兒童綜合發展初步評估 + 皇室堡行街街

二零一五年七月十一日       星期六


其實一直以來，我都覺得彤彤講嘢唔係好叻，同表哥仔比，真係好似好差咁添~


表哥仔大彤彤 7 個月，回想返，未夠 2 歲的時間，表哥仔已經識叫晒所有親戚的稱呼，又識講自己想食什麼，但彤彤呢? 到 2 歲 3 個月先開始識叫幾位親戚的稱呼，但仲係唔識表達自己~

雖然彤彤講嘢唔叻，但認知上，佢又好 OK 嫁 wor，佢識好多唔同的物品/生果/動物的叫法，佢問題係唔識用句子講出嚟，PN 班的班主任亦都有同我講過，彤彤唔識表達自己的想法，同埋老師以為認知差 (老師話問佢唔識答，我問返老師問什麼，原來彤彤係識的，只係佢唔肯開口答老師)，所以就開始留意下，有無一 d 評估可以做，睇下彤彤語言能力係唔係出咗問題~

其實仲有另一個原因，而令我想帶彤彤去做評估，就係佢近排嘅 trouble two 問題嚴重咗，扭起計上嚟，絕對唔係人咁品，伸直晒個人，拗晒腰，對腳起勢亂踢，(佢力度之大，我有時都唔夠力抱實佢，老公都係勉強抱得住佢)，有咁大聲喊咁大聲，慌 c 無人知佢扭計咁，有時出街遇到呢種情況，真係好鑼 lor~

咁岩 6 月尾的時候，比我係 Gen Mami Blog 見到小檬學 F 發音的 post，知道有一間幼兒服務機構，有得做呢方面的評估，仲要有 Summer Promotion，$200 就可以做一個 45 分鐘的評估，分析唔同的發展情況，所以就打電話去 Book 咗 11/7 做評估~

今日老公要返工，所以只有我單拖帶住彤彤去做評估，由於治療師有嘢做緊，所以要等一陣先可以同彤彤做評估，職員好好人，開咗一間房比彤彤入去玩，仲拎咗 d 玩具比佢玩添~



















大約玩/等咗 15 分鐘度，治療師梁姑娘就入咗嚟，叫我哋過另一間房，開始做評估~


評估係遊戲同埋傾計形式進行，分咗大小肌肉、言語表達、情緒社交、認知、專注力幾方面~


做完評估後，治療師會即時做埋份評估報告比我哋的，但就需要等一陣，所以我哋就去了另一間房等，彤彤仲係度玩咗一陣統感訓練的遊戲添~





大約玩/等咗 10 分鐘度，治療師就入返嚟，同我傾返份評估報告，一如所料，梁姑娘覺得彤彤各方面都無乜問題，彤彤唔怕生保，仲好主動活潑；認知能力亦都好好；大小肌肉發展亦正常，可以用筆畫到圓圈同埋直/橫線；情緒亦都唔覺有問題，易同人相處；係表達能力好似差 d，但又唔係完全表達唔到自己的諗法，彤彤識用一 d 單字/詞去表達，但唔識用一句完整的句子去講出嚟 (完整句子 = 主詞 + 動詞 + 名詞)，有時講唔到就用身體語言去表示 (e.g. 想其他人同佢玩，佢唔識講，就主動去拖果個人的手，拉佢一齊玩)。另外，梁姑娘話彤彤的英文其實幾好，佢識好多英文的字/詞，而且比中文識得多，所以有時用中文問彤彤嘢，佢唔識用中文答就會講英文~

我再問返梁姑娘，彤彤情緒真係無問題? 佢問我係唔係見到彤彤有情緒問題的行為出現，我講返話佢有時會突然扭計，點氹都唔得，我哋又唔知點處理好~

梁姑娘話彤彤唔似係有情緒問題的小朋友，佢扭計只因佢未識表達佢的諗法比我哋知，正正就係佢表達唔到，所以就好忟憎，覺得其他人唔明佢，咪發晒脾氣~

梁姑娘話其實而家香港嘅小朋友好叻，K1 已經可以出口成文，彤彤言語表達能力係其他人慢咗，唔好好正視呢個問題，因為再大小小，就好難去改正，仲會影響埋佢的社交添~

梁姑娘叫我考慮比彤彤上下言語表達能力的堂，而家有個暑期班，做緊 promotion，$450 有 7 堂，如果上完晒，認為有改善，可以再上之後果 d 恆常班~

咁我見價錢同埋時間都 ok，所以就幫彤彤報咗，嚟緊 7 個星期六都會上言語理解及表達課程，希望彤彤有所改善啦~

做完評估，我就同彤彤去食 lunch 先，之後再會合老公，原先諗住去皇室堡影 My Melody & Little Twin Star 的，點知有活動未開放，所以就上去商場行下街先，當然唔少得去玩具反斗城啦~







行完商場，樓下嘅影相區就開放返喇，所以快手同彤彤影下相，之後就回家了~