K1 大作戰 Round 1 - 麗港城迦南幼稚園

二零一四年十一月一日     星期六

 

千呼萬喚，終於都來到 K1 作戰的大日子了，前前後後幫彤彤幫了 2X 間幼稚園，村校又有，誇區都有，當然唔少得名幼。

 

亦都差唔多收晒各間幼稚園的面試通知書，結果 d 面試時間撞到七彩，慶幸我補咗咁多間，叫做多 d 選擇比自己 lor~

 

彤彤尋晚好乖，12點前已經自動自覺瞓了，唔通知道有幾場大戰等住佢來應付?!

 

今朝八點半，我就叫醒彤彤，之後就一齊過公公婆婆家中，因為今朝老公要去考筆試，所以今朝早上的面試，我哋會同埋公公一齊去~

 

我哋大約 9 點就出發，搭的士去麗港城迦南幼稚園，在門外等了一陣，就可以入去了，先係排隊報到同埋交回問卷，再拎埋姓名 Label~

 

 

之後就被安排去課室玩下玩具(彤彤開始扭眼瞓，係度掉/掃嘢落地，平時佢係公公婆婆家中，日日都係 10 點度就要再瞓一教的)，再參觀校舍，同埋聽課程簡介，再出露天遊樂場聽下介紹，之後就比咗 2-3 分鐘的時間比各申請者係度玩，無錯你無睇錯，係得2-3 分鐘咋，所以好多小朋友都發晒脾氣，唔捨得走(當然彤彤都係其中一份子啦)，我覺得得咁少時間比人玩，不如唔比好過比 lor~

 

 

 

之後再入返課室聽校長講學校的歷史，再睇 15 分鐘影片介紹學校及課程編排，唔好講小朋友啦，連大人都覺得悶呀，之後就可以入課室見老師面試~

 

由報到到正式可以入去見老師面試，足足等了 45 分鐘!!!

 

今日見我哋的老師係姚老師，佢比較嚴肅同埋無乜笑容，彤彤都唔係好鍾意望佢~

 

之後姚老師見彤彤唔肯望住佢，就話彤彤好緊張 wor，你放鬆 d 先啦~ (一個 2 歲都未夠的人仔，你叫佢放鬆 d??? 佢會明嗎?) 我就同老師講佢扭緊眼瞓, 因為今朝早咗起身, 未瞓夠~

 

之後姚老師拎咗張水果圖片出來，指住隻香蕉問彤彤係乜? 又指住個蘋果問彤彤係乜? 彤彤只想拎張圖片來玩，完全無理過老師@@

 

之後姚老師拎咗一舊紅色的 Lego，一枝白色的匙，同埋一個藍色的膠碗出來，問彤彤舊 Lego 乜嘢顏色，彤彤無理佢，只係拎住隻碗係度玩，姚老師再問彤彤隻碗乜嘢色，佢就指住老師件衫，我幫口話彤彤話同你件衫一樣顏色~

 

再問彤彤，食嘢要用乜來食，彤彤都有拎住個碗同埋匙，但就唔肯放隻匙落個碗度~

 

姚老師再拎咗個手偶公仔出來，叫彤彤同公仔 shake hand，彤彤係咁二拍咗一下個公仔~

 

之後老師彤彤拎個牙刷幫個公仔刷牙，彤彤只係拎住枝牙刷係度左望右望，無幫個公仔刷，跟住姚老師話個面試完畢，叫我哋返去等消息，唉唔駛等都知衰了~

 

臨走時，姚老師叫彤彤同佢 say goodbye，彤彤有照做，係咁揮手拜拜，但就唔肯推返埋張櫈~

 

面完試後，出返去會合返公公，我話公公知彤彤扭眼瞓唔合作，公公都話佢曳曳，但公公始終都好鍚彤彤，即時話抱佢瞓教，我哋行去巴士總站搭車，彤彤已經瞓著咗，睇來佢真係好眼瞓，只可以講佢同迦南無緣啦 (呢間係我心儀的學校之一，真可惜)