N 班面試初體驗 @ 德福幼兒園

二零一三年十一月十六日     星期六

 

由於彤彤係細 B 嘅關係 (即係 8 月 31 日之後先出世)，所以即使我哋同佢報咗 8 間幼兒園，但一直都未有消息 / 通知面試嘅日期，直到十月尾收到一封信，叫彤彤去面試，我哋不知幾開心，但同時亦都有 d 擔心，因為彤彤一來係細 B，二來佢好似仲係乜都唔識咁，就算有得 in 都應該唔會收~

 

不過都唔諗得咁多，我哋先同彤彤扮靚靚，再係入學校前餵佢飲奶，等佢唔會扭計，希望佢可以比老師一個好嘅印象~

 

今日約咗 3:30PM 去面試，面試時仲要交埋份「認識你的孩子」問卷，呢份問卷我在家填寫時，都用咗一 d 時間去填，希望可以幫到彤彤加分啦~

 

我哋大約3:15PM 就到達，要係課室門外等侯，同埋只可以得一位家長陪同面試，所以就由我去陪彤彤入去面試~

 

 

準時3:30PM，就有老師叫我哋入去課室，課室內唔可以影相，入面有 3 張放滿玩具嘅枱，牆邊亦有唔同嘅大型玩具同圖書閣，課室內有 3 位老師，每位老師負責見 2-3 位小朋友~

 

今日面試的形式係 group interview，老師會同小朋友玩下玩具，同時亦會問家長問題~

 

我哋入到課室，要先自選一張枱坐下，我當時好快咁望一望每張枱有 d 乜，一張係放圈圈玩具，呢張一定唔揀，因為彤彤唔識放圈圈，而且佢最鍾意丟圈圈落地; 另一張係積木同埋串珠，呢張都係唔會揀，雖然彤彤都幾鍾意玩串珠，但呢樣嘢無乜嘢可以表現到比老師睇，至於積木，彤彤係又唔識疊高，而且又會丟 d 積木落地; 至於第三張枱，上面有好多車仔，雖然彤彤未玩過，但見到新玩具，佢應該會好開心，同埋會表現得好好奇，所以就決定揀呢張枱坐下~

 

老師先同我哋張枱嘅另一位小朋友及家長傾計，之後先到我哋~

 

老師先問我平時點叫彤彤，之後就對住彤彤講「彤彤」，彤彤好識做即時望住老師，仲擺出一個好開心的笑容比老師睇~ 

 

今日老師叫咗幾次彤彤，佢次次都有反應，次次都即時望住老師笑，連老師叫另一個彤彤，佢都照回應~ (平時我點叫佢，佢都唔理我，估唔到佢識應老師?!)

 

老師問下彤彤識行未，又問下佢識唔識玩車車，我同老師講，佢未玩過車車的，根住老師話唔緊要，我哋玩另一樣嘢~

 

之後老師拎咗個洋娃娃公仔出來，老師先指一指眼睛，話呢個係眼睛，叫彤彤指一次眼睛比佢睇，彤彤竟然即刻指到；之後老師再同時用2隻手指，指一指鼻同口，話呢個係鼻，再問彤彤邊個係鼻，彤彤竟然指得岩。我覺得佢撞彩居多，因為我從來無教過佢眼耳口鼻的，但平時彤彤同我一齊瞓時，好鍾意篤我的眼耳口鼻，唔知係唔係因為咁，佢見到個洋娃娃公仔就想篤下佢~

 

老師叫我哋周圍玩下，佢要同另一位小朋友傾下計先，但我估佢有暗中留意彤彤的表現的~

 

我哋繼續係度玩下車仔，點知彤彤丟咗架仔落地，我已經幫佢報了2次，第3 次比老師見到，老師行埋來話唔緊要，自己過去執返，我就扶彤彤行過去，等佢自己執，點知佢執起咗，但手仔唔夠力，又跌返落地，我見老師見唔到，即時幫佢執返上枱~

 

之後我哋過了另一張枱玩串珠，果然不出我所料，彤彤真係幾鍾意玩串珠，原先係坐係椅子上玩的，但因為唔係好夠手長，玩玩下佢自己企咗係椅子上玩，仲玩得好開心~

 

之後彤彤見地上有 d 書，佢想落地玩，平時係家中，佢見到 d 書，唔係拎來睇，而係拎上手撕爛的，但今日出奇地，佢拎住本書睇@@

 

睇咗一陣書，有另一位老師叫另一位小朋友 clean up 地上嘅書，彤彤竟然有意慾做埋一份，但因為手仔控制力唔夠好，放低本書時，放唔到入個籃度~

 

之後彤彤又爬返過去玩串珠果張枱，老師又行埋來，比咗包餅比彤彤，叫佢比返媽媽，佢竟然真係比咗我，果刻我好surprise，因為平時佢只係鍾意拎嘢來玩，唔會肯比嘢人，我教咗佢好多次，都做唔到一次，估唔到佢今日做到?!

 

比完包餅比我，老師同彤彤講 byebye，彤彤當然係唔識回應啦，佢只係對老師笑笑口咁，之後我哋就離開課室，全個面試只係得 10 分鐘，結果會係 12 月 23 日前寄信通知~

 

我覺得佢今日做到果幾樣嘢，都係撞手神多，應該唔係真係識，但有今日咁嘅表現，我哋已經好滿意了~ 

荷里活 X 體驗夢工場 - 冬日冰之巡禮

二零一三年十一月十五日     星期五

 

又到咗 Happy Firday，今晚返工後，返去我父母家接彤彤，之後就過咗去荷里活廣場行街食飯~

 

我哋先去影下商場嘅聖誕佈置先，呢個商場有荒失失奇兵嘅一班主角影~

 

 

 

 

 

 

 

 

 

 

 

 

影完相，我哋就去食飯，今次揀咗食越南嘢，但呢間嘢麻麻地好食，食飽後就去行咗一陣街，就回家了~

 

返健康院做評估 & 打針 + Megabox 夢幻旋轉聖誕城

二零一三年十一月十二日     星期二

 

今日帶彤彤返健康院打針，同時做埋一歲嘅評估，我哋今日拎 3 號籌，先去磅重，點知一上磅，彤彤就 "look" 返落姑娘張枱，想攪姑娘枱面 d 紙，姑娘見佢咁活躍，就話唔駛佢瞓係度磅，坐係度磅就得了，同時姑娘手上拎住個玩具引彤彤，等佢可以坐定定少少。

 

彤彤比上星期輕了差不多半磅，可能係病咗幾日嘅關係，而家得返 9.03 KG, 根住聽到另一位媽咪問姑娘可唔可以幫佢個 B 度下身高，姑娘話見而家人唔係好多，就幫佢度下啦，於是我都問埋姑娘，但姑娘叫我自己度，咁我就同我爸合力幫彤彤度下身高，原來彤彤已經有 76cm 喇，都算係高妹一名!~

之後就出返大堂等，點知等咗成半個鐘都未到，彤彤都等得有 d 唔耐煩~

 

 

 

 

 

 

大約 2 點半就叫彤彤個名入房比姑娘評估，姑娘話彤彤手指仔唔夠靈活(因為唔識自己拎星星餅食)，18個月時要再評估多次。仲有就係彤彤仲未識唔扶住嘢企，姑娘話佢對腳仔仲未夠力，平時在家要放 d 玩具係椅上，吸引彤彤企多 d 起身玩椅子上的玩具~

之後姑娘問彤彤平時玩乜玩具多，姑娘聽完後，竟然叫我要買埋電話、車仔同埋粒粒積木，話呢幾樣嘢可以令彤彤手指仔靈活 d，所以晚上帶埋彤彤去接老公放工，順便去玩具反斗城買~

之後就出返大堂，等叫名打針，大約過多 5 分鐘就到彤彤去打針，今日只係打 13 價肺炎鏈球菌針，因為我哋係 Kenetics upgrade 咗枝水豆針做四豆針，等彤彤可以打少一針~

姑娘拮枝針入彤彤大脾時，佢登咗一登對眼，之後開始打 d 藥水入去，佢就喊了一聲，之後竟然係度依依哦哦罵個姑娘，真係攪笑~

打完針，拎埋退燒水，就回我父母家，等到6 點再出去接老公放工~

出到 Megabox，我哋先去食飯，然後就去影下相，再去玩具反斗城買埋嘢就回家~

 

 

 

 

 

 

 

 

 

 

 

彤彤一歲生日 & 春田花花幼稚園 @ CityWalk

二零一三年十一月十日     星期日

 

今日係彤彤嘅一歲生日，原先諗住帶彤彤去睇大彿同埋行大澳的，點知今朝晏咗起床，所以唯有改行情~

 

老公提議行荃灣，順便去買下嘢，又可以去影下相，所以我哋就去荃灣~

 

出發前，我哋先放低彤彤係我父母家，然後就去美心買 Kitty  蛋糕比彤彤(因為驚出完街返來會賣晒)，留返晚上同公公婆婆一齊切蛋糕慶祝，再換購埋個 Kitty 袋比我自己，he he.....

 

 

買完蛋糕就返我父母家，返咗個蛋糕入雪櫃，再同彤彤一齊出街~

 

先去大窩口 Aeon 行下街先，再係熊貓酒店影下相~

 

 

 

 

之後就行過去 CityWalk，影下春田花花幼稚園先~

 

 

 

 

 

 

 

 

 

之後就去食 tea，彤彤見我哋食蛋糕，仲不斷大叫我哋比佢食添，正一為食豬~

 

 

 

 

 

 

食埋 tea，再行多陣街就返去我父母家，一切同彤彤切蛋糕慶祝~

 

彤彤，你一歲生日喇!~ Daddy & Mami 祝你身體健康、快高長大、聰明伶俐、聽教聽話、天天開心快樂!~

 

 

 

彤彤呢隻為食豬，見我哋食蛋糕，當然係會要求食埋一份啦，佢仲食咗好多添~

 

 

 

 

 

 

 

 

晚上，我哋一家三口，會同公公婆婆、爺爺麻麻，仲有姑姐姑丈，仲有表哥仔一齊出去食飯慶祝，見未夠鐘出去食飯，又埋彤彤玩下架 iimo 先，睇下佢笑得幾開心~

 

 

 

 

 

 

 

 

 

 

 

玩咗 15 分鐘度，就夠鐘出去食飯，今晚好開心，大家都一齊出席，食咗好多嘢，又傾咗好耐計，多謝大家賞面光臨~

 

 

 

 

 

 

 

 

 

 

 

 

 

姑姐仲送咗個 Kitty 背囊比彤彤，彤彤不知幾開心，多謝晒!~