打歲半針 + 打針後發燒 + 輕微腸胃炎

二零一四年五月廿日     星期二

 

今日係彤彤返健康院打針的日子，所以我就請了半天假去陪佢~

 

打針前，先見姑娘，了解下彤彤的生長情況，同埋睇下佢識唔識玩積木，仲有就係講嘢方面發展成點~ 

 

之後就入去打針，姑娘話呢枝係四合一加強劑，小朋友打完針後多數都會發燒的，只要食返 d 退燒藥水就無事，如果食咗都退唔到燒就要帶佢去睇醫生~

 

由於彤彤已經 18 個月大，所以今次唔駛打大脾仔，改打手臂，姑娘同彤彤打針時，佢完成無理過個姑娘，繼續玩自己手上的玩具，真係叻叻呀!~

 

打完針 4 個鐘後，彤彤真係發燒，所以我哋就即刻比退燒藥水比佢食~

 

到晚上 11 點度，佢竟然 pao pao 咗 3 次，而且仲有少少燒，所以我哋又再比多次藥佢食~

 

二零一四年五月廿一日     星期三

 

今朝一早起身，睇下彤彤點，見佢又好早起身，同埋都好精神奕奕，又無發燒，所以我就諗住瞓多一陣先起身啦，點知彤彤突然嘔，仲要係嘔 d 黃色液體出來，所以我就即時起身洗面換衫，再執拾埋彤彤出街 d 行裝，一齊過公公婆婆家，再搭的士出去法國醫院睇醫生~

 

好彩唔駛等好耐，只係等了 6 個人就到彤彤入去見醫生~

 

醫生話發燒就係打針後的反應，唔駛太擔心；而 pao pao 同埋嘔就係有輕微的腸胃炎，呢幾日要轉食無乳糖的奶粉，同埋要飲多 d 水，如果食晒 d 藥都唔好，就要回來覆診睇下要唔要入院~

 

睇完醫生，彤彤就攬實公公，要公公抱佢瞓教，我就去等拎藥，埋單 $320，又幾平 wor，ha ha.....

 

 

 

食咗藥，彤彤都好返好多，雖然晚上仲有少少燒，但都尚算精神，可以玩下玩具~

 

 

 

 

 

 

 

執屋

二零一四年五月十八日     星期日

 

因為新傢俬會係下星期送來，所以今個星期我哋就要執定晒 d  嘢，留返個位放新傢俬~

 

另外由於舊傢俬其實都好新淨，丟咗好似好浪費咁，所以我哋將佢哋放晒上二手 Group 度用環保價出售 (即 $100 - $200 果 d 價位)，估唔到又幾受歡迎，大部份都搵到人要，所以今日都有幾個人上來交收~

 

執咗成日終於都執清晒咗個地方，不過就變一袋袋嘢放晒下地下，要等新櫃來到先可以上返晒櫃，到時應該有好點空間比彤彤玩~

 

亦都因為執屋嘅關係，今日我哋無出街，全日都留係家中~

 

而家彤彤張 BB 床，可以對正電視，佢唔駛打側身伸個頭出來睇電視喇~

 

睇下佢睇得幾投入，仲咬住張被來睇添，真識嘆~

 

 

FACE Studio

二零一四年五月十七日     星期六

 

呢輯又係一輯免費的相，因為之前係 Face Studio 個網頁申請做會員，就可以抽一次獎，而我哋就抽中咗一個攝影套餐，包了 15 個檔案~

影相當日 (5 May 2014)，彤彤的狀態麻麻，有少少眼瞓，所以影到第 3 套衫時，已經無晒電咁，只係坐係地上，唔肯企起身了~

今日 (17 May 2014) 上去揀相，一共影了 131 張相，第一輪我哋已經揀剩 40 張，當中有要好多係重複的 pose，所以再揀多一次，已經剩下 20 張，最後我哋再 cut 多 3 張，剩返呢 17 張，我哋都費事再揀了，埋單比了 $136，仲低過係團購買來影~

 

 

 

 

 

好鍾意下面呢張相，彤彤個表情/動作好正，又好老積咁~

 

 

 

下面呢張特別構圖嘅相，又係好鍾意，所以第一眼見到時已經話比老公知要買~

 

 

 

 

 

 

另一張我哋兩個都好鍾意嘅相，相中嘅彤彤，佢嘅表情好專注同認真~

 

 

 

 

 

22nd Lesson @ Kiddo Zone + 博物館日 2014 - 香港歷史博物館 & 科學館

二零一四年五月十七日     星期六

 

來到第 22 堂了，今日多了幾位新來的小朋友加入，場面熱鬧咗好多呀~

 

先來 warm-up 時間，彤彤一見到氣 tunnel 就走埋，之後仲自己爬咗入去玩添，真係爛玩豬~

 

 

 

之後又玩下波波同埋積木咁，同開其他家長傾計先知，原來彤彤係班中最細果個，其他果 d 小朋友都比佢大幾個月，唔怪之得好似識講好多嘢咁啦~

 

 

 

 

 

 

 

 

 

Warm-up 完之後就要收拾玩具，正當準備開始唱下歌嘅時候，有位新加入的小朋友怕生保，係咁响度喊，佢的家長又唔抱佢出去，由得佢喊，而且喊聲仲要幾大下，影響到其他小朋友，所以 Mr. Daniel 都有少少嬲嬲地咁叫佢 Calm down，都係唔得，所以佢家人就抱了佢出課室外面，冷靜後再入返來~

 

今日唱咗嘅歌有: Good Afternoon, Hello Hello Song, Days of the weeks, How is the weather, 等等，睇下彤彤跳舞跳得幾開心~

 

 

 

 

今日嘅主題係 opposite，Mr. Daniel 較小朋友點分 Tall & Short, Big & Small，又教咗唔同觸感係點講~

 

上完堂後，我哋過返 TST，因為呢個週未 2 日都係國際博物館日，可以免費參觀唔同的博物館，而我哋就揀咗去香港歷史博物館 & 科學館~