幼稚園開放日參觀 + 6th Lesson @ Bizzi Kids

二零一四年十月十八日      星期六

 

早排幫彤彤報了 20 間幼稚園，近呢 2 個星期開始收到面試通知書，點知 1/11 同 8/11 呢 2 日的面試時間撞到七彩，暫時分別收到 7 間同埋 5 間幼稚園係呢 2 日面試，有部份仲要撞埋時間添，所以暫時呢 2 日，預計只能分別出席 4 間同埋 3 間的面試，真係好煩惱呢~

 

除了面試通知書外，早幾日收到一間幼稚園的開放日邀請信，呢間幼稚園係屋企附近，所以今日係返 Playgroup 前，就行去睇下參觀下先~

 

唔知係唔係彤彤知道有得去玩，今日心情好靚呀，出門口等 lift 時，仲不停同我 Say Hello 添!~

 

 

 

 

行到去幼稚園門外，已經見到有好多人了，校長仲親身出來同參觀的家長握手添~

 

入到幼稚園後，小朋友可以先揀一份禮物，彤彤揀咗一盒顏色筆，之後就可以自由活動，四圍參觀睇下咁，彤彤就可以係 Playground 度同其他小朋友一齊玩~

 

 

 

 

 

 

 

 

 

 

 

 

 

 

好留心睇緊哥哥點樣玩呀~

 

 

 

 

參觀後感：地方比較細，活動空間不足，而且呢間幼稚園學術方便唔係好強，唔會係我的心水學校之一，所以如果面試時間無同其他學校撞的話，都會出席面試，但如果撞期就會放棄呢間~

 

參觀完後，我哋就搭港鐵去荃灣返 Playgroup~

 

今日早咗 10 分鐘到達，因為未夠鐘，所以唔可以入課室住，要係 Sofa 等一陣先比入去~

 

準時 1:30PM 就可以入去，但今日唔係 Miss Shona 帶上堂，唔知佢係放假定係無做呢? 今日由 Miss Kennis 來帶上堂，佢比較文靜同埋有少少拘謹~

 

10 分鐘的 warm-up time 完咗之後就正式上堂喇!~ Ms Kennis 同小朋友一齊唱 Good Afternoon Song, Hello Hello Song, Days of the Week, How's the weather, Shake Shake Shake, Driving Song, Old McDonald have a Farm, ABC Song 等，之後 Ms Kennis 就拎咗 d ABC 豆袋出來，教小朋友認識英文字母，然後又拎咗 d 動物 Flash Card 出來，教小朋友一齊數下有幾多個，同埋教小朋友認識唔同的動物及叫聲，之後一齊做 Art Work，叫小朋友整一隻豬出來，仲要小朋友為豬仔油上顏色~

 

 

去到尾聲，Ms Kennis 就帶領小朋友們唱 Bye Bye Song，同埋吹 d Bubble 比小朋友玩~

 

上完堂之後，我哋就返咗去油塘果邊，去 Euro Go Go 食個 Tea 先~

 

 

 

之後就帶彤彤上商場的露天公園玩下，再行咗一陣商場，之後就回家了~