第六次私家產檢 (28wks5d)

二零一二年八月三十一日 星期五 

今日 book 咗靳醫生 7:20pm 的，結果都要等到 8:10 pm 先有得睇~

見到靳醫生，佢就問下我有無乜嘢唔舒服，咁我就講返 QE 講邊話我血液中的尿酸有少少偏高，驚我係妊娠毒血症的早期徵兆~

靳醫生話睇我今日的血壓 (144/82) 都 OK，同埋我又無水腫出現，應該暫時唔係有呢個症，不過既然 QE 果邊話要 mon 緊 d，都係好事來的~

另外我同靳醫生講，呢排恥骨好痛，佢話因為阿 b 開始重，同埋個肚開始大，所以會聚住，有 d 人用了托福帶會舒緩到，但佢覺得作用唔大~

之後就叫我瞓上床上，睇下阿 B 先~ 

今次阿 b 又大隻咗了，仲追返上來，變成中碼 bb，而家 28wks5d 的重量有1248g，係屬於中碼，符合標準，不過靳醫生叫我唔好重得太快(其實我由有咗到而家，都只係重咗 8-9 磅咋)，因為我同老公都比較肥，阿 b 好大機會都會有 d 肥人的基因，擔心我到時難生~ 

(阿 B 係咁係度郁) 

 
(阿 B 的頭圍) 

  (阿 B 的肚圍) 

 
(阿 B 的大脾骨長度) 

 (阿 B 的腳板仔)

原先諗住今日可以見下阿B個樣，點知佢全程用對手仔遮住個樣，唔比我哋睇，靳醫生都已經好好人，幫我照咗幾次，又郁下佢，阿B都係唔肯拎開對手仔，激c我喇~ 

「精明媽 Me 孕育健康 BB」 講座的禮物

二零一二年八月廿九日    星期三

之前參加咗「精明媽Me孕育健康BB」講座，當時派咗張coupon要親身上智滙拎禮物包，初時冇諗過上去拎的，因為張 coupon 只係話得一份 soft touch 試用裝，同埋包被一張，都唔係咁吸引，後來係 baby kingdom 見有媽媽拎完話仲有2罐A+初生BB奶粉添，所以就今日請半個鐘假趕過海拎~

拎完之後，搭返過海巴士回家，點知勁多人，所以冇位坐，係呢個時候，有位女士拍一拍我，話個位比我坐，真係超多謝呢位好心人，等我唔駛拎住一袋嘢同手袋，再企成45分鐘先落車~

第七次政府產檢 (28wks2d)

二零一二年八月廿八日 星期二

今日約咗 11:00am 返去做產檢，今日勁多人呀，有 d 陪行的人都要企，我嚟咗咁多次，都係第一次試過咁多人咋~

見醫生前又係先驗小便，再磅重同埋量血壓，今日嘅血壓只係少少高，去到 144/82，但姑娘都叫我過 15 分鐘後再返去量多次，結果呢次唔知點解會好低，得返 99/58，第一次咁低呢~

另外，驗小便時，張蛋白尿的試紙的邊位有少少變色，但中間位又無事 wor，姑娘見今日咁多人，話算啦當無事啦，唔駛驗多次~

由於今日太多人的關係，要等到 12:15pm 先輪到我，足足等咗 1 個鐘頭 3 個字呀~

今次又係見返上次果位女醫生，佢好有耐心咁幫我度下個肚同埋子宮的位置，又聽下阿 b 的心跳咁~

之後就同我講返上次驗血同埋24小時小便化驗的報告，佢話應該唔係妊娠毒血症，因為 d 肝腎功能都一切正常，但血液中的尿酸有少少偏高，佢有 d 擔心係早期妊娠毒血症的徵兆，所以之後要跟緊 d，同埋要定期驗血~

由於之前量的 2 次血壓有好大的差距，所以醫生幫我即時量多次，今次就 148/82，高咗少少，但都可以接受~

另外我又問返醫生，上星期做果個耐糖測試的結果係點，佢好好人話比我知，空腹血糖係 5.0，而飲糖水後 2 小時的血糖係 7.6，所以係合格的，醫生話唔合格的數值分別係 5.8 及 7.8 以上~

兒歌集

之前聽產前講座，姑娘教準爸爸要由胎教開始，就唱下兒歌比阿B，咁第時阿B出咗世後扭計時，爸爸只要唱返呢幾首兒歌，就可以安撫到阿B，令阿B安靜落嚟，所以今晚就咗呢套CD，等老公學下點唱兒歌，再唱比阿B聽~

降血壓藥及留 24 小時小便樣本

二零一二年八月廿五日    星期六

今日老公返盧醫生度睇驗身報告，我陪埋佢去，順便問下我應唔應該食 QE 開比我的降血藥，盧醫生話都可以食的，因為份量都係好輕，同埋呢隻藥係孕婦可以食的~

不過盧醫生話叫我留意下，食咗藥後會唔會出現血壓過低的情況，同埋記住要在家量血壓，下次覆診時幫我睇下，如果發現食藥後，有乜唔舒服 or 血壓太低的話，就要停藥~

二零一二年八月廿六日    星期日

今日全日都無出過街，仲要一早起身添，因為要由早上六點開始，就要儲起來緊 24 小時內的所有小便，係第二朝一早拎返去 QE 做化驗~

二零一二年八月廿七日 星期一

今朝一早就拎咗 d 24小時小便樣本返去 QE，再係佐敦食埋個早餐，就趕返公司，返到公司岩岩好 8:45am，無遲到~

第二次見政府內科醫生 (27wks4d)

二零一二年八月廿三日 星期四

今日約咗 3 點見內科醫生，我準時到達，今日又係見返上一次果個醫生，但門外等侯的人勁多，我都係見有人起身入去醫生房度，先有位坐下~

之後就係度等，一等就等到 4:15pm 先到我入去睇，醫生話睇返我果次做果個 24 小血壓監測的報告，有幾個鐘頭的血壓都係比正常高，有少少擲界，又唔算話好高，所以都係要我食降血壓藥，又問我有無帶在家量的血壓表過來比佢睇，呢次佢又唔太 hea wor，有拎上有睇咗幾眼，就比返我~

之後佢要求我留 24小時的小便樣本化驗，我話我早幾日先係產科果邊留完咋 wor，唔可以拎返果個報告睇咩? 佢話 check 多次好 d wor，我都係想穩鎮 d，同數據準 d 啫，佢咁講，我都無得 say no 啦~

之後佢再提話要我食血壓藥，但我始終唔太想食，因為我平時自己在家量血壓 or 係廬醫生度量都無事的，只係係 QE 度量先會高，我覺得係因為係醫院量，始終個人都係會緊張少少的，但個 醫生嚇我，話你都唔想阿 B 要早產或者要開刀先生到嫁? 同埋呢隻藥對 BB 無影響的，係唯一一隻孕婦可以食的降血壓藥，可以放心食，不過就要留完 24 小時小便樣本之後果日先開始食，費事影響咗個化驗結果~

既然你都咁講 lor，我唯有食啦，但我會問返盧醫生的意見先，如果盧醫生都認為無問題，我先食~

之後就落咗下層樓的藥房攞藥，睇一睇個 label，要等成 13x 人，有無咁多人呀?! 我見咁多人，就過咗去 M2 拎咗個留小便樣本的樽先，再返來等，結果攪到成 5:40pm 先到我可以拎藥，足足等咗 70 分鐘，真係浪費時間!~

BB 床及BB 車

二零一二年八月二十日 星期一

BB 床同 BB 車，我之前已經上網做過好多 research 的了，最後都係覺得寧願買貴少少，都要買返信譽好的品牌，最重要係夠安全，所以最後都係決定買歐洲貨~

先講 BB 車，其實未有阿 B 前，我已經決定咗第時一定要買 Peg-perego 的 BB 車，心水係 P3 or SI，後來再做多 d research 之後，最終鎖定買 P3，因為 P3 比 SI 穩鎮 d，因為全部係孖摝，雖然咁樣會重 d，但最緊要安全嘛~

另外，就係 P3 的太陽檔的遮蓋範圍大d，而且又有拉鍊位打開，再拉去前面，所以價錢上只差 $200，一於決定買P3~

至於 BB 床，之前行過好多百貨公司，睇過唔同牌字的 BB 床，始終都係唔合心水，我唔知係因為 for display 的關係定點，梗係覺得 d BB 床好唔穩鎮，搖搖下咁，唯一一隻牌字的 BB 床，無呢個情況，就係 Troll 的 BB 床，Troll 係 0/3 baby 旗下嘅品牌，呢條 line 係响歐洲造的，通過晒歐洲的安全標準驗證~

由於阿 B 第時會由我父母幫手湊，所以我哋要買 2 張 BB 床，每邊一張~

而家我對 Troll 嘅 Bedside Cot 同埋 Nicole Cot 都好鍾意，所以決定 2 張都買晒，我哋屋企就放 Bedside Cot，我父母果邊就放 Nicole Cot，因為 Bedside Cot 第時可以拆晒 2 邊床欄，變成小童床，瞓到 5 歲都得，所以就揀呢張放係我哋屋企啦~

至於 Nicole Cot，其實都可以拆一邊床欄的，但我估我父母應該都唔會用到，因為阿 B返咗學之後，應該都唔駛我父母幫手湊夜晚，所以呢個功能應該用唔到了~

撞岩今日老公放假，又係 Jusco 的感謝日及 BB Fair，所以放工後，就同老公去咗黃埔果間 Jusco 買呢 2 樣嘢喇~

點知去到，Peg-perego P3 (紫色) 同埋 Troll Nicole Cot無貨要訂，而Troll Bedside Cot 就全線決貨，唔知幾時先有，所以唔比訂，既然係咁就唯有買住前 2 者先啦，另外再買咗 2 個換片墊，一張 BB 床的涼蓆，同埋一張 BB床嘅床褥，全部都係比咗錢先，未知幾時先送貨~

飲糖水做耐糖測試及交回 24 小時小便樣本 (27wks1d)

二零一二年八月十九日    星期日

今日全日都無出過街，仲要一早起身添，因為要由早上六點開始，就要儲起來緊 24 小時內的所有小便，係第二朝一早拎返去 QE 做化驗~

二零一二年八月二十日    星期一

今日老公放假陪我QE, 佢哋約咗我早上 8:45到達 B3，飲糖水做耐糖測試，但由於我要先交回 24 小時的小便樣本去 M2，所以我哋就係 8:30am 就到咗 M2，之後再過去 E1 會計部拎飛，點知會計部要 9 點先開門 lor，咁就唔好約人 8:45am 到 B3 啦~

拎完飛就過咗去 B3，去到姑娘先講解一下今日的流程，就係先抽血，再飲一碗糖水，飲完去 counter 報時， 2 小時後再抽多次血，之後就可以離開，第 2 日如果收唔到電話即係 pass 了~

大約 9:15am 就叫我去抽血，之後就飲糖水，我覺得碗糖水無其他媽咪形容得咁難飲，我反而覺得幾好飲添，he he.....

大約 9:25am 就飲完，之後就去咗 counter 報時，同老公係度呆坐咗 2 個鐘，期間太悶，所以我都瞓咗一陣，好快就到咗 11:25am，姑娘就叫我去抽血，之後仲比咗一包奶同埋一包梳打餅比我，叫我食埋先走，但我無食到就走咗了，因為要留返個肚，同老公去飲茶嘛~

飲完茶，我就返咗公司，老公就回家先，等我放工時過來接我，一齊去 Jusco 買阿 b 的嘢~

Chicheeduck Final Sale

二零一二年八月十八日    星期六

同老公聽完講咗，就過咗去

咗太古城行街，因為知道 Chickeeduck 而家做緊 final sale，所有貨品都係 $80起，所以就睇下有 d 靚衫仔岩阿 b~

結咗買咗 2 套衫仔同埋一個睡袋比阿 b，咁就用咗 $545 了，已經比未折前未咗差唔多 $500 了~

之後我哋就去咗吉之島，睇下阿 b 的用品有無平，大約行咗一個鐘度就搭港鐵回家，今日好好彩，竟然有位好心的中年男士讓位比我坐，係我有咗阿 b 以來的第一次呢~

第三次參加產前講座 - 「精明媽 Me 孕育健康 BB」 講座

二零一二年八月十八日 星期六
 
去完盧醫生度覆診後，我哋就去咗食晏，之後就過海去聽「精明媽 Me 孕育健康 BB」講座，大約 2:30PM 我哋就到咗會場，現場勁多人，由於主辦單位(美贊臣)無諗過咁湧躍，所以要即時加座位比 D 遲到的準父母坐，好彩我哋未算好遲先到達，都仲可以坐到 D 比較前的位置，雖則係 D 邊位，但都好過坐得太後~

呢個講座分為 2 部份，第一部份係講胎教的，老公好留心聽，原來我哋平時做的嘢，真係有用嫁，好似比 D 音樂比 BB 聽，同 BB 傾計等等~

第 2 部份就講下準媽媽要食 D 乜嘢，先會對 BB 好，不過我覺得
講者 的嘢唔係太岩，因為之前都有上網睇過，亦都有 D 醫生講過話倀乜嘢好，但個講者就持相反的意見~

聽完講座之後，仲有一袋禮物拎添，真係好~

除咗呢 D 禮物之外，仲派咗張 Coupon 比我哋，叫我哋要係辦公時間內，上去佢哋公司拎另一份贈品，好似話有一張 BB 包被、手襪仔，同埋 Soft touch 的試用裝，我哋覺得唔太吸引，所以都唔打算去拎了~

第六次見私家內科醫生 (26wks6d)

二零一二年八月十八日     星期六

今日約咗 12 點見盧醫生，我哋早咗 15 分就到達，之後都要等到差唔多 12:30pm 就到我入房見佢~

盧醫生見到我，就問下近排有無唔舒服，同埋睇下我在家量的血壓表~

我就同盧醫生講返，早幾日係 QE 做產檢時，驗到有蛋白尿，同埋 QE 要我做一大輪的檢查，仲有就係 QE 果邊懷疑我有妊娠毒血症~

聽完我講之後，盧醫生話 QE 果邊只係比較緊張，照佢睇，我應該唔係妊娠毒血症，因為之前同我驗過 2 次血，都無問題，應該唔似係~

不過佢叫我放心比 QE 同我做檢查，佢話政府肯同我驗咁多嘢係好事，即管比佢哋 check~

同埋盧醫生又好詳細咁解釋比我同老公知，乜嘢係妊娠毒血症，同埋如果出現乜嘢情況下，就要即時入院等等~

大約傾咗半個鐘，我哋就出返去，臨離開前，盧醫生叫我下次返 QE 度做產檢時，問返果邊我的化驗結果係點，之後同返佢講，等佢有個記錄~

之後佢又幫我量下今日的血壓，度出來非常正常 (132/76)，盧醫生叫我下個月再返來見佢，大約 1:00 PM 我哋就離開了~

老師唔係應該要做個好榜樣嗎?

二零一二年八月十七日    星期五

頭先放工搭巴士，上車時見到下層有位咪費事上上層，係一個孖位，有位女士坐開面，我同佢講了聲唔該，示意我想坐入面個吉位，但呢個女士完全無擰轉身或者係讓我入去的意思，仲係繼續傾電話，到我攝埋個身想入去，佢仍然無郁過，繼續傾電話，攪到我要縮起個肚，好辛苦先攝到入去，真係過份!!!

我坐低後聽到佢講電話，原來佢係一位老師來的，有d咁的老師，唔怪得新一代的人唔會讓座啦，唉~

第六次政府產檢 (26wks2d)

二零一二年八月十四日    星期二
 

由於成晚都發燒，個胃又痛，到臨天光先退咗燒，所以老公唔比我返工，叫我今日去完 QE 做產檢之後就回家休息~

但老公今日請唔到假陪我去做產檢，所以就由我爸爸陪我去 QE~

今日約咗 10:30 AM 見醫生，我哋大約 10:15 AM 就到咗，去到又係先驗小便，再磅重同埋量血壓，今日嘅血壓只係少少高，去到 139/88，但姑娘都叫我過 15 分鐘後再返去量多次，結果都係少少高，但驗到有蛋白尿，所以姑娘要我飲多 d 水，再留多次小便來 check多次～

等去小便期間，個肚又開始唔舒服，仲肚瀉咗幾次，果日又多人返來做檢查 wor，個洗手間要大排長龍，真係幾難忍呢~

之後驗多次小便，結果都係仲有蛋白尿，所以要照 mark 底比醫生跟進~

大約 12 點先到我入房見醫生，呢個醫生好好人，仲好耐心的聽我講返之前點樣 check 到有血壓高，同慢慢睇我在家所量的血壓表，之後又同我講，今日 check 到有蛋白尿，有 2 個可能，一係就係尿道炎，另一個可能就係妊娠毒血症~

由於我無尿道炎的徵狀，而且又有血壓高，所以佢驚我係妊娠毒血症，穩鎮起見，佢叫我留多次小便樣本，幫我種下菌，睇下係唔係尿道炎，又要抽血及一星期內交回 24 小時的小便樣本返來化驗，睇下係唔係有妊娠毒血症~

之後就係忙於去抽血，同埋拎留 24 小時小便樣本的樽，又要再飲水留多次小便化驗，攪得來都差唔多 1 點先可以離開~

腸胃炎

二零一二年八月十二日 星期日

今日同老公食完個 tea 之後，個肚仔就開始唔舒服，但又唔係肚瀉果隻，只係有 d 陰陰痛咁~

夜晚就返咗我父母果邊食飯，回家後個肚越來越痛，仲瀉咗 2 次添，之後我就無理到，早點上床就瞓~

 
二零一二年八月十三日 星期一

今朝起床，個肚無乜事，所以就如常返工，點知上午 11 點開始，個胃有 d痛，仲有 d 發冷添，我估我當時應該發緊燒，咁我見個唔係太大問題，所以就諗住 lunch 時瞓一陣，睇下會唔會好 d 啦~


Lunch 的時候瞓咗成個鐘，飯都無胃口食，之後又好返 d wor，點知到 4 點幾就 feel 到個人好燙，應該係發緊燒，所以即 call 老公，叫佢放工即走，陪我去睇醫生，而我又係放工即去睇醫生，之後係診所等老公來接我~

醫生話我係腸胃炎，但大肚婆唔可以食止瀉藥，一定要痾清 d 菌出來，所以佢只係比咗退燒藥同埋胃藥比我食咋~

果晚成晚都胃痛，又發燒，所以瞓得唔好，而且第 2 日又要返 QE 產檢，老公就唔比我返工，叫我做完產檢就回家休息~ 

荷花 BB 展

一年一度的荷花 BB 展，將會係 3/8/2012 - 5/8/2012 舉行，由於有 5 張媽媽會送的飛，所以我哋決定係 weedend 會連去 2 日~

 

二零一二年八月四日 星期六 

今日入去的主要目的係拎贈品，同埋睇下有無 d 乜嘢係岩心水的嘢，有就記低先，回家上網 check 下，睇下係唔係平先係明天入場時買~

我哋由上午11 點半入場，一行就行咗 9 個鐘，拎咗唔少贈品呢~

 

除咗拎贈品，今日都買咗入院用品，因為有部用品，法國醫院係無包到的/只係包得好少量，所以要自備~

又買咗好多媽媽推介的 Baby Carrier~

今日仲參加咗美素佳兒的準媽咪實習坊，可以同老公一齊上堂，學習點樣同阿 B 清潔、換衫，同埋掃風，我仲比指導員讚我做得好，但老公就比  指導員話佢做錯咗掃風的姿勢，叫老公要跟我學習添，哈哈哈......

二零一二年八月五日 星期日

今日同老公由下午1 點入場，一行就行咗 6 個鐘，又拎咗唔少贈品呢~ 

今日的重點係買 BB 用品，睇下我的收穫幾豐富： 

 

第五次私家產檢 (24wks5d)

二零一二年八月三日 星期五 

成 2 個月無去過靳醫生度了，因為上個月去咗林醫生度做結構性超聲波檢查，所以上個月就唔駛返靳醫生度檢查~

見到靳醫生，佢就問我做咗
結構性超聲波檢查未，我話已經做了，佢就問我係邊度做，同埋有無帶到個報告來，如果有就比佢 make 個 copy~

之後佢再問下我有無乜嘢唔舒服，我話 d 皮膚有時有 d 痕，問佢可唔可以開枝 cream 比我，當然係無問題啦~

之後就叫我瞓上床上，睇下阿 B 先~

今次阿 b 又大隻咗了，不過靳醫生話阿 b 係細碼 bb 來，而家 24wks5d 的重量只得 676g，係屬於細碼，但都符合標準~

 (阿 B 的頭圍)

(阿 B 的肚圍) 

 
(阿 B 的大脾骨長度) 

(阿 B 的心跳) 

跟住我哋又問靳醫生，可唔可比阿 b 個樣我哋睇，靳醫生當然話無問題啦~

呢次阿 B 好合作，等靳醫生幫佢影到幾張都算清楚的相比我哋~ 

心臟超聲波及 24 小時血壓監測

二零一二年八月一日 星期三

上次見政府內科醫生時，安排咗 2 個檢查比我做，所以老公今日就放假陪我來 QE 做檢查~

我哋 10:00am 就先去 B7 做心臟超聲波先，係門外等咗成個鐘先輪到我入去，但又唔見有其他人嫁 wor，都唔知點解要等咁耐~

入到去係一位女醫生來的，佢叫老公出返去，話家人唔可以在場，根住就叫我瞓上床，但我想講張床勁 dirty lor，佢仲係咁叫我瞓落去有撻漬果度，oh my god!~

之後佢就開始幫我照，佢一 d 都唔斯文 lor，仲好粗魯咁同我照，又大大力咁用個超聲波儀器壓落我個心口，叫我轉身時又粗聲粗氣咁，真係唔多好受~

大約 10 分鐘度就照完，佢叫我著返衫就可以走，之後就無理過我，自己係度做佢嘅嘢~

我真係唔明，我係 B7 門外等咗咁耐，都唔見有其他人來做呢個檢查 (得 1 間房係做呢個檢查啫)，點解內科果邊聲稱呢個檢查，排期的時間要 23 個月咁耐呢??

之後我哋就過咗去 H3，做 24小時血壓監測，呢邊 d 姑娘好好人，個個都好溫柔呢~

原來所謂的 24 小時血壓監測，係 QE 會借部血壓計比我 1 日，要掛住係身上，部機每個鐘會幫我量一次血壓，然後記錄低~

因為要掛部機係身的關係，姑娘話今日我唔可以洗澡，直上聽日幫我還機後先可以~

原先我諗住放半日假就算，而家咁的情況，唯有放足全日啦，因為部機都幾大部，又有 d 線係度 wor，返工都幾麻煩下~

二零一二年八月二日 星期四

晨早 8 點半我就到咗 H3 還機，因為掛住部機真係幾唔方便呢~

姑娘幫我 check 過部機 d 數據，話記錄到晒，可以拆機，真係好喇，唔駛再掛住部機~

還完機後，我就返咗公司了!~