Day 4

二零一二年十一月十四日 星期三

今朝又六時多就比嬸嬸叫起身，先同我量血壓，然後又比枝探熱針比我同阿Ｂ量體溫，之後就派早餐。

  

咁我就先去洗手間洗面先，返到床位時，我見阿B醒咗，咁我就快手去揼奶先，揼完奶返到來，阿B又係度喊緊，我就即時餵咗佢食奶先~

阿Ｂ一有奶奶食就好快收聲，仲食得好快，食飽飽無幾耐就瞓著咗了，而我就食早餐~

   

過咗一陣醫生就來巡房，我問醫生係唔係今日可以出院(因為我真係好想快D回家，唔想係度比人迫我餵奶，又成日瞓瞓下又比人捉住量血壓)，醫生先檢查我個傷口，話埋得好好，又無血水果D，仲話已經乾，所以我可以出院，醫生仲話回家後可以沖涼都唔怕(但我唔會咁做Lor)。

之後醫生話可能阿B未出得院住，要再磅下重先知可唔可以出院。因為阿B收水收得太多，好似話多過 10%，所以一陣要再磅下，睇下有無重返少少先知可唔可以出院~

咁我就通知定老公同我父母，話我下午可以出院，但阿B就未知，叫佢哋準備來接我~

差唔多派飯時間，姑娘同我講話阿B都可以一齊出院，叫我食埋飯，等到佢哋準備埋D文件比我，就可以出院，佢叫我預1:30PM 度就可以，咁我就叫老公 1:30PM 來到病房門口等，另外叫我父母 2:00PM 先到，等老公可以幫我辦好出院手續先，唔駛佢哋等咁耐~

 

而我就食咗飯先，之後再執埋D行李，自己同阿B都換埋衫，就坐係床邊等姑娘比返D文件我，同埋出院紙。

大約1:30PM，姑娘就比晒D文件比我，之後我就比老公去找數同埋去拎藥~

埋單只係$650 咋，真係平到呢… 雖然阿B令我有妊娠毒血症，但因為呢個症，所以我要去 QE 生，亦因為咁我慳咗幾萬蚊生產費。雖然蝕咗訂床位果$6000，但總數我慳咗幾萬呢，都算阿B低打(反話)啦~

之後老公就拎返張收據比我，我再交比姑娘，姑娘就幫阿B剪手牌腳牌，再入好就比返我作業紀念，同埋叫我下星期要返來見醫生，之後嬸嬸就幫我用車仔將D行李推出病房門外，而我就抱住阿B出去，之後我哋就搭的士回家~

回家後，我就先去用姜水洗頭沖涼(用保鮮紙包住成個肚，防止D水掂到傷口)，再幫阿B洗頭沖涼，初次幫BB洗頭沖涼真係驚到震，因為佢太細，又軟林林咁，好驚捉佢唔住，好彩有驚無險，順利完成任務~

之後我打電話比陪月，想叫佢明天返工，點知佢話佢做唔到我個JOB，因為佢個囡早咗一個月生咗孖B，佢要照顧佢個囡同2 個孫，但佢話佢同陪月中心講咗，會有2位陪月來幫我手，每位做2星期~

Day 3

二零一二年十一月十三日 星期二

今朝又六時多就比嬸嬸叫起身，先同我量血壓，然後比枝探熱針比我同阿Ｂ量體溫，之後就派早餐。

 

 

咁我就先去洗手間洗面先再食早餐，點知我返到床位時，嬸嬸話阿Ｂ好肚餓係咁係度喊，佢把喊聲差唔多成個病房都聽到，正一大聲妹來＠＠

咁我唯有即時去揼奶房揼奶，之後再餵埋奶先食早餐，阿Ｂ一有奶奶食就收晒聲，仲食得好快添，食飽無幾耐就瞓著咗了～

 

 

之後我就食早餐，隔多陣醫生就來巡房，我問醫生我幾時可以出院，醫生話原則上今日可以出院，但我仲有少少高血壓，如果唔趕住返屋企，就係度留多日，反正呢度都仲有床位剩低，就係咁我就係度留多一日。

之後上咗個出院簡介課程，主要教返點樣照顧初生BB，同埋點樣幫BB辦理証件，仲有就係出院時要辦乜手續等等，聽就又到食飯時候，時間真係快過~

 

 

食飽後又係上下網，有時間就去揼下奶，又睇下阿B 咁，之後就到探病時間，今日除咗老公，仲有阿爸、阿媽、奶奶同埋姑仔來探我，今日阿B食飽飽，就無好似昨日咁樣喊，有時就會周圍望下嘢添~

 

 

 

老公今日又係陪我食埋晚飯，再坐到8 點先離開，之後我又要去揼奶，又餵奶，攪得來又成12點幾先瞓，3 點又比姑娘拍醒，叫我餵奶比阿B飲，呢種生活真係人都癲呀，只想快D出院!!!

 

Day 2

二零一二年十一月十二日 星期一

 

今朝六時多就比姑娘同嬸嬸叫起身，話要起身食早餐，之後等醫生來巡房，但因為我仲未落得床，又抱住阿B，所以我只能繼續留係床上，嬸嬸見我仲抱住阿B，就幫我將阿B放返過去車仔，等我可以食早餐。

食飽之後，姑娘又抱返阿B比我，叫我餵奶，但阿B都係唔太識啜，又係咁喊，再加上見到阿B小便比較小，就話幫我補一次奶粉比阿B，但要等到9 點半後先有得補，因為要等醫生巡完房先得~

之後就有姑娘過來量血壓，又幫阿B量體溫，隔一陣就有醫生過來睇我個傷口，同埋問下有冇乜嘢唔舒服咁，之後醫生就話我今日可以試下落床，一陣會有姑娘過來幫我拆咗條尿喉，之後試下自己去小便，睇下有無問題。

隔咗半個鐘度，如有位嬸嬸過咗來，幫我拆尿喉，又扶我起身坐下先，仲叫我坐多一陣先自己嘗試落床，就係咁我就要開始自己照顧阿B，姑娘同嬸嬸就唔會再幫我換片片了~

我先係將對腳移落床，再係床邊坐咗一陣，之後嘗試企係度，但對腳好似無乜力咁，所以我又坐返低，再過一陣，我又企係起身，如是者試過幾次，就開始自己行去洗手間嘗試小便，傷口其實唔太痛，可以接受，係有少少扯住feel。

之後開始親囡時間，我抱咗阿B 埋身，睇下佢識唔識食，但佢都係唔識啜，又係度喊，仲攪到我損埋，姑娘見到咁，再加上我個胸又開始谷住，姑娘叫我自己揸D 奶落杯仔度，再教我點餵阿B，呢次阿B就食到奶，阿B食飽飽就唔再喊了~

之後姑娘話要帶阿B去做聽力測試，同埋打卡介苗，做完測試後，姑娘推返阿B返來我身邊，話一切正常~

之後就食午飯，又抱下阿B，又上下網咁，等到老公放工過來探我 (佢每日請2 個鐘假過來陪我)。

 

今日阿爸阿媽，仲有奶奶同姑仔都來咗探我同阿B，阿爸阿媽來到時，阿B喊得好大聲，嚇到我父母以為阿B有乜事，我解釋返比佢哋知，個孫女肚子餓，又唔識食奶奶，姑娘又唔肯補奶粉(政府醫院呢樣嘢真係好衰，迫人要餵人奶)，所以咪大喊 lor，咁我就即刻比咗之前揸出來嘅奶比阿Ｂ飲，佢先收聲。

今日老公又係陪我食埋晚飯，等到８點先走，之後我就自己去咗揼奶房揼奶，我竟然揼到６安奶出來，姑娘話夠阿Ｂ飲２餐，仲話我上奶上得幾好添。

 

呢晚我係１１點幾餵咗阿Ｂ一次奶，之後就一瞓瞓天光，原來半夜時，嬸嬸見阿Ｂ喊，而我又瞓咗唔知道，佢又見床邊有枝奶，就幫我餵咗阿Ｂ飲，估唔到我咁好瞓，連阿Ｂ嘅喊聲都聽唔到。

 

 

 

Day 1

二零一二年十一月十一日    星期日

 

到達產後房後，可能麻醉藥仲未散嘅關係，個人仲係好攰，同埋無乜力咁，但我比唔同嘅人圍住來問嘢，所以無得瞓 lor~

首有位嬸嬸幫我量血壓同度體溫，之後就有姑娘來問我有無乜嘢唔舒服，我話仲有D痕，但姑娘話我之前打咗止痕針，未夠8 個鐘唔可以再打，起碼要等到9 點先可以再打，叫我忍下先。之後我問姑娘，我可以幾時見到BB (當時BB唔係我身邊，但其他媽媽嘅BB都係架車仔放係身邊的)，姑娘話阿B體溫低，要瞓暖箱，等BB體溫回復正常就會推返來我身邊~

 

之後就有嬸嬸來幫我清潔下體，同埋洗傷口，嬸嬸好好心機，好輕力咁幫我清潔，仲教我明天下床時，要就住個傷口，唔係就會好痛嫁喇！～

 

到7 點度，就有人派早餐，但我因為岩岩開完刀，唔可以食固體食物住，所以只得粥水一碗。

 

到8:30AM 就有醫生來巡房，醫生來睇咗一睇我個傷口話OK，埋得幾好，同埋叫我郁下2 隻腳板比佢睇下D麻醉藥散成點，之後就話一陣會比止痛藥 & 降血壓我食，又問下我有無見頭痛/頭暈，同埋有屁屁放未，如果有就可以食少少固體食物。
 

我再同醫生講有D痕，咁醫生就交代護士長，一陣9 點幫我打止痕針，但護士長可能太忙，成10 點先來幫我打針 lor，真係痕c我喇!~ 過多陣，就有抽血員來同我抽，話要睇下生完B後有無問題 wor~

 

之後我無無聊聊就瞓係床度用 iphone 上下網，又同老公傾下電話咁，傾傾下(大約11點度)，有位嬸嬸推咗阿b 過來我身邊，但可惜當時阿b 個頭擰咗去另一邊，而我又未落得床，所以我仲未見到阿b個樣，真係心急c人呀!~

 

 
過咗一陣，阿b瞓醒咗，仲擰過個頭過來我呢邊，我終於都見到佢個樣喇~
 
 

 

我一睇，塊面仔真係比個產挾攪到有幾個紅印，真係心痛c 媽咪喇，好彩姑娘話過 1-2 日就會退先無咁驚~

 
到咗 12 點，又到派飯時間，但我仍然只可以飲粥水，仲有一碗代茶，食飽飽後，就有姑娘過來，抱阿B比我，仲教我點樣餵人奶，但阿B好似唔係好識啜咁，姑娘話唔緊要，試多幾次就會識。
 

 

5:00pm 有姑娘來幫我拆咗d鹽水樽，但粒豆仲keep 住係度先，之後又比咗 2 粒止痛藥比我食。

 

之後到咗探病時間 (5:00 – 8:00pm)，老公，阿爸，阿媽，奶奶，二嬸，家姐，舅母同2 位阿姨都來咗睇我同阿b，但每次只可以入2個人，所以佢哋都要分批來~

 

個個來到都會抱下阿b，但出奇地佢又唔怕生保wor，無喊不特止，仲眼仔碌碌咁望住人添，所以個個都話佢低打(反話)呀!~

 

老公係最後先走的一個，佢陪我食埋晚餐，再傾多陣先走。今次唔駛飲粥水了，可以食一碗白粥，都叫做有d米氣到下個肚。

 

老公 8 點鐘就離開，我到大約 9:30pm 都瞓口咗了(醫院 9 點就會關燈)，到 12 點度，就比姑娘拍醒我，仲抱埋阿b過來叫我拍醒阿b餵奶，阿b好似瞓得好林wor，但我都照做，阿b仍然唔太識啜，仲啜啜下就瞓著埋添，我唯有抱住佢，等佢瞓下先，過咗半個鐘度，就有姑娘過來幫我抱返阿b落車仔度(因為我仲未落得床)。

 

點知瞓到半夜 4 點幾5 點，阿b係度大喊，但我又未落得床，過唔到去車仔睇下乜事，好彩有嬸嬸聽到喊聲過來幫我抱阿b過來，原來阿b肚仔餓，咁我又試下比佢啜下，但可能佢唔識食嘅關係，佢一路食一路喊，我又唔知點算好，d姑娘同嬸嬸又話要繼續試，唔肯幫我補奶粉比阿b，睇見阿b咁，真係好心痛，仲有d後悔點解唔去私家生。
 
 

好彩阿b喊喊下就瞓著咗，我唯有抱住佢到天光，結果我就無得瞓了~

生產過程 Part 4

二零一二年十一月十日     星期六

 

插尿喉時有少少唔舒服，但一定唔係好似其他人講咁唔舒服，只係比人”廖”咗 1-2 下下面咁，插完後好快就 feel 到個肚鬆咗，無咁谷住咁~

 

之後就一直係產房內同老公吹下水，同埋同阿B講，叫佢快手D自己出來，唔好要阿媽咁辛苦，同埋唔好要阿媽捱一刀~

 

大約5 點幾6 點時，子宮開始收縮多咗，條腰好聚，同埋好 yuen 痛，所以我又襟咗一下製來加麻醉藥嘅份量，心諗開始有料到，阿B可能好快會出來了~

 

到咗晚上 7 點，又有醫生同埋助產士入來檢查宮頸，醫生話都仲係咁上下 (心諗唔係掛，我明明 feel 到痛咗嫁wor??)，佢估計好大機會要開刀@@ 但佢見我個樣好似好驚咁，就話等多一陣先，一個鐘後再返來睇我嘅情況再作決定~

 

呢個鐘我同老公不斷同阿B 講，叫佢合作 d，阿媽真係好驚要開刀嫁，老公仲在旁安慰我，話可能開刀對我同阿B都比較好呢，始終我有妊娠毒血症，開刀一來我可以唔駛受陣痛之苦，二來又唔會因為痛而令我血壓上升，咁樣大小都安全好多，但我一想到開刀後個傷口痛，就勁驚 lor~

 

到咗 8 點3 ，有2 位女醫生同幾個助產士都入咗來，其中一個女醫生幫我檢查，檢查完後，佢話宮頸都仲係未開，而我又已經穿水超過 10 小時，等到宮頸全開，我應該穿水多過24小時，佢唔建議我再等落去，叫我簽紙緊急開刀，我一聽到要開刀就勁驚，d 眼淚不由自主咁流出來，老公係咁氹我，但都無用，因為真係好驚~

 

 

呢個時候，另一位女醫生行埋來我身邊，叫我冷靜d先，再問我驚乜? 我話我都唔知，只係好驚好驚，佢安慰我唔駛怕，有咁多醫生護士會陪住我，同埋叫我諗下好快就可以見到BB，唔係仲好咩?

 

 

就係咁樣，我係半推半就嘅情況下簽紙同意開刀，醫生話會即刻同我Book 手術室，估計要到晚上 11 點後先有位~

 

 

點知隔咗一陣，對方覆返電話來，話而家有位，醫生聽到後就即時叫助產士幫我挮毛毛，助產士就叫咗老公出去，再幫我過床同執埋我D行李，之後就即刻推我過手術室(行特別通道的，所以我見唔到老公)，而老公亦被告知唔可以陪我，只可以係手術室門外等消息~

 

 

我被推入去手術室後，麻醉科陳醫生亦都到咗，仲同我講解麻醉嘅過程，其實都係用返無痛分娩果條喉，不過加重藥力咁解，之後就動手幫我加藥，同埋用冰粒試我下身嘅感覺，但我仲係有d感覺，所以陳醫生話可能我本身比較肥，因此要再加多藥嘅份量先得，加咗藥後，我再 feel 冰粒凍唔凍了~

 

 

跟住醫生就幫我開刀，但我仲係感覺到痛，而且仲係幾痛下，陳醫生話叫我忍一忍，因為已經用到半身麻醉嘅最大劑量，唔可以再加藥，一係就同我轉全身麻醉，但咁樣會將麻醉藥過咗比BB，佢叫我忍到就忍埋佢，唔得先轉全身麻醉。聽到佢咁講，我唯有頂硬上忍下啦，陳醫生叫幫我開刀果個位醫生停一停，比我休息一下再繼續~

 

 

再繼續後，仍然感到痛，亦都感覺到個肚比人拉扯緊，但為咗阿B我只好忍，其間我都有細細聲叫咗出來，雙手亦都抓實張毛毯，過咗大約幾分鐘，就聽到BB嘅喊聲，之後就有護士抱咗阿B 比我睇，護士同我講，因為醫生頭先用咗產挾，所以BB面仔都有D痕，過2日就會退的，之後護士仲問埋我BB嘅性別係乜添~

 

就係咁我只係見咗阿B一眼，阿B就比護士抱咗去清潔，憑我呢眼嘅印象，好彩阿B個樣比ultrasound 果樣仲衰D(反話)，個鼻係正常大小，無 ultrasound 照出來咁大，面上無任何胎記，咁我都放心D~

 

之後護士同我講返阿B的出生時間，同埋體重(3.05kg)，之後醫生就同我縫針，呢個時候又係感到幾痛，陳醫生又再安慰我，話好快就完成，忍一陣就唔痛 (但佢呃我 lor，縫針攪咗差唔多 10 分鐘先得呀)。

係縫針嘅過程，我聽到有護士係後面重複數咗幾次棉花嘅數量，核對一下有無遺留，可能佢驚留咗係我肚入面(我都驚呢樣嘢呀)~

 

縫完針後，護士就推咗我去休息室，要留係度觀察半個鐘，無事先可以返回產房休息(因為我有妊娠毒血症，生完BB後留係產房觀察比較安全，因為產房嘅醫護人員比較多，易於照顧我)~

 

觀察完後，我被推出手術室，原來老公已然係度等咗好耐，以為我做乜事咁耐都唔出來，老公見到我無事，就同我講咗句：「辛苦晒，老婆仔」，我就被推走了，而老公就被告知，叫佢去產房門外等入去見我~

 

護士安頓好我後，就比老公入咗來，陪咗我大半個鐘，之後佢就過咗去產後房睇阿B，我叫佢記住影多幾張相比我睇，之後佢就回家了~

 

到咗半夜 1 點度，之前係產前房，對面床果位媽媽被推了入來我間房，原來佢又係緊急開刀生B，又係因為有少少血壓高，要生完B後留係產房觀察一晚，真係巧合。(但呢晚佢好安靜呢，ha ha…)

 

係產房呢晚，雖然無感覺到痛(因為麻醉藥未過，而且又有止痛藥水吊住)，但我對麻醉藥敏感，成塊面都好痕，好彩護士見到我係咁抓，問我係唔係好痕，佢可以幫我打止痕針，打咗針後1 個鐘度先好D~

 

但成晚瞓唔夠 2 個鐘就比人捉住量血壓，又有少少低燒的情況下，個人真係勁攰勁眼瞓。大約早上6點，我係半夢半醒嘅狀態下，嬸嬸就推咗我去產後房休息了~