二零一三年九月廿一日 星期六
由於尋晚果餐生日飯食得唔太好，所以今日補返數，去佐敦諾特富酒店食 Lunch Buffet，仲有買一送一添，2 個人食埋單都係 $28x，都算幾低下，而且都幾好味添~
酒店仲安排咗張 bb 椅比彤彤坐，彤彤見我哋食嘢，但佢無份食，係度係咁大叫~
之後酒店嘅待應哥哥行埋來，同彤彤玩咗陣，又話佢好得意~
再過多陣，待應哥哥又行埋來，話見彤彤咁得意，送隻熊貓公仔比彤彤玩~ (其實我哋覺得係待應哥哥驚彤彤大叫會打擾到其他人，所以先送隻公仔比彤彤玩, 等佢可以靜返 d 就真)
雖然係買一送一咋，但都算幾多嘢食，我哋食咗幾轉魚生同壽司，不過熱盤就少 d 款揀了~
食食下都唔記得影相，所以只係影咗好少食品相，ha ha.....
二零一三年九月廿日 星期五
由於之前係 Apple Store 成功訂咗 2 部太空灰 16G & 1 部銀白色 32G iPhone 5s，所以今日要依時過去悕慎廣場度取機~
我哋大約 3 點半到達，到去 check 咗一下資料就比我哋入去拎機，拎完機比埋錢，一出門口就有人問放唔放機，但價錢唔岩，所以無放，老公提議過返先達睇下再算~
咁又過返去先達，價錢高幾百一部，原先部銀白色，我係打算自用的，但原來回收價比太空灰高好多，所以打心一橫放埋佢，最多遲 d 先換機~
放完機，就同老公行一陣，問下老公想食乜補祝佢生日，老公提議食放題，咁我哋就去咁銀城果邊搵嘢食喇!~
原先想食返松屋的，但我哋無預先訂位，所以要等位，所以去咗另一間唔駛等位嘅和味館，但嘢食麻麻，又少款，無下次 lor!~
原先話明可以食 2 個鐘的，點知食咗 1 個就拎張甜品紙來，話 last round order，有無攪錯!!!
之後食埋甜品，我哋就走了，果時先食咗個半鐘，d 嘢食又麻麻，又少款，Service 又唔太好，而且又無 bb 椅，好彩我哋今日有推 bb 車來咋，唔係要抱住彤彤食嘢 lor，所以真係一定唔會有下次呀!!!!
之後行咗陣旺角，就一齊回家，見時間尚早，就比彤彤玩下車車，玩完先同佢沖涼~
無玩一排，彤彤好似開始識點玩，開始識玩 d 波波，又識坐係車上移動，變相可以坐係車上通屋走動~
二零一三年九月十九日 星期四
今日係一年一度嘅中秋節，又咁岩係老公嘅新歷生曰，祝老公生日快樂、身體健康、事事順景、生活愉快!~
由於撞正中秋節，所以今晚無特別同老公去慶祝，只係同老公嘅家人一齊食飯就算~
老公公司今日收早，佢 4:00pm 就可以放工，但我就無得早走，所以攪到成 7 點先返到去我父母家，接彤彤出返 TST 食飯~
老公等我放工嘅期間，去咗行咗陣玩具反斗城，仲買咗個玩具比彤彤添~
呢件玩具好似話原價成 $400 的，但因為個盒爛了，所以而家做特價，只係 $150 就買到了，真係幾低呀!~
今年中秋節食飯有少少特別，唔係去酒樓，細姑仔提議去食土耳其餐，所以就係 Yahoo 團購度買咗 4 sets 二人晚餐~
我哋大約 8:35pm 就到達，原來老公嘅家人一早已經到了，要佢哋等真係唔好意思添~
呢間土耳其餐廳叫 Ottoman Palace，環境都幾清靜，但就有點迫，枱同枱之間嘅空間比較窄，我哋有 8 個大人加 2 位小朋友，都係比一張 8 人長枱比我哋，想搵個位放下嘢都唔得呀!~
點好食物後，彤彤就開始覺得有 d 悶，係度食手指，又大聲尖叫，之後老爺唔低得，就行埋彤彤身邊陪佢玩咗陣，佢先靜返咋~
今日個餐包一碗湯、春卷、沙律、主菜、飲品同甜品，但今日 d 甜品賣晒，所以轉咗土耳其薄餅比我哋，望落好似幾好食咁，但食落我覺得麻麻，可能我唔食慣土耳其風味掛，ha ha.....
土耳其版嘅 Zero 可樂~
食飽飽之後，老公嘅家人就搭車回家，我哋就行咗過去 Habour City，因為要幫彤彤換片 & 餵奶，所以就當散步行過去，又可以賞下月，今晚個月光真係好圓好大呀!~
換完片 & 餵埋奶出返來，見到有 Lego 展，所以又同彤彤影返幾張相先，之後我哋都搭車回家了!~
回家後，老公就比咗封生日利是比彤彤，第一年派生日利是呢!~
彤彤：今日 Daddy 生日，祝 Daddy 身體健康，生活愉快!~ 多謝 Daddy 比我嘅生日利是!~
之後就同彤彤玩下燈籠應下節，彤彤玩得好開心呢!~
