Playgroup @ Juxt Abxxt Kids Lexxning Cextxe

二零一三年九月廿一日     星期六

 

食完 Buffet，我哋就帶彤彤過灣仔返 Playgroup，今次係經團購買的，$299 有 4 堂，仲可以揀星期六返。

 

見到都幾低下，所以問下姑仔會唔會一齊報，因為佢囝囝而家 17 個月，可以同彤彤同一班一齊上 (10-18 個月)~

 

我哋 3:30pm 就上到去，一入門口已經覺得好細，Reception 位只夠 2 - 3 個人企，waiting area 又係好細，仲要分咗一部份來做 playground，比 d 小朋友 warm-up 下先上堂，所以我哋都比彤彤入去玩咗陣~

 

 

 

 

到咗 3:45pm 可以入課室了，地方一樣唔太大，有 6 位小朋友及其家長一齊上堂，仲有 2 位老師，真係有點迫~

 

由於上堂時唔比影相，所以我就以文字描述返上堂過程~

 

入班房時，每位小朋友都會派一件樂器，之後開始上堂就唱 Hello Songs 先，之後就一邊唱 Clean up song，一邊收返 d 樂器，有 2 位小朋友唔肯仲係喊。其實我覺得唔應該一唱完一隻歌就收，一係就唔好派比 d 小朋友玩，而家玩得唔三唔四，好易整喊 d 小朋友 lor!~

 

之後就拎隻公仔出來，叫小朋友介紹自己，要小朋友同個公仔握手，仲拎個公仔埋來 kiss 小朋友一下，同埋逐一派發阿牌，但我覺得個公仔有點污穢 lor ，仲要 kiss 小朋友，唔多衛生 lor!~

 

跟住就要小朋友幫一隻 bear bear 著衫，同埋介紹一年四季，仲有唔同天氣情況，但呢 d 字對一個 10-18 個月大嘅小朋友，真係太深 lor，佢哋根本唔會明你講緊乜~

 

然後就拎咗 d 樹葉出來比小朋友玩，又係好 dirty lor，我唔明比小朋友玩機葉可以學到 d 乜?!

 

最後就係 tidy up 時間，同埋老師會吹 d 波波出來，比小朋友嘗試去摸/捉 d 波波，呢 part 我覺得幾好，可以訓練下小朋友嘅手指仔嘅靈活度~

 

仲有一樣嘢就係，如果有小朋友上堂時扭計/拎走 d 教具，老師們係會阻止的，或會叫家長抱走個小朋友，咁做好似唔係咁好，好似好驚個小朋友阻住佢哋進度咁，但我哋返 Kiddo Zone 時，老師係唔會咁做的，仲會氹個小朋友的~

 

 一個鐘嘅上課時間，就係學咗咁多嘢，我明白呢個價錢，唔可以要求咁多，但如果你問我上完呢 4 堂之後，會唔會比彤彤再返呢間 Playgroup，我一定會話 No No No!~

 

同埋仲有一樣嘢，就係呢間 d 家長，唔似 Kiddo Zone 果邊 d 家長咁，明顯覺得 Kiddo Zone 果邊 d 家長應該英文水準好好多，而且係真係有心想自己小朋友成材的；呢邊 d 家長，好似唔似返過 Playgroup ，好少同小朋友同老師一齊亙動咁~