停不了的生日慶祝 - 昂坪 360 + 昂坪市集

二零一五年九月廿六日      星期六


九月份嘅慶祝活動真係一浪接一浪，因為我同老公都係呢個月份生日，而且仲有我哋嘅拍拖紀念日添~


話說，老公係 19/9 果日生日的，果日我哋去了山頂同埋黃金海岸食 Buffet，上網睇返，原來果日昂坪360 做例檢，所以當日生日嘅人，可以係同月份內，任揀一日享用生日免費優惠，作為一個精打細算嘅 C9，我當然唔會浪費咗個優惠啦，所以我哋揀咗今日去搭 NP360~


我哋大約12:15 去到東涌，估唔到時間咁早，就已經好多人排隊搭 NP360，我哋排咗成 45 分鐘先買到飛，真係好誇張~


由於老公有生日免費優惠，而我就上網訂閱咗 NP360 嘅電子報，所以有 9 折優惠，而彤彤未夠 3 歲唔駛買飛，所以我哋就買咗一張單程飛 (因為驚落返山時太多人，要排好耐)，就 3 個人一齊搭 NP 360~








今次係彤彤第一次搭 NP360，佢好期待呢，不斷話彤彤搭纜車，ha ha.....















坐上 NP360，彤彤好開心，不斷係度講見到乜嘢，又係度笑，同車嘅其他旅客都比佢攪度係度笑埋一份，ha ha.....








































我哋上到嚟山上面，太陽伯伯好努力地工作，我哋直情好似曬到燶咗咁，但原來九龍果邊超級大雨，仲出埋雷爆同埋黃雨添~


由於真係太曬喇，只係影咗一陣相，就頂唔住，老公話要入去室內 hea 下先，所以就去了 Subway 食咗少少嘢，再 hea 返陣先出嚟慢慢行~




























食飽出返嚟，好似無咁曬，有少少黑雲，同埋聽到有 d 行雷聲，但個天又好光嫁 wor (果時我哋唔知黃雨中)~








彤彤一見到呢張畫，就要我同佢影相，見到前一個人一路影一路跳，到佢影時，佢又一路影一路跳~
































行行下，又見到另一幅畫，彤彤又要求我幫佢影相，仲識得走埋去扮拎住個手環，再擺埋 pose 比我影相~












唔知點解，彤彤唔鍾意呢張招財貓，叫佢一齊影相，仲好似喊晒口咁添~






之後我哋行去大佛果邊，彤彤仲近距離咁見到好多隻牛牛添~












彤彤唔驚 d 牛不特止，仲主動要求自己同 d 牛牛影合照~












原先想行埋上去大佛度的，但岩岩知道黃雨，又見個天開始黑，所以就係大佛山腳位置影幾張相就行返去搭巴士~




















臨去搭巴士前，老公突然話想食豆腐花 (貴得嚟又細又唔好味)，所以就快手食埋先去搭巴士~






之後我哋返到東涌，就係 outlet 行一陣，就去了 Chickeeduck 買咗幾件衫比彤彤添 (做緊全場 2 折)，之後就再搭車回家，好彩一路返到屋企，都無落過雨~