K1 大作戰 - 意想不到的 Waiting Call

二零一五年五月九日     星期六

 

正當以為 K1 大作戰，已經隨住第二心儀幼稚園收咗彤彤，又交晒一齊註冊費用及上學期嘅雜費，而圓滿結束嘅時候。 今日收到一封由最心儀嘅幼稚園寄嚟嘅信，令心中又再次泛起了漣漪，呢間學校不單是收了彤彤讀 K1, 仲要 offer 咗一個上午班嘅位比彤彤，呢次真的頭痛了~

 

但老公經過 2 日嘅討論，都係決定放棄呢個 offer，因為彤彤已經適應咗而家呢間學校，而且每日返學都好開心；另一原因係，註冊費用、上學期嘅雜費同校服，前前後後都差唔多成萬蚊，咁樣轉一轉，又要再洗多筆錢，而且新學校果邊嘅雜費都幾貴下，仲要坐校車添，計落洗費大咗好多；第三方面，雖然新學校學術一定好勁，但佢只係收彤彤讀本地班，唔係國際班，所以唔係最勁果隻，可能比普通學校勁小小，但其實而家讀緊果間，學術都應該幾好，所以左計又計，都係留返係而家果間好 d~

K1 註冊日

二零一五年一月廿四日     星期六

 

今年 K1 有新玩法，學卷學校要係 22 - 24/1 統一註冊，由於嚟緊彤彤會插班果間學校未 confirm 到有無位比彤彤升 K1 (無學卷的)，所以我哋都決定要去一間學卷學校註冊咗先~

 

今朝一早，我就自己一個人，拎坐彤彤張學卷，取錄信，同埋一個回郵信封，去到學校排隊註冊，同埋交 $970 的留位費~

 

 

成個過程好順利，大約半個鐘就完成。

 

老公就係屋企陪住彤彤，而我就有另一個地方要去~

 

K1 大作戰 - 意外驚喜篇

二零一五年一月六日     星期二

 

今日實在太開心，因為收到心儀學校 call waiting 嘅電話，雖然唔係 K1 位，只係 N 班插班位(因為上年考 N 時，彤彤都係後補生，估唔到過咗一個學期後先 call waiting)，但再問清楚後，原來只要插班後，老師覺得無大問題，一般都可以直升 K1，唔需要再排 K1 條 waiting 隊，所以諗咗一陣，就決定 take 呢個 offer，估唔到彤彤係細 B，N 班已經比人遲入學，竟然仲要玩埋轉校~

 

而家讀緊 N 班果間幼稚園，彤彤會讀埋 1 月份，但 2 月份嘅學費同埋雜費都要照比，因為退學要一個月前通知。而 2 月份就會係新學校插班下學期，希望彤彤順利過到 2 月尾嘅評估，可以直升上 K1啦~

 

K1 大作戰 - 總結篇

經過辛苦嘅 11月，不停出席唔同嘅幼稚園面試，踏入 12 月就陸續收到面試結果，做一個總結先:

 

申請幼稚園: 23 間

出席面試: 15 間

取錄: 2 間 (都係下午班)

後補生: 9 間

不被取錄: 4 間

 

雖然最心儀果 2 間學校，無取錄彤彤，只得後補生，但只要唔係 reject letter 都叫做仲有希望，所以我都有寫到求位信去呢 2 間學校。

 

而講返收彤彤果 2 間學校，其實我哋已經揀好，會係一較傳統教學嘅學卷學校，係區內亦係一間老牌學校(我細個讀書時已經係度)，而且課程偏深同埋比較谷，呢樣亦都係我鍾意嘅地方。但由於只係 offer 下午班，所以我已經寫信比學校，希望可以轉去上午班。如無意外，統一註冊當日就會去註冊咗先，再等下果 2 間心儀學校會唔會 call waiting~

 

 

K1 大作戰 Round 15 (最終回) - 聖公會慈光堂聖匠幼稚園

二零一四年十二月六日      星期六

 

成個 11 月嘅星期六，都係去面試，踏入 12 月嘅第一個星期六，終於都嚟到最後一站喇~

 

今朝天氣好凍呀，但我哋要去面試，所以要頂硬上~

 

 

 

今日我哋去面試嘅學校，係屋企附近，係區內嘅老牌幼稚園之一 -- 聖公會慈光堂聖匠幼稚園，以村校同學卷學校嚟講，呢間同我細個讀嘅佛教金麗幼稚園，都算係幾高人氣，同埋幾出名的~

 

入到學校，先去報到，之後就去等候區玩住玩具等叫名去面試~

 

其間發生咗件唔開心嘅事，彤彤坐係度玩玩具，咁佢想拎玩具箱入面另一件玩具玩，可能佢比較粗魯，所以大動作咗少少，而撞到同枱嘅另一位小朋友，果位叫琳琳嘅小朋友 (佢自己講個名出來)，就係對住佢媽咪大叫(仲要個樣扮到好無辜咁)：「做乜打琳琳呀? 琳琳好痛呀~ 快 d 拎手機影低佢，佢打琳琳~」

 

我同老公聽到佢咁講之後，我哋好愕然，點解一個 3 歲未夠嘅小朋友，可以講出呢番說話，除非係佢成日聽到大人咁講，佢先會識咁講返出來啦，唔係點會識咁講呢?!

 

呢個時候，琳琳嘅媽咪好想制止佢繼續講，但佢個囡仍然繼續講，佢媽咪就唯有話要 Sharing，唔好同人爭嘢玩 (好似唔係好關事 wor?!) 而我同老公就叫彤彤唔好咁大力，同對方 say sorry，之後我哋就帶彤彤去另一邊玩，而同枱嘅另一對母女，見到咁嘅情沌，亦都離坐，去了另一邊玩~

 

大約玩多 5 分鐘度，就可以入去課室面試了~

 

先到老師 Say Hi 同揮手，之後就坐低玩手抓板~

 

老師拎咗 2 張相出來，問彤彤係乜生果? 彤彤無理老師 @@

 

之後老師再叫彤彤行去另一邊拎個紅色波波返來，點知比琳琳拎了，彤彤就拎咗個粉紅色返來 (又係呢個琳琳!!!)，根住老師話拎紅色 wor，你呢個係粉紅色 wor~ (我心諗：因為紅色果個比人拎咗嘛，彤彤咪拎個相似 lor~)

 

之後老師就同我傾下平時邊個照顧彤彤，同點解揀呢間幼稚園等等，之後就可以離開了~

 

離開前，老師送咗盒玩具比彤彤，但彤彤話唔要，係都要推返比老師@@ 所以當然就無講多謝啦，但就有講 Bye Bye 同埋推返埋張櫈~

 

面完試後，同老公傾返彤彤表現，我哋都覺得應該機會不大~

 

老公仲同我講，佢等我哋期間，聽到有另一位父親同母親嘅對話，個父親話個囝都有 3 間 offer 係手，而且都已經揀定要讀邊間，都唔明點解仲要嚟呢間面試，呢間就算收，都唔會揀嫁啦~ 而個母親就話嚟試下個囝嘅戰鬥力都好呀~ 而家真係太多怪獸父母了~

 

面完試，我哋就帶彤彤去公園玩咗一陣，之後就回家了，因為要等張床送來，所以今日就唔出街了~

 

 

 

 

 

K1 大作戰 Round 14 - 基督教中心幼稚園 (九龍塘總校)

二零一四年十一月廿九日      星期六

 

今日好輕鬆，只係需要見一間幼稚園，而且仲要係下午先見，所以我哋唔駛一早就起床，慢慢先搭車出去都得~

 

我哋早咗 15 分鐘嚟到，先係門外排隊交 Form 同報到，而係排隊等交 form 期間，我聽到校長係度罵學校嘅嬸嬸，話佢應該要嚟面試嘅小朋友，先掉咗手上嘅汽球先好入來 (因為隔離間教學中心係條街度派緊汽球)，唔係會影響一陣面試嘅流程 (因為面試最後一 part 會派汽球)，個嬸嬸有點無奈，而我聽到後，都覺得嬸嬸好慘，無啦啦比人罵，佢都唔知隔離間教學中心係條街度派緊汽球嫁，同埋覺得校長有點惡 lor~

 

交完 Form 同報到之後，我哋就帶埋彤彤去 Outdoor Playground 玩住等~

 

 

 

 

玩咗大約 15 分鐘，就有老師過來叫彤彤入去面試，但彤彤因為玩開，梗係唔想離開啦，所以有少少扭計，但老師又一枝箭咁行咗去，我哋唯有抱起彤彤，一路安撫住佢，再跟老師行入課室~ (當時心諗，個老師都唔太有愛心，明知小朋友扭緊計，都唔等一等我哋，就自己行咗去)

 

入到課室，先同老師揮手打招呼，老師先問彤彤叫乜名同幾多歲，彤彤當然係唔識答啦，ha ha.....

 

老師都未問完佢，佢已經心急想玩個hs動物併圖，所以老師就比佢玩，叫佢將 3 塊併圖併成一隻動物，彤彤左併右併，老師又幫下佢手，好快就攪掂~

 

老師再拎咗個手抓版出來叫彤彤玩，當然無問題啦，平時在家成日都玩~ 

 

之後就叫彤彤疊高 d 積木，彤彤好快就疊好~

 

老師再叫彤彤穿珠仔，穿完再拎返出來放入個籃仔度，又係好快完成~

 

之後老師拎咗個杯同埋牙刷出來，問彤彤牙刷係乜? 同埋點樣用，但彤彤無理到老師，反而拎住個杯係度扮飲水@@

 

之後老師問咗我哋幾個問題，都係問下平時邊個照顧彤彤? 係邊度知道呢間學校? 點解要揀呢間學校?

 

我就答老師，我再上網睇過其他家長嘅意見，知道呢間學校好好，而且學校有成 50 年歷史，學校嘅口啤好好，好多家長都讚，所以對學校都好有信心，好想彤彤入來讀~

 

最後老師問彤彤要唔要波波，彤彤話要，之後老師就帶彤彤行埋去一堆波波度，問彤彤想要乜嘢色嘅波波，彤彤答 Blue，咁老師就比咗個藍色波波比彤彤，之後我叫彤彤 say thank you，但佢只係講 "you"~

 

老師同我哋講面試完畢，叫我哋等消息，咁我哋就叫彤彤 Say Bye Bye 同埋泊返埋張櫈，彤彤就同老師揮手，但無講出聲，至於泊櫈，就做下樣推了一下就算~

 

 

 

面試後，我哋老公都覺得，呢間學校嘅老師無乜笑容，又無乜愛心，而且彤彤表現又唔係特別好(呢間得好少位比外校生，因為 N 班升上來嘅都估了大部份位)，所以應該都無乜機會了~

 

K1 大作戰 Round 13 - 香港創價幼稚園

二零一四年十一月廿二日      星期六

 

返完 Playgroup 之後，我哋又要搭車出返來九龍塘，因為下午仲有一個面試要出席 -- 香港創價幼稚園，聞說連劉德華都有幫佢嘅囡囡報了呢間幼稚園，仲被安排係星期四果日面試，而劉生仲親自帶囡囡出席面試添~

 

呢間幼稚園有乜好? 一來有學卷，兩來辨學團體係日本嘅佛教團體，教育小朋友好似日本小朋友咁乖巧，仲會訓練/啟發小朋友嘅思考同創作力，所以每年都有幾千人報讀，但學位只得 180 個，所以競爭都好大，當比彤彤見識下 lor~

 

 

入到去，先去指定嘅課室門外報到，但由於我哋早了半個鐘來到，老師都預唔到仲有幾多先到我哋(因為要見到前面時段嘅申請人先)，所以叫我哋先上樓上 Playground 玩下先，到 4:30PM 再落來睇下仲有幾多人先到我哋~

 

 

 

 

 

 

 

 

 

 

 

 

 

 

 

 

 

 

 

4:25 PM 我哋就落返樓下，去返指定課室門外再一次報到，老師話前面仲有 4 位小朋友，先輪到彤彤，所以仲要等多一陣，我哋就比彤彤係度四圍行下~

 

 

 

大約等到 4:45PM 就輪到彤彤入課室面試，彤彤先同 2 位老師揮手 Say Hi~

 

之後老師就比咗塊手抓板比彤彤玩，彤彤一路玩時，老師就問我哋問題:

 

1) 如果無 AM，PM 考唔考慮? (當然 Say Yes 啦)

2) 彤彤有什麼優點? (我答: 主動、熱情、開朗)

3) 用什麼標準/準則去為彤彤揀一間適合嘅幼稚園? (我答: 我唔想揀一 d 太谷嘅幼稚園，咁樣彤彤就會失去咗一個快樂嘅童年)

 

答完呢 3 條問題後，彤彤都併好晒 d 手抓板了，老師就拎咗一張圖畫出來，彤彤答：書、Green、Orange (因為有 d 玩具係呢 2 隻色)、車 (再配埋聲 wu wu)~

 

之後老師就話面試完畢，叫我哋返去等消息，臨走時，彤彤仲同老師揮手講 Bye Bye，我再叫佢推埋張櫈，佢都有返轉頭來做~

 

面完試後出返來，我哋都覺得學校似揀家長多過揀小朋友，而且又咁多人考，所以應該都無乜機會的了~

K1 大作戰 Round 12 - 圓玄幼稚園

二零一四年十一月廿二日      星期六

 

今日又要去見 2 間幼稚園，彤彤今朝起床後心情好靚，係咁捉住我陪佢跳舞，又成日笑笑口咁~

 

 

 

 

 

 

準時來到幼稚園門外，先去報到，再拎埋 Label ~

 

 

等一陣就入去音樂室，要除鞋坐係 play-mat上面，大約有 15 位小朋友同 15 位家長，同 2 位 NET teacher + 2 位本地老師，一齊同小朋友唱歌跳舞玩遊戲，彤彤唔太投入，只係耐唔時先一齊跳下舞，大部分時間都係坐係我大脾上~ 玩完遊戲，老師就每位小朋友都送了一盒粟米片~

 

之後就一齊著返鞋，我同阿囡好快就著好鞋，其他人未得，所以要等埋其他人，其間 2 位 NET teacher 走埋來撩彤彤玩，仲話佢好得意添~

 

好喇，等齊人，就一齊過另一間課室玩住玩具等~

 

其間家長要去排隊比報名費，小朋友就坐係度玩玩具，點知彤彤整跌晒 d 穿珠玩具，老師叫佢幫手執返，佢唔肯，到我出聲叫佢先肯，真係比佢激 c~

 

好快就叫彤彤個名，可以入另一間課室面試~

 

老師先同彤彤揮手講早晨，彤彤都有揮手 Say Hi~

 

之後就問彤彤叫乜名，彤彤無出聲，所以由我代答~

 

彤彤見老師枱上有個波，示意想玩，老師就拎住個波係乜來，彤彤答:「波」，之後老師同彤彤玩咗 2 次推波遊戲，彤彤都有做到~

 

之後老師問個波有乜嘢顏色，彤彤都答到晒 Red, White, Blue~

 

之後老師拎咗本故事書出來，問彤彤係乜嘢來，彤彤答:「書」，之後就問彤彤入面有乜，彤彤答：「車車」、「wo wo」，之後老師問咗幾隻顏色，彤彤都有用英文答~

 

老師又較下彤彤動物名，但彤彤就成日只係講：「wo wo」，真係比佢激 c~

 

老師就同我講，彤彤英文幾好 wor，平時係唔係咪成日用英文對答嫁? 我同老師講都唔係，只不過彤彤學英交比較快，所以教佢幾次已經識~

 

之後就再問下平時邊個照顧彤彤，同埋假日會去邊，會做乜嘢等等~

 

老師拎咗 d 穿珠出來比彤彤穿，彤彤當然無問題啦，穿完後，老師叫彤彤拆返出來，再放返落個籃仔度，點知彤彤太大力，一下就推晒 d 穿珠出來，攪到成枱都係，好彩無跌晒落地~ 老師就叫彤彤執返，佢都有照做，執完仲推返成籃比老師添~

 

老師拎咗部車仔出來，話送比彤彤，但要答咗係乜嘢顏色先，彤彤就講 Orange Yellow，之後老師話好叻 wor，送比你啦，之後彤彤就接住，我係側邊提彤彤講 Thank you，但彤彤只係講了 You 就算~

 

老師話面試完畢，可以走喇~ 我叫彤彤 Say Bye Bye，彤彤都有揮手同講 Bye Bye，再叫佢推埋張櫈，佢都有係咁二推下~

 

出咗課室，仲有一個月曆拎添~

 

 

出來同老公會合返，原來都 in 咗成個鐘，之後我哋講返彤彤嘅表現，大家都覺得彤彤表現唔錯，應該都有機會~

 

之後我哋去食飯先，再搭車去荃灣返 Playgroup~

K1 大作戰 Round 11 - 基督教中心幼稚園 (油塘)

二零一四年十一月十五日     星期六

 

今日嘅第二站係响油塘，呢間係一間分校來的 -- 基督教中心幼稚園 (油塘)，總校係九龍塘，係一間幾出名嘅學卷學校，而油塘呢間分校，只係開了 2 年嘅時間，所有嘢都好新淨嫁~

 

初初唔知學校嘅確實位置，有少少難搵，仲行多咗好多路，後來再周圍行下，先知原來係商場嘅平台上，再跟指示行，先知原來係我姨屋企樓下~

 

入到去先報到，跟住就可以係 Playground 度玩，等候老師叫名入課室面試，估唔到好多人係度等緊~

 

個 Playground 係室內的，好大好多嘢玩，所以就算等咗差唔多 45 分鐘先可以入去面試，都唔算好悶，彤彤仲玩得好開心添~

 

 

 

 

 

 

 

 

 

 

 

 

 

 

 

 

 

 

 

 

 

一路玩住一路等，終於都輪到彤彤入課室面試了~

 

 入到課室，先同老師揮手打招呼，老師先問彤彤叫乜名同幾多歲，彤彤當然係唔識答啦，ha ha.....

 

老師都未問完佢，佢已經心急想玩個牛牛併圖，所以老師就比佢玩，叫佢將 3 塊併圖併成一隻牛，彤彤左併右併，老師又幫下佢手，好快就攪掂~

 

之後就叫彤彤疊高 d 積木，彤彤好快就疊好~

 

老師再叫彤彤穿珠仔，穿完再拎返出來放入個籃仔度，又係好快完成~

 

老師再拎咗個手抓版出來叫彤彤玩，當然無問題啦，平時在家成日都玩~

 

之後老師問咗我哋幾個問題，都係問下平時邊個照顧彤彤? 係邊度知道呢間學校? 點解要揀呢間學校?

 

我就答老師，係我姨話我知有呢間學校，之後我再上網睇過其他家長嘅意見，知道呢間學校好好，所以都想彤彤入來讀~

 

至於點解要揀呢間學校，我都知道呢間係分校，而總校係九龍塘，有成 50 年歷史，學校嘅口啤好好，好多家長都讚，所以對分校都好有信心~

 

最後老師拎咗 2 個波波出來比彤彤揀，彤彤揀完後，老師問佢係乜顏色，彤彤答 orange，之後我叫彤彤 say thank you，但佢唔肯講~

 

老師同我哋講面試完畢，叫我哋等消息，咁我哋就叫彤彤 Say Bye Bye 同埋泊返埋張櫈，彤彤就同老師揮手，但無講出聲，至於泊櫈，就做下樣推了一下就算，老師就話張櫈比較重，得嫁喇!~

 

係課室出返來，就有校工比咗學校嘅簡介比我哋，之後就可以離開了~

 

 離開後，同老公傾下彤彤嘅表現，其實我覺得彤彤表現幾好，應該有少少機會，但老公就講得彤彤唔識講自己名同幾歲會被扣分，而且又多人報考，應該無機會~