彤彤嘅玩具

其實玩具呢方面，我同老公嘅諗法有少少分歧，老公就覺得彤彤都仲咁細過，唔駛買玩具比佢玩住，但我就覺得應該要買比彤彤玩，可以幫助佢腦部發展嘅玩具，既然老公唔想，我唯有自己出錢買 lor, ha ha.....

呢隻獅子仔係彤彤摰愛，每次扭計/喊時，見到呢隻公仔，就會即時收聲，仲會對住佢笑添，呢隻公仔幫到唔少忙嫁!~

Vtech 音樂波波，我係彤彤 3個月大時買比佢玩，當時佢未識坐，瞓係度又玩唔到，所以佢自己諗到用腳去踢個波波，咁咪會有音樂 lor。到彤彤 5 個月大時，已經識用手去拍 d 公仔，令到個波波有音樂出。而家個波波放咗係公公婆婆家，等彤彤日間嘅時候有得玩~

呢部 Vtech 車仔，係彤彤 5 個月大時，我用 HSBC 嘅獎賞錢換購的，可以變身成搖搖馬，又可以當學行車坐，仲可以拆個駄盤出來玩，彤彤又係勁 Like 呢個玩具，坐係 high chair 上，一定要玩呢個玩具，唔係會扭計嫁~ 而家呢個玩具放咗係公公婆婆家，等彤彤日間嘅時候有得玩~

呢部係 Vtech 嘅學行手推車，由於彤彤仲未識企，所以仲未用得住，不過我哋拆咗個面板出來比彤彤玩，晚晚彤彤臨瞓前都要玩嫁~

呢個係上次 Aeon BB Fair 時買的，因為有 9折再兩個 95 折，所以就買比彤彤玩，但玩咗成 2 個星期，彤彤都仲未知點樣玩，只係識將頭 2 個圈圈拎出來咋~

呢個係上次 Aeon BB Fair 時買的，因為有 85折再 9 折，見咁底就買咗先，等彤彤大過少少先拎出來比佢玩~