畫圓圈同埋曲線都掌握得幾好；交义、正方型同埋長方型都畫到，但係畫得唔夠大；另外就唔係太識畫雲同埋 U 字，所以老師叫我哋係屋企可以教下佢~

第十八堂學畫畫

二零一五年十月十八日     星期日

老師話彤彤今日好比心機去油顏色，又講到自己想畫乜嘢形狀，但可能仲係細過，油顏色時的力量仲未控制得好好，好易畫花咗隔離嘅圖案，不過彤彤都仲細，問題不大的，再大過少少，應該會好好多~

另外，彤彤亦都開始掌握到畫雲同埋畫花係點做，而且老師話都畫得幾好添~

第十七堂學畫畫

二零一五年十月十一日      星期日

今日老師幫小朋友係畫紙上，貼咗 d 透明膠紙，然後就叫小朋友係一格格內畫圖案，又係上面油顏色~

老師話彤彤今日都畫咗好多圖案，唔係只係畫線條，有圓形又有雲等等~

另外，亦都知道痴住嘅格格，唔好用埋同一隻顏色，配色嘅選擇都好好，又好比心機去油顏色~

第十六堂學畫畫 + Megabox 行街街

二零一五年十月四日     星期日

星期日，又係彤彤上畫班嘅日子~

老師話彤彤畫線條畫得好好，用棉花球印波波出嚟都做得好好，而且開始用多咗顏色~

仲有就係畫圓圈畫得好好，而且仲要係好圓下添，但畫雲可能係第一次畫，就畫得麻麻，未係好掌握得到，所以老師就較佢連住畫好多個 U 字，就即係等於畫緊舊雲出嚟~



上完畫班，雖然無落雨，但天陰陰，都係去 d 近 d 嘅地方比較好，所以我哋就去了行 Megabox~

彤彤今日仲食咗 ikea 個綠茶雪糕添，仲不斷話好味~ (可能無乜綠茶味掛，唔似抹茶館果 d 咁濃)





之後就上咗去 9/F 嘅室內遊樂場玩咗陣，點知開始落雨，所以我哋就搭返 shuttle bus 過去德福，食埋飯先再回家，好彩我哋搭車時無落雨咋~

第十五堂學畫畫

二零一五年九月廿七日     星期日


可能尋日去昂坪玩得太攰，今朝起床時有少少頭赤赤，所以今朝就由老公帶彤彤去畫班，之後再接返佢返嚟，晚上先出去同爺爺嫲嫲食飯慶祝中秋節~


據老公所講，今日老師話彤彤油顏色時好好，線條亦都畫得唔錯，但油顏色時所用嘅顏色比較少，用嚟用去都係用同一隻色，要老師提下佢先轉另一隻色；另外，油顏色時，油來油都係油同一個地方，又係要老師提下佢先轉油另一個地方，ha ha.....

第十四堂學畫畫

二零一五年九月廿日     星期日

又到星期日，又係彤彤返畫班嘅日子，今日早咗少少到達商場，咁岩 Link 又有活動舉行，所以我哋就行下睇下有乜攪作~







之後就帶彤彤去上畫班，而我哋就去食 lunch 先~

夠鐘就去接彤彤，老師話彤彤今日好叻，講到自己想要畫乜圖案，又講到用邊隻顏色去畫~

不過，老師話彤彤油顏色時，油嘅範圍太細，即係油來油去都係同一位置，要多 d 係佢側邊提佢要郁下張畫紙，佢先識油過隔離。但老師話彤彤始終都仲係細，未識轉動/郁張畫紙都 ok 嘅，叫我哋在家可以多點提下佢~

至於影相問題，老師話彤彤都係唔比老師影相，一見到部相機就避鏡頭，ha ha.....

第十三堂學畫畫

二零一五年九月十五日     星期日




今日係畫班整咗隻飛機，老師話先叫小朋友係一張大嘅畫紙上面畫畫，之後再剪出嚟做機翼~


老師話今日彤彤好肯講想畫乜，同埋想做邊隻色嚟畫，心心係用水彩筆左右點一點先畫一嚟的，老師教咗彤彤一次，佢已經掌握到點畫，自己畫咗好多個心心出嚟~


另外，晝線條都畫得好好，識得控制線條嘅長度，唔會長短不一~


不過，老師話彤彤仍然唔肯影相，一見老師拎部相機出嚟，佢就擰開另一面，叫我哋在家要多點鼓勵佢望鏡頭影相~

第十二堂學畫畫

二零一五年九月六日     星期日


數數下，原來彤彤已經學咗畫畫成 12 堂喇，估唔到佢仲 keep 住鍾意去上畫班，仲成日問我哋今日係唔係去畫班呀?


今日去畫廊接彤彤放學，老師話彤彤今堂有進步，好專心自己係度畫畫，無四圍望其他人~


同埋今日彤彤開始講到自己想畫邊種生果，老師話彤彤講想畫士多啤梨同埋蕉蕉，所以老師就幫彤彤係畫紙上點咗幾點，然後叫彤彤自己連線同埋填色~


而中間果舊卷蛋，係老師比個圓形模比彤彤畫的，而轉旋果個位，老師話彤彤明白點畫，但畫得太細範圍，未太掌握到點樣可以畫得大 d，所以就由老師出手代畫~


另外，老師話彤彤填顏色填得好好，好少會油出界，同埋都填得滿滿，而且填嘅色都好實下，不過老師話彤彤畫畫時，左手唔知放邊好，只係放係櫈上/大脾上，唔識襟住張畫紙嚟畫~


至於畫線條方面，老師話彤彤掌握得好好，畫中嘅斜線，粉藍色果 d 係老師畫的，而深藍色果 d 就係彤彤畫的，老師話彤彤識跟住方向同埋長度嚟畫，呢個年紀嚟講，已經算好好~


最後，老師話有時上堂時，想幫彤彤同埋佢嘅作品影下相，用嚟幫佢整 portfolio 但彤彤成日避開鏡頭，攪到好難影，其他同班嘅哥哥姐姐幫手引佢都唔肯望鏡頭，叫我哋在家要提下彤彤，見到鏡頭要望，ha ha.....

第十一堂學畫畫 + Megabox

二零一五年八月三十日     星期日

今日彤彤又去上畫畫班，老師話公公今日畫畫時唔太專心，成日四圍望其他人畫乜，同埋手指仔好似唔多夠力咁，唔係好肯畫畫~



之後我哋就去了 Megabox 行街，行完 Megabox 想回家時，點知落大雨，等的士嘅人又多，所以唯有等 Shuttle Bus，過返德福先，一排都排咗超過半個鐘~

過到德福就去食飯先，再搭的士回家~

第十堂學畫畫 (補堂)

二零一五年八月廿六日     星期三

由於星期日果日彤彤發燒，所以果日就無去上畫班，好彩畫室可以比彤彤補堂，安排咗今日 3:30，所以就由公公婆婆帶佢去上堂~

我放工返去公公婆婆家時，公公話彤彤一落堂，就同佢講自己好叻，無油出界~

我再拎幅畫嚟睇，又真係油得幾好 wor，無乜點油出界，不過我覺得，幅畫應該大部份都係出自老師手筆 lor，彤彤應該只係負責填下色~

第九堂學畫畫

二零一五年八月十六日 星期日

嚟到第九堂畫畫班，老師話彤彤相對上比較細，所以未係好講到想畫乜，所以畫出嚟嘅畫，構圖方面會簡單 d~

老師叫我哋在家可以多 d 問下彤彤鍾意畫乜，同較佢多 d 唔同嘅顏色/形狀/物品等等~

另外，老師話彤彤手指都夠力，油顏色時都油得幾好~

由於彤彤比較細，所以畫中隻兔仔，老師係比個圈形比彤彤畫的，而其他小朋友就唔需要用工具幫手~

第八堂學畫畫

二零一五年八月九日     星期日

嚟到第八堂畫畫班了，今日老師教小朋友畫手掌畫，老師話彤彤好留心聽佢嘅講解，聽完先自己做，而且大致上都可以做得好好~

另外，老師話彤彤油顏色時，成日都提住自己唔好油出界，而且見到佢都有好努力去控制唔好出界~

但老師話彤彤油顏色時，手仔只係識橫向咁油，唔係好識打圈咁油，叫我哋在家可以同佢練習多 d~

第七堂學畫畫 + 全民運動日游水水

二零一五年八月二日      星期日


彤彤嘅畫畫班，由今個月開始，會轉去星期日上堂，所以今早食咗早餐，我就帶彤彤去上堂喇~


因為早咗到，所以就係商場行下先，咁岩有琴行係度做展銷，又放咗好多鋼琴出嚟比人試，所以彤彤一見到，就話想試下彈~


睇嚟又幾似模似樣 wor，都算幾有姿勢呀!~

















玩咗一陣，因為夠鐘上堂，我就叫彤彤落返地，之後就帶佢入課室，之後我就係商場行下街先~


夠鐘就去接返彤彤，原來今日老師教朋友整民族帽呀，又幾得意 wor~




之後我哋就返咗公公婆婆家，食少少嘢，再換埋衫~




換乜嘢衫? 咪就係泳衣 lor~


今日係全民運動日，泳池唔駛錢入場，我哋當然要去下趁下熱鬧啦~










有得玩水，彤彤不知玩得幾開心，玩咗個半鐘，都要三吹四請先肯上水~


最估唔到係，今日免費入場，泳池反而比平常嘅星期六/日少人，可能其他人都以為免費實會多人掛~








游完水，我哋就回家瞓一陣先，之後就去公公婆婆家食飯~

第六堂學畫畫

二零一五年七月廿八日     星期二

今日係第六堂學畫畫，老師今日教小朋友畫蜜蜂，下邊呢幅就係彤彤嘅作品，似蜜蜂嗎?

第五堂學畫畫

二零一五年七月廿一日     星期二

今日係第五堂學畫畫，未夠鐘入課室前，又影下相 send 比老公睇下先~






老師今日教小朋友畫水果，下邊呢幅就係彤彤嘅作品，似哈密瓜嗎?

第四堂學畫畫

二零一五年七月十四日 星期二


今晚上第四堂畫班，又係我放工返到公公婆婆接彤彤去上堂，今日好準時，去到畫室門口，上一堂嘅小朋友岩岩落堂~



老師出嚟接彤彤入課室，我就同佢講 Bye Bye，之後就返去公公婆婆家先~

夠鐘就落去接返彤彤，彤彤見到我就好開心咁拎住幅畫作跑過嚟，同我哋講係佢畫的，仲話好靚~



老師同我講返，彤彤執筆的手勢唔正確，佢執筆的手勢會令佢隻手好快就攰，所以今堂基本上都係教彤彤點執筆，幅畫大部份都係捉住彤彤隻手畫的~

老師仲話，如果唔趁而家未開始學寫字前，快手改正返，第日真正學寫字時，就好難再改正，同埋會令彤彤覺得寫字 = 易攰，就會唔鍾意寫字，所以叫我在家都張多點提下彤彤，要用正確的手勢嚟執筆~