團購賀年糕點

之前係團購買咗許留山嘅賀年糕點，$148 有年糕、蘿蔔糕及芋頭糕各一底，雖然係團購，但都好大盒，好有份量的，真係好底呀!~

 

 

新年唐裝

其實呢件衫係上年買比彤彤著的，當日無帶彤彤一齊去買，諗住買最細 size 應該岩著，點知都係太大，估唔到今年著就岩岩好~

 

 

 

 

 

賣甩老公 & Daddy 去海洋公園

二零一四年一月十九日     星期日

 

今日老公有事做，唔可以陪我哋，所以我同彤彤就賣甩老公/Daddy 同公公婆婆一齊去海洋公園玩，呵~呵~呵~

 

出發前，我哋先去飲茶先，飲完茶就出發，我哋大約 12 點就到達，之後就即時去排隊睇「幻海奇緣」(12:45PM 有一場)，大家都睇得好開心，特別係彤彤呀，佢見到 d bubble 成日都噴出來，不斷想用手去撲 d bubble，又見 d 空中飛人表演，笑到唔停得嘴~

 

 

睇先表演都差唔多 1:30PM 了，即刻去排隊坐纜車，大約排咗 35 分鐘就上車，彤彤又係坐得好開心呀，全程笑不停!~

 

 

 

 

 

上到山後，我哋又帶咗彤彤去睇佢最鍾意嘅海獅~

 

之後再行多陣，我哋就落返山，今日公公同我仲同彤彤坐小火車，婆婆就休息一陣，順便睇實架 bb 車~

 

 

 

之後去睇埋大熊貓，大約 4:30PM 度我哋就回家先，一出海洋公園，彤彤就瞓著咗~

 

一路瞓到返到公公婆婆家先起身，都有個幾鐘，我哋就同彤彤沖涼洗頭先，等埋老公返來，就去 PizzaHut 食飯~

 

 

九龍城廣場 + 10th Lesson @ Kiddo Zone + Time Square + 朗豪坊

二零一四年一月十八日     星期六

 

今朝一早就起床，因為我要去覆診+ 抽血，所以大約十點就去到九龍城了~

 

點知醫生今日有事，遲咗大半個鐘先返來，雖然我係第一個入去，都攪到 11 點先走得~

 

之後我哋行咗去九龍城廣場食 lunch，再係果度影下相~

 

今年九龍城廣場嘅佈置好靚呀，有 Bear Bear 熊，仲有 d 鼓係度，彤彤仲係度打咗一陣鼓添~

 

 

 

 

 

 

 

 

 

 

影完相，就去搭返 113 去返 Playgroup，點知塞咗好耐車呀，差 d 攪到遲到，好彩岩岩趕到~

 

但去到 Playgroup 時，彤彤要食奶，我哋見只係 warm-up time，就快手餵埋奶先入班房~

 

今日主要都係唱下歌，好似 How's the weather，Five little ducky，Days of the week等等~

 

今日 Ms Anges 又係度教各位小朋友講 Saturday，彤彤竟然又一次好大聲咁讀咗一次 Saturday 出來，估唔到佢上次唔係撞彩，而係真係講到出來，佢只係唔係我哋面前講啫~

 

之後 Ms Anges 又拎咗 d Flash Card 出來，教小朋友們 1 - 30 嘅英文，Ms Anges 叫彤彤讀一次 One 同埋 Four，彤彤又讀到出來，又係得佢一個讀到，之後 Ms Anges 拎住 2 張 Flash Card 問佢邊張係 One，再拎住另外 2 張 Flash Card 問佢邊張係 Three，彤彤都第一時間就揀岩~

 

唱完歌仔，Ms Anges 一拎 d 黃色鴨仔出來，所有小朋友又一齊走埋去想拎來玩，攪到 Ms Anges 都有少少唔知點好，因為顧得一隻，另一隻又比另一位小朋友搶咗，不過 Ms Anges 都話呢個情景佢都係 expected 嫁喇!~

 

再之後 Ms Anges 拎咗一 pat 軟 "lai lai" 嘅膠出來，比各位小朋友感受下凍嘅感覺，同埋認識顏色，得彤彤同埋另一位小朋友敢玩，其他幾位小朋友都有少少驚，唔敢掂~

 

之後就到 Story Time，當然各位小朋友都唔大興趣，仲開始周圍走添~

 

講完故事，就到落堂時間，又係 bubble time，彤彤玩得好開心，係咁撲 d bubble~

 

落堂後，Ms Anges 同我講佢好鍾意彤彤，話佢係一個 smiley girl~

 

之後我哋行咗去 Uniqlo 睇下有乜減價嘢岩彤彤，仲買咗幾件 heat-tech 添，留來出年比彤彤著。行過 Time Square 見到有棵大桃花就影咗 2 張相，之後就搭車過旺角了~

 

 

 

由於今晚要係旺角同一班親戚食團年飯，所以上完 Playgroup，我哋就先過咗來旺角行下街先，行到咁上下先去食飯~

 

行經朗豪坊，見到 d 新年佈置幾靚，所以即使多人，我哋都係度影咗幾張先走~

 

 

 

 

 

 

 

 

 

 

APM 新年佈置 2014

二零一四年一月十六日     星期四

 

今日放工後，返咗我父母家接彤彤，之後我哋又出返 APM 買嘢同食飯~

 

食飽飽後，就同彤彤影下新年佈置先，之後就去買嘢，根住就回家了~

 

 

 

 

 

 

 

 

 

 

 

 

 

 

海洋公園 + Megabox

二零一四年一月十二日     星期日

 

隔咗 2 個月無去過海洋公園了，見今日早起床 (9 點半)，所以今日又帶彤彤入去玩下~

 

我哋先去食早餐先，而彤彤就趁呢個時間瞓返陣先，點知佢係 BB 車瞓醒時，有一束頭髮豎起咗，好攪笑 lor~

 

 

 

 

 

我哋 1 點未夠就入到去，見排上山嘅纜車條隊唔算長，所以就帶彤彤試下坐纜車上山，第一次坐纜車嘅彤彤，好開心，又四圍望添。原先落山時都想住多次，但太多人了，所以留返下次先啦~

 

 

 

 

 

 

 

 

 

 

 

大約3 點度，彤彤開始有少少眼瞓，所以我哋帶佢睇埋佢嘅至愛 (海獅) 就走了~

 

 

 

 

老公話佢都有少少眼瞓，所以想搭 107 過去 MegaBox ，貪佢長途小小，可以瞓下，所以我哋就過咗去 MegaBox 了~

去到 MegaBox 又係行下 Aeon，玩具反斗城同埋 Ikea，之後影埋新年佈置，就返去我父母家食飯了~