半夜發高燒

二零一四年十二月廿一日     星期日

 

尋晚成晚都瞓得唔好，因為半夜時彤彤發高燒唔舒服，但佢好叻叻，知道唔道唔舒服，係咁叫醒我，我比佢整醒時，發覺佢隻手仔好燙，所以就同佢探下熱，點知燒到 38.9 度~

 

我即時搵退燒藥比佢食，之後佢好快就瞓返，但我就瞓唔著，耐唔時就幫彤彤探下熱，睇下佢退返 d 燒未~

 

我仲係 5 點幾時打電話去法國醫院 24 小時門診問有無兒科醫生睇，姑娘話要等到早上 10 點先有，叫我 8:30 AM 過去排定隊等，因為只得 walk-in 位，無得 book 定~

 

所以我哋就一早起床，8:45AM 就去到法國醫院門診部，但兒科未有醫生返，唔可以登住，要等到 9:30AM 先開始登記，所以老公就抱住彤彤坐係 sofa 等，而我就企係度排隊~

 

準備 9:30AM 就開始登記，但姑娘話醫生要 11 點先返，要等耐少少，但我哋係就係第一位 (原先諗住睇蔡醫生的，但姑娘話要排 1X 個，如果想快就等另一位好 d)，所以就揀胡醫生啦~

 

登記完後，我哋就去醫生房門外嘅 sofa 坐住等，彤彤都好攰，又無乜精神咁，但佢又瞓唔著，我唯有抱住佢啦~

 

 

 

等咗 15 分鐘之後，突然登記處有姑娘叫彤彤個名，我哋就去問下乜事啦~

 

原來蔡醫生提早返咗嚟，姑娘幫我哋轉隊(排第 8 個)，話應該快過等胡醫生 11 點返嚟先睇~

 

果然好快就到我哋，因為排我哋前面果 d，諗住蔡醫生 11 點先返嚟，所以出咗去食早餐，而我哋就無出去，留返係度等，所以我哋只係等咗 1 個人就可以入去見醫生~

 

蔡醫生話彤彤有少少感冒，同埋開始有少少鼻水倒流，佢估計聽日就會開始咳 (事實上佢估早了一日，彤彤星期二先開始咳)，佢會開定 d 止咳化啖藥比我哋，之後就可以離開~

 

等拎藥時，彤彤已經超眼瞓，好快就瞓咗，而我哋拎完藥就搭的士返屋企了~

 

 

食咗藥，休息咗一日，彤彤精神返好多，晚上仲同我一齊玩釣魚添~