Ocean Park (20140601)

二零一四年六月一日     星期日

 

今日諗來諗去都唔知去邊好，所以就決定入海洋公園玩下，因為都成 2 個月無入過去喇!~

 

但今日我哋唔打算咁早入去，因為太陽伯伯實在太勤力了，咁早入去實曬到變黑炭頭，所以我哋下午 4 點後先入場，一來可以避開 d B6 團，二來又無咁曬嘛~

 

點知係金鐘遇著遊行，塞咗一輪車，入到去差唔多5:30PM 呀，不過仲好，無咁曬；但係人一樣係咁多，連海洋館都打晒蛇餅，所以我哋就去睇咗其他嘢先~

 

雖然係咁晏先入到來，但同樣地係好熱的，所以我哋坐海洋列車上山後，就先去探下 d 企鵝同埋海象先，順便涼下冷氣嘛~

 

彤彤都熱到呆呆地咁~

 

 

 

行到 6:30PM 度，我哋又搭返海洋列車落山，諗住入去海洋館啦，點知仍然係咁多人，所以我哋就帶彤彤去兒童遊樂場果邊玩下先~

 

 

 

 

 

 

 

 

 

 

 

 

 

玩咗大半個鐘，見彤彤都熱到成頭汗，所以我哋就帶佢去洗下面抹下身先，再去禮品廊涼下冷氣先~

 

 

 

諗住出返外面等睇「雙龍出海」，點知見海洋館無人排隊，又未夠鐘睇「雙龍出海」， 咁梗係睇咗海洋館先啦~

 

 

睇完海洋館出來，岩岩好夠鐘睇「雙龍出海」， 但點知彤彤有少少驚果 d 爆炸聲，所以我哋就唔睇，即時離開~