2012年9月29日星期六

Time Square BB 衫開倉，一田 bb 展及 Mothercare 開倉

九月尾有好多 bb 衫的 shop 都開倉，再加上又去行咗花園街，又幫阿 b 入咗好多貨呢~

購自 Time Square Kids & Babies Fair: 雙層棉䄛（size 80 - $189

購自花園街：mides 的剪牌貨版 ($60)

購自一田 bb 展，濕紙巾（$29.9); Mustela($99)

洗頭乾洗粉 - for坐月時用 ($128)

即棄乳墊 ($79.6)

購自 Mothercare 開倉： for 3-6m $20

購自 Mothercare 開倉： for 9-12m $30

購自 Mothercare 開倉： for 3-6m $30

購自 Mothercare 開倉： for 12-18m $30

購自 Mothercare 開倉： for 9-12m $25

2012年9月27日星期四

二零一二年九月廿五日星期二

今日約咗 11:00am 返去 QE 做產檢，今日唔算太多人，但幾易搵到位坐嘅~

見醫生前又係先驗小便，再磅重同埋量血壓，今日嘅血壓有少少高(140/78)，可能係頭先搭車時，有少少趕，所以先會偏高咗少少，姑娘要我坐一陣再量過 (127/68)~ 呢 2個星期又重多咗 d 呀，比 2 星期前重咗 0.6kg 呀，唔通而家先開始來料?! 唔好呀!~

雖然好快就可以見醫生了，大約 11:50pm 就到我睇~

今次又唔同咗醫生見我，佢都好似好趕咁我幫我度下個肚同埋子宮的位置，又聽下阿 b 的心跳咁，又問我拎咗我在家量的血壓表來睇，話而家個情況好好，之後就問我仲有無其他問題，如果無就 2 星期後返來~

咁我就乘機問下佢，我 c+ 果邊叫我問返，內科果邊話我的腎上線素高咗少少，其實即係高咗幾多，跟住佢就 print 咗個報告比我，叫我唔好隨便拎比人，比自己個醫生睇就算，之後就叫返我出去 book 下次的期，我出返去 book 期都幾多人，攪到差唔多 12:15pm 先離開~

2012年9月26日星期三

二零一二年九月廿三日星期日

今日約咗 10:30AM 見盧醫生，我哋遲咗 15 分先到達，之後都要等到差唔多 11:10am 先我入房見佢~

盧醫生見到我，就問下近排有無唔舒服，同埋睇下我在家量的血壓表~

我就同盧醫生講返，QE果邊幫我做咗的檢查同埋結果，我同佢講 QE check 到我血中的尿酸有少少高，心臟肌肉有少少偏厚，同埋小便內的腎上腺素比正常高了少少~

聽完我講之後，盧醫生話其實而家無乜嘢好做，佢都好認同 QE 果邊話要我生完之後先幫我再做其他的檢查，因為而家 BB 就來出世，好多檢查都唔適合呢個時候去做，因為果 D 檢查(電腦掃瞄的顯影液) 係會影響到 BB 的~

之後佢叫我要放鬆心情，令 d 血壓盡量穩定，而家我未有作動的現象出現，如果 d 血壓都高嘅話，就好大機會要開刀生 bb，因為作動時，一路陣痛一路緊張，d 血壓實會升得好高，所以叫我要盡量放鬆~

之後佢又幫我量下今日的血壓，都算正常 (130/75)，佢叫我下個月返去見佢，等佢評估下我可唔可以順產，同時佢都叫我同靳醫生傾下，睇下我的情況，可唔可以順產到，同埋要唔要催生~

大約傾咗半個鐘，我哋就出返去，大約 11:40 am 我哋就離開了~

2012年9月22日星期六

Pampers 媽媽會禮物

今晚放工回家，又收到媽媽會的禮物，今次係 Pampers 的大碼試用裝 3 片~

2012年9月21日星期五

二零一二年九月廿日星期四

今日約咗 3 點半返 QE 見內科醫生，我準時到達，但平時睇開我果個醫生今日放假，所以要攝位睇其他醫生，估計都係有排等的了~

今日又係勁多人係度等，我搵咗好耐，先比我搵咗個位，但同我平時睇開症果間房相隔比較遠，唯有一陣留心 d 聽住叫名啦，起碼叫做有個位座嘛~

之後就係度等，一等就等到 4:50pm 先到我入去睇，今次轉咗 18 號房的醫生睇我，係一位好後生的男醫生來的，我估可能係位實習醫生來的，但佢好好禮貌，又好詳細咁解釋返我之前的報告比我聽，好過我平時睇開果位女醫生好多啦~

首先佢話我之前係內科呢邊留的 24 小時小便樣本，大致上正常，只係腎上線素有輕微高咗，不過只係岩岩高過標準小小，應該問題唔大，如果係高得太犀利，就驚會係有腎上線腫瘤，但睇我果個度數，應該就唔似係，可能係留小便果日比較緊張先會咁，但穩鎮起建，可以過多一排再留多次 24 小時的便來 check 多次，或者等我生完阿 b 之後同我做一次腎臟超聲波檢查，睇下有無問題 (因為而家阿 b 係我肚中，所以照超聲波會比阿 b 遮住咗，睇唔到個腎)~

之後佢又同我講返之前做果個心臟超聲波的報告，我的心臟功能一切正常，心血管亦都正常，但心聲的肌肉有少少偏厚，估計係血壓高所致(因為有血壓高，心臟要大力 d 先可以揼 d 血出來，日子有功就會好似 d 人做 gym 咁大隻咗)，有可能我的血理高係有阿 b 之前已經有，只不過我自己唔知，所以要等我生完阿 b 之後，可 check 多排我 d 血壓，睇下係唔係都係高，就知道係因為有咗阿 b 先有血壓高，定還是本身已經有血壓高~

跟住佢問我食咗 4 星期降血壓藥，身體有無乜嘢唔舒服，同埋自己有無在家量血壓等等~

我就同佢講無乜唔舒服，又比咗我在家量的血壓表比佢睇，之後佢話睇我個血壓表好好，d 血壓 keep 得唔錯，睇來真係有機會見醫生時緊張先會升高得咁緊要，又叫我可以唔駛日日在家都量血壓，佢話咁樣都攪到自己有壓力，會影響 d 血壓 wor~

就係咁佢就話而家都無乜嘢 checking 可以做住，叫我 3 個月後先再返來覆診，但由於 3 個月後，佢幫我 book 果日，我只係岩岩先完阿 b 無耐，仲未滿月，所以佢就幫我改咗 4 個月之後先返去覆診，仲開咗 16 個星期的降血壓藥比我，叫我如果呢段時候，如果 d 血壓升得好高，就要即時入院~

之後就落咗 2 樓等拎藥，唔知係唔係今日睇完醫生已經好晏的關係，今日等拎藥的時間比上次快咗好多，今次只係等 50 個 no.，大約 25 分鐘就有得拎，我係 5:40pm 就可以離開了~

2012年9月19日星期三

多功能學習車

早排係「我愛 mama」團購網度買咗架「多功能學習車」比阿 b，只係 $39，都算幾平~

今日行經旺角，所以就順便去拎埋，拎到實物後，覺得架車仔有 d 細，不過算啦，只係 $39，唔要求得咁多了~

老公生日快樂 2012

今日係老公的生日，所以我哋今日就請咗 2 個鐘頭假期，早 d 放工去慶祝~

由於有咗阿 b 的關係，唔可以攪乜嘢新意思，所以我哋都係不外乎睇下戲，食餐飯咁就當慶祝，一樣都咁開心~

今日揀咗「閃亮人生」來睇，呢套戲係真人真事改編的，都有幾好攪笑同埋感動位，但個結尾就有少少趕收工 feel，總結來講都叫幾好睇的~

睇完戲，我哋就行咗陣街，之後就去咗太子果間「大自然素食」食飯，仲食咗好多嘢添~

食飽飽後就同老公過咗去佐敦果間永安，諗住睇下 bb 展有無平嘢執比阿 b ，點知 d 價錢都唔係算好平，所以乜都無買就走，之後就搭車回家了~

為入院做準備

阿 b 踏入 30 週開始‧我發現佢越來越郁得多，老公話可以阿 b 覺得間屋開始迫，所以不滿咪踢多我幾腳 lor，ha ha.....

除此之外，我哋亦都開始緊張，一方面想快 d 同阿 b 見面，另一方面又想佢足月先好出來，所以而家都開始執下個走佬袋，睇下仲有咩未買就要開定~

執執下發現，原來我仲未買長袖的睡衣，所以就同老公去買咗 2 套睡衣，遲 d 要買埋旅行裝的牙膏先得~

2012年9月17日星期一

Jusco BB Fair 第2批戰利品送貨及執屋

二零一二年九月十六日星期日

Jusco BB Fair 第2批戰利品，今日朝早就送貨喇，今次有Troll Nicole Cot x 2 (一張放我哋家，另一張放我父母家)、Brevi 浴盆(呢個係放係我父母果邊用的)、Peg Perego P3 紫色 BB車同埋 Minimoto 換片墊 x 2 (一張放我哋家，另一張放我父母家) ，仲差張 Aprica 625 Swing High Chair 未知幾時送貨~

收到貨後，仲同老公一齊 check 埋張床仔跟來的螺絲岩唔岩數，又砌埋阿 b 架私家車，睇下推起上來時順唔順，so far 所有嘢都 ok~

紫色的 bb 車，真係好靚，我同老公都好鍾意，希望阿 b 都一樣咁鍾意啦~

今日下午，老公、阿爸仲有表哥就幫手將家中部份傢俬移位，等個廳可以留返多 d 空間出來，第時放阿 b 張床仔，同埋 High Chair，仲有等阿 b 多 d 地方活動，佢哋搬完後，我就要慢慢清理下 d 雜物，將唔要的嘢丟咗去，又要 free 返 d 櫃桶出來，第時用來放阿 b d 衫仔同埋日用品，咁樣執一執，就由下午 3 點，執到晚上成 10 點先攪掂，真係攰 c 人呀!~

2012年9月16日星期日

九月慶祝之旅第一擊 - 山頂杜莎夫人蠟像館

每年的九月都好多嘢要慶祝，先係老公的生日，之後就係我哋的拍拖紀念品，最後就係我的生日~

二零一二年九月十五日星期六

今年都唔例外，所以今日就去咗山頂的蠟像館，因為生果位可以係生日前後 5 天免費入內參觀，我而有中銀卡，可以平 $10 入場，即係 2 個入場，只係 $160 就可以了~

我哋大約 4:30pm 就上到去山頂，行咗一陣就去買飛入場，由於老公果張係免費飛，所以打個個星所係張飛度，仲要蓋咗個透明的印係老公的手背~