意外受傷.....

二零一四年六月十一日     星期三

 

今晚同公公婆婆食飯後回家，原先想執一執個櫃入面 d 物品的擺位，點知唔小心撞咗埋櫃角，撞正左眼眼肚位置，由於向前仆的關係，所以係由撞到果個位向上衝，岩岩去到鼻樑果邊的眼角，所受嘅傷猶如隻眼比人打了一拳一樣~

 

撞到後，老公望一望，見到我眼肚果個位有少少損咗，同埋瘀咗一撻，仲有就係我隻左眼係咁流眼水，但我明明無撞到隻眼嫁 wor? 真係奇怪!!

 

老公二話不說就話去法國醫院睇夜診，所以執咗彤彤小小出街用的物品，就苟樓搭的士去法國醫院了~

 

登記後，姑娘先幫我洗傷口，同埋幫我加了一塊紗布係左眼遮住 d 光線，應該唔會流眼水流得咁勁~

 

之後就去探熱 & 量血壓，點知血壓好高呀(17x/11x)，可能係痛嘅關係吧~

 

今晚好多人睇夜診，又只得一位醫生應診，所以有排等，因為仲有 22 個先到我，好彩等等下又多一個醫生返咗來應診，所以大約等了一個鐘就到我了~

 

今次又係鍾醫生，之前彤彤都睇過佢，佢都算幾細心嫁~

 

咁我就同醫生講返意外發生的經過，之後佢就幫我檢查下隻眼，佢話應該無傷到隻眼，可能係撞到的時間，有污濁嘢入咗眼，令眼睛受到刺激而發炎，一陣叫姑娘幫我用生理鹽水沖下隻眼，回家就滴眼藥水，應該 5 日內就會無事，佢亦寫定封醫生信比我，如果隻眼滴了藥水都無好轉，或又紅又腫，就要去睇眼科，同埋呢幾日唔好望太光的嘢，唔好見陽光，所以我要請假在家休息了~

 

出返醫生房，就去治療室比姑娘幫我用生理鹽水沖下隻眼，沖的的過程中，隻眼好舒服呀，沖完後又有返少少拮住的感覺，同埋又係咁流眼水~

 

之後就去拎藥，埋單 $507，只得一枝眼藥水，唔駛食藥，之後就搭的士回家~