K1 大作戰 Round 2 - 德福幼稚園

二零一四年十一月一日     星期六

 

雖然今日的第一間幼稚園面試以失敗告終，但唔緊要，因為今日仲有 3 個機會比彤彤再試!~

 

由麗港城等巴士，到出到來九龍灣，足足用咗 50 分鐘，因為只係等車都等咗 25 分鐘了@@ (好彩 2 間幼稚園之間的時間都算充裕)

 

來到德福，彤彤都仲未瞓醒，我哋先叫醒彤彤，再同佢傾下計，行下花園仔先，等佢醒神返 d 先，之後就行去德福幼稚園，仲未夠鐘，所以要係室內操場坐一陣等下先，再貼上學校提供的 Label，等候入課室面試~

 

 

坐咗大約 10 分鐘，就可以入課室面試喇，先係交回問卷比老師，然後老師再講解一下面試流程，仲有就公佈結果的日期及註冊日期等等~

 

 

面試形式係 2 位小朋友一組，各自由一位家長陪同，一位老師負責面見 2 位小朋友，枱上面有不同的玩具比小朋友玩~

 

同彤彤同組的係一位小男孩，都係細 B 來的，老師先問 2 位小朋友叫什麼名字同幾多歲，但 2 位小朋友都未反應，跟住老師望一望申請表，之後話原來 2 個都係細 B ，咁唔緊要啦，我哋開始玩遊戲~

 

老師先拎咗個波波出來，推比 2 位小朋友，叫 2 位小朋友推回給老師，2 位小朋友都有做~

 

之後就到推車車，2 位小朋友都做到~

 

老師問 2 位小朋友車身的顏色，但 2 位小朋友都無回應~

 

之後老師叫小朋友放返手上果部車落個籃到，彤彤有放到，另一位小朋友就唔肯放~

 

老師叫果位小朋友比一部車車比彤彤 (佢玩緊 4-5 部車)，初初佢肯比的，後來佢 Daddy 同老師再叫多佢幾次，佢先肯細細力推咗一部車車比彤彤，彤彤接咗部車車，佢竟然主動將手上玩緊果部車比對方，猶如交換來玩一樣，老師仲讚彤彤叻叻，識得分享添~

 

之後老師拎咗 d 手抓板出來比 2 位小朋友玩，彤彤好快就倒晒 d 手抓板出來，開始想自己砌。因為佢呢排在家訓練有素，成日都玩，所以佢都好快就完成到~

 

砌砌下其間，彤彤突然想落地，我同老師都以為佢跌咗 d 手抓板落地想執返，我哋正係度左望右望都唔見有，原來佢發現地上有一粒未煮過的通心粉，仲指住比我睇，我就同老師講佢發現到地上有粒通粉想執呀，老師就執起粒通粉放在手中，叫彤彤幫佢掉佢垃圾桶，但彤彤應該唔知乜嘢係垃圾桶，所以我就指比佢睇，要放落邊度，彤彤都明白我的指示，順利掉到垃圾~

 

最後老師叫 2 位小朋友 Clean Up，彤彤初時唔肯的，仲推開 & 講唔要老師手上果個籃添~ 因為佢仲想繼續玩，但我再叫多幾次，佢就肯將自己面前果 d 車車放落老師果籃度，另一位小朋友就唔肯做，於是老師叫彤彤幫手執埋佢，但彤彤唔夠手長，即使上半身扒埋上枱上都唔夠手長，呢個時間老師有小小唔耐煩，忟忟地咁話你行過去執啦，仲講咗 3 次，我當時有少少錯愕，點解呢位老師咁嫁?! 不過我都照拖住彤彤過去枱的另一邊執埋其他車車~

 

之後老師話面試完畢，可以離開，我叫彤彤同老師講 Bye Bye，佢無講出聲，但就有揮手，之後我再叫彤彤推返埋張櫈，佢只係推咗一下，無完全推埋晒，之後就係課室周圍走，要我拖住先肯行返出課室~

 

臨出課室前，老師會派一包餅比小朋友，要小朋友講咗多謝先比拎包餅同埋離開課室，彤彤初時唔肯講的，我係佢身邊不斷提佢講多謝 /  Say Thank You，老師又忟忟地話你講咗多謝先，唔係唔比走，最後彤彤都有講咗句多謝~

 

出咗課室後，我哋會合返公公，再同公公講返彤彤的表現，我哋都認為瞓咗大半個鐘，彤彤嘅表現好返好多，希望有機會啦~

 

之後我哋就搭車回公公家食飯先，再等埋老公一齊，出席下午果 2 場面試~