Sharon, Victor and Tung Tung 幸福之家: 6月 2015

2015年6月26日星期五

二零一五年六月廿三日星期二

之前見彤彤油顏色時，好似唔係好控制到自己嘅力度，成日都畫出界，驚佢 9 月升上 K1 時，要開始做連線練習，到時會做得唔好，所以就想比佢去學下畫畫 (因為佢都幾鍾意油顏色，只係未識控制力度)~

咁岩我父母家樓下嘅商場，有一間教小朋友學畫畫嘅畫室，所以就幫彤彤報咗 2 堂，等佢試下睇下鍾唔鍾意學先~

今晚係上第一堂，我哋早咗 10 分鐘到達，由於上一班未落堂，所以我哋要係門口等一陣先~

夠鐘就有老師出嚟帶彤彤入課室，彤彤仲拖住老師手入去添，由於我唔可以入去課室，我就係課室門口同彤彤 Say Bye Bye，佢仲笑住同我揮手添~

之後我就返去公公婆婆家先，等夠鐘先落去接返彤彤，估唔到彤彤第一幅畫又幾 ok wor~ (不過我估老師應該幫咗佢唔少)

接彤彤時，老師同我講，彤彤唔怕生保，又肯聽佢講嘅跟住做，以佢年齡嚟講，算唔錯了~ (希望係真啦~)

2015年6月25日星期四

二零一五年六月廿一日星期日

今日係父親節，祝各位父親都有個快樂嘅父親節!~

由於晚上要同老爺奶奶食 Buffet，所以今日唔可以去太遠，見天色又麻麻，所以都係去 d 港鐵沿線嘅商場好 d~

我哋揀咗去鑽石山荷里活廣場，順便可以去食埋上次試過幾好食果間日式餐廳，今日好多人等位呀，我哋等咗成 40 分鐘先有位呀~

但唔知係唔係出名咗，人多咗去食，連成名作 - 繽都缺貨，仲要加價加成 $1x 一個餐，食品嘅水準都有小小下降，短期內應該都唔會再去食 lor~

食飽飽後，我哋就行下街先，之後就搭返港鐵去 Popcorn 再下街，到差唔多夠鐘就去 Popcorn 內果間假日智選酒店，同老爺奶奶佢哋會合~

由於仲有 10 分鐘先夠 6 點，所以仲未可以入場住，就係大堂嘅 Sofa 坐下先，而彤彤一見到爺爺嫲嫲，就好識做地行埋去，仲坐係爺爺隔離添~

之後彤彤有小小唔耐煩，我就帶佢係大堂行下影下相先~

夠 6 點就可以入場喇，開餐前先影返張相先~

海鮮有開邊龍蝦，長腳蟹、扇貝、青口、凍蝦、東風螺等等，但就無生蠔 (唔緊要，因為我都唔食嘅)，低熱薰同埋甜品就麻麻了，所以我主力食海鮮~

由於今日係父親節，每位送了一碗鮑魚燉湯 (但小朋友無得送 lor)，另外，每位包一杯無酒精飲品，以一位 $498 (未計加一)，其實我覺得唔太低~

原先我哋可以由 6 點食到 9 點半的，但因為老爺想早點回家睇武媚娘，所以我哋 8 點 3 就離開了，臨走前係酒店大堂再影返張相先，之後就各自回家~

點知我哋去到油塘，諗住轉小巴回家，竟然排長龍，起碼要等 7-8 架先上到，所以就行返去的士站等車，我哋排第三架，諗住好快上到車啦，點知等咗好耐都無車駛入嚟，仲要離遠見到有車駛緊過嚟，排我哋後面果 2 個人，竟然跑出路口截咗部車，我哋同其他排隊嘅人睇到都 O 晒嘴，真係無品!!!

結果，要再等多 20 分鐘先有車，期間仲落埋雨添，真係激 c 人~

2015年6月23日星期二

2015 夏水禮之端午節游龍舟水

二零一五年六月廿日星期六

今日係端午節，一早起床已經見到好好太陽，天氣咁熱，真係邊度都唔想去呀~

但放假無理由唔去街嫁，所以就一於去游龍舟水啦~

今年都係第一次去游水咋，係屋企同彤彤換好晒泳衣，彤彤已經不斷叫我哋快 d 出門，但媽咪梗係要同你影下相先得啦~

由於彤彤太心急想去玩水，好難先同佢影到幾張似樣小小的相，所以影完就同佢出發去游水喇~

等 lift 時，彤彤又肯企定定比我影 wor ，當然又同佢影返幾張相先啦~

去到泳池，見到呢張璧畫幾靚，就問彤彤影唔影呀? 估唔到佢又肯行埋去比我影 wor~

我哋由 1:30pm 玩到 2:50pm ，都玩到有小小攰，可能今次無帶水泡去，只係著咗呢件浮衣，彤彤有小小驚，初頭唔肯落水 (其實好淺水的，佢對腳都可以掂到地下)，話要坐係泳池邊玩就算，後嚟我哋多番鼓勵，佢先肯落水玩，仲玩到唔捨得走添~

游完水，我哋就回家放低 d 濕晒的游水用品先，之後就休息一陣，又再搭車去將軍澳行下街先，而彤彤好快就瞓著咗，可能游(玩)完水太攰吧~

係新都城行街，估唔到比我搵到呢對今年大熱嘅拖鞋，有我想買嘅紫色，又有我著果個碼，仲要剩返最後一對，梗係即時買咗先啦~ (之前搵咗好多都搵唔到，好多碼都斷晒，有部份分店仲全個系列都沽清添)

之後再行埋 GAP，原來做緊減價，所以又買咗幾件衫比彤彤，仲要好低下添~ (左邊 $48，右邊果 2 件各 $28 一件)

之後我哋就行去搭小巴，返老爺奶奶家食飯做節，彤彤仲未瞓醒，只係我係 BB 車抱佢出嚟時望咗一望又瞓過~

去到老爺奶奶家，彤彤都仲瞓緊，叫極都唔願起身，結果我哋食晒飯，佢都仲未瞓醒，我哋係咁叫佢先起身食飯，個樣仲要係好攰未瞓醒果隻，但佢已經瞓咗超過 4 個鐘，真係好誇張 lor~

Father Day's Gift

二零一五年六月十九日星期五

今日彤彤放學返嚟，手上多咗樣嘢，原來係學校嘅老師，教小朋友做咗份禮物嚟送比爸爸，作為父親節禮物~

老公返嚟見到彤彤拎住份禮物送比佢，彤彤仲話：「我自己做嫁」，不知幾開心~

2015年6月22日星期一

我愛 Ice-cream!~

二零一五年六月十四日星期日

今日天氣好熱呀，太陽伯伯好勤力開工做嘢~

天氣雖然熱，但我突然好想食火鍋放題，所以就搭車去了黃埔，食牛涮鍋~

因為彤彤仲未夠 90cm 高，所以佢唔駛收錢，彤彤仲食咗好多鳥冬，又飲咗 d 蘋果汁，仲自己食咗成碗仔軟雪糕添，Yummy~ (趁住彤彤仲未夠 90cm 高，要食多幾次先得~)

食飽飽後，行出嚟，彤彤見到隻牛牛，話要影相，同佢影完相，我哋就去行 Aeon、Uniqlo 同埋 H&M，之後先返去公公婆婆家食飯~

便便問題

二零一五年六月十二日星期五

近幾個月，彤彤嘅便便都唔太好，成日都要隔 2-3 日先有一次便便，所以每次便便時，都會大喊同埋好辛苦，我哋睇見佢咁，都覺得慘豬豬~

呢段時間，已經同佢轉過 2 次奶粉，但無乜改善，以前隔日用余仁生的開奶茶嚟沖奶，多數當日都可以有便便，但唔知係唔係而家大個咗，即使連續 2 日都用開奶茶嚟沖奶，都未必可以有便便~

初初開始時，都係隔 2-3 日先有一次便便，近排仲拖到 3-4先有一次便便，咁便便時當然係會爆喊啦~

就好似今日咁，公公婆婆幫彤彤換好晒校服，公公諗住同佢出門口返學，點知佢想便便，但又便便唔到，係度喊咗 45 分鐘都唔得，加上又落緊雨，公公打電話比我，叫我幫彤彤向學校請假，點知彤彤聽到公公咁講，喊住都話要返學，但佢又好想去便便 wor，所以最後都無比佢返學，要公公婆婆氹下佢先肯唔返學~

之後我叫公公帶佢去睇醫生，醫生話佢肛門已經有小小損咗，驚會發炎，要食抗生素同埋塗消炎藥膏。另外，公公又問咗醫生轉邊隻奶粉好，醫生話唔駛特別去轉，其實隻隻都係差唔多，再問埋彤彤平時的飲食，醫生都話好正常，只好開 d 通便藥比彤彤食，等佢 keep 住日日都有便便，唔好再有心理陰影以為去便便會痛痛。

二零一五年六月十三日星期六

尋日睇完醫生後，比彤彤食咗 2 次通便藥，佢都係未有便便，所以今日決定唔同佢出街，要佢有便便先帶佢出街，所以成日只係在家陪佢玩同瞓，最終係下午 2 點幾終於都有便便了，可能食咗藥關係，便便唔算好硬，而且見佢唔太辛苦就便便到~

由於之前成 4 日無便便，今日又唔算有太多便便，驚佢可能會再便便，所以都係決定唔同佢出街，再不斷洗腦式同佢講快 d 去便便~

彤彤: 終於都便便到，肚仔唔駛谷住谷住，開心返晒~

2015年6月19日星期五

淘貼紙書

之前係 Facebook 見到有人賣 d 英文貼紙書，但好似都幾貴一本 ($40 一本)，所以就上淘寶搵下，睇下搵唔搵先，估唔到比我搵到 wor~

不過就要分開 2 間店買，先可以買晒任套 21 本，好彩其中一間店全國包郵啫~

收到實物，真係唔錯呀，印刷精美，又夠多貼紙(岩晒彤彤，佢呢排勁鍾意周圍貼)，而且貼完晒 d 貼紙後，仲可以當書用嚟故教彤彤學英文~