K1 大作戰 Round 5 - 康盈中英文幼稚園

二零一四年十一月二日     星期日

 

今日一早，我哋就起身準備了，之後到差唔多時間，就叫彤彤起身飲奶。點解要咁早起身? 因為今日又要去幼稚園嘅面試，無錯星期日都要去面試!~

 

準時去到學校門口 (無錯唔駛搭車，因為係屋企樓下咋)，但未可以入去住，所以就係門口等下先~

 

 

原來今日除咗係面試日外，仲係學校嘅的開放日呀，所以學校都悉心佈置咗一番~

 

等咗 5 分鐘度，就有老師叫我哋入去等候區了，裡面有好多玩具，仲有好多木製的廚房玩具添，以一間村校來講，呢度的玩具種類同埋數量，真係算好多了~

 

大約係呢度玩咗 15 分鐘度，老師就叫晒我哋出去禮堂，小朋友要由一位家長帶領小朋友出去圍圈坐，之後再跟 NET 老師一齊唱歌跳舞~

 

NET 老師先自我介紹，之後就帶領小朋友唱了 2 隻歌，同埋跳了 2 隻舞，之後就派了一份小禮物比小朋友 (一間唔收報名費的幼稚園，仲有一份玩具派比小朋友，真係好難得)

 

 

之後就等叫名入房見老師，係單人面試來的，父母都可以陪小朋友一齊入去~

 

入到房，彤彤見到枱上面嘅玩具，已經急不及待拎來玩，我已經阻止咗佢幾次，佢都照樣想拎來玩，老師都笑笑口話佢都好心急下 wor~

 

之後老師問彤彤叫乜名，同幾多歲，不過彤彤無答老師，老師即刻話唔緊要，細 B 好多都唔識答，跟住就拎份報名表出來比彤彤睇，指住彤彤張相問彤彤知唔知係邊個，彤彤就指住自己張相係度笑，老師話係唔係你嚟呀? 彤彤望一望老師，又望一望自己張相，就係度繼續笑~

 

之後老師拎咗架積木車出來，車入面有好多唔顏色 & 形狀嘅積木，老師叫彤彤伸隻手入去拎晒 d 積木出來，彤彤即時拎 d 積木出來，老師話仲有 wor，拎埋出來啦，彤彤竟然走去"莊" 下入面，睇下係邊仲有積木先再伸手入去拎，老師話你個心急妹又幾醒 wor~

 

彤彤拎晒 d 積木出後，老師叫彤彤疊高 d 積木，彤彤都有照做，仲疊咗成 5-6 粒先跌，跌咗又再疊過，之後老師叫放返晒 d 積木入積木車入面，但彤彤無即刻放，佢係度逐粒積木拎起，之後再數下有幾多粒 (One ... Two ... Thre ... Four...)，老師話好叻 wor，識數下數，但可唔可以幫手放返 d 積木入去呢? 呢次佢就有照做~

 

老師拎咗 d 食物出來，拎住個蘋果問彤彤係乜嘢來，彤彤無出聲，之後老師叫佢拎比爸爸，彤彤無做到，我係則邊提佢拎比 Daddy (因為佢叫爸爸做 Daddy 的)，佢就即係照做喇!~

 

之後老師拎住個橙，叫彤彤比媽媽，我又係則邊提佢拎比 Mimi (佢由早幾個月前開始叫媽咪做 Mimi)，但彤彤同老師講唔好，仲擰埋頭添，老師同彤彤講，咁一係拎比 Daddy 喇，彤彤就即時拎比 Daddy，連老師都話彤彤大細超，鳴.....鳴.....鳴.....

 

之後老師問彤彤知唔知雪糕係邊個? 叫佢拎比 Mimi，彤彤無做到，之後隔咗陣，彤彤竟然將個籃入面所有食物都拎晒比我@@

 

老師見佢放晒所有嘢係我腳上，就叫彤彤執返 d 嘢落去個籃度，彤彤又跟指示放返落去個籃度，老師就問我哋平時邊個照顧彤彤，之後就話面試完畢，叫我哋出返去等~

 

臨走時，老師送了一樽魚肝油丸比彤彤，我提一提彤彤講多謝，佢都有照講，我再叫佢推返埋張櫈，佢就無理我，但彤彤就主動同老師講 Bye Bye 同埋揮手，老師仲讚佢叻叻，同埋話佢對眼真係好大好靚~

 

面完試出來後，我哋要去另一課室門外等見校長，原來校長係一位好後生的女士來的 (我估 3X - 40 頭度啦)，都係問下平時邊個照顧彤彤，同埋問我哋係唔係一早就知呢間幼稚園，我答係，因為我哋住樓上，校長聽完後就係申請表上面圈住我哋嘅地址，之後再問我細過讀邊間小學，我答了之後，校長再問第時會唔會打算比彤彤讀呢間小學，我話都會呀，校長即時係申請表上寫咗 d 嘢，之後就叫我哋返去等消息，臨走時彤彤就係校長 Say Bye Bye 添~

 

離開學校後，我同老公傾過，先唔講面試嘅表現，從校長問嘅問題同我回答嘅內容，我覺得應該會彤彤的(因為自行選小一的時間，彤彤因為我係舊校生的關係，至少都會有 20 分係手，好大機會入得到呢間小學，而呢間小學係區內嘅津校中算係最熱門嘅 1-2 間學校，但老公就話唔一定，只係大少少機會啫，不過點都好，呢間學校雖然唔係首選，但如果所以首選學校都收彤彤，而呢間學校收的話，都係唔錯嫁，我哋會 take 呢個 offer lor~