4th class @ J.A.K.L.C

二零一三年十月十二日     星期六

 

之前買嘅團購 Playgroup，今日來到最後一堂了，我哋應該唔會繼續係度讀，下星期開始又會返去 Kiddo Zone 果邊上 4 堂，再睇下之後點，可能再搵下有無另一間比較下，亦都有可能繼續係 Kiddo Zone 上，因為我哋覺得果邊幾好~

 

 來到最後一堂，今日表哥仔無來，因為佢上午要去 interview N 班，所以今日得彤彤一個人上堂~

 

今堂係 4 堂裡面最好嘅一堂，都係唱下歌，玩下 Flashcard，將 d 唔同顏色嘅積木分類，同埋玩彩虹傘，玩呢 d 嘢，起碼係適合返個年齡先，唔會太深嘛~

 

今日彤彤表現得好好呀，老師問佢嘢，佢好似識答咁，係度哝哝哦哦咁回應；玩彩虹傘時，佢又第一個爬出去彩虹傘底，一 d 都唔驚，其他有幾個同學仔，老師拎彩虹傘出來咋，就已經驚到喊，都唔好話叫佢哋爬入去玩，ha ha.....

 

到咗唱 Bye Bye Song，又係玩泡泡時間，彤彤第一次識得 Open & Close 咁去捉 d 泡泡，估唔到佢上咗 4 堂就學識，Amazing!~

 

同彤彤返完 Playgroup，我哋又要趕返去荃灣，因為我麻麻入咗醫院，所以約咗我父母一齊去探下佢，老公就負責睇彤彤 (因為佢太細，唔想比佢係醫院附近出現)，佢哋係 Aeon 周圍行下先~

 

探完病，我哋就同我父母一齊食飯，去咗裕滿人家食，嘢食幾好味，又唔算太貴~

 

等上菜時，彤彤要飲奶奶，原先諗住佢自己拎住來飲，點知佢見公公係隔離，要公公幫佢拎，唔肯自己拎(因為平時公公餵佢飲奶係會幫佢拎住的)，仲一路拍晒手掌添~

 

 

 

我哋叫咗個 4 人餐，再加多個菜同埋燒腩仔，埋單 $420，都算幾低食~