彤彤一歲大喇!~

二零一三年十一月十日     星期日

 

 

彤彤今日一歲生日喇！~

回想一年前嘅今日，因為妊娠毒血症被迫提早催生，又擔心作動時 d 血壓會不斷升高，令到我同你都有生命危險，當時由早上九時多，一直擔心到晚上八時，最後醫生宣佈催生失敗，要緊急開刀拎你出來，當時真係又驚又擔心(你要知道媽媽我係一個連打針都怕的人來，仲話要開刀，可想我當時有幾驚)~

開刀嘅過程雖然唔係好耐，但醫生落刀時，我係全程都感覺到痛楚的，因為之前做了差不 10 個鐘嘅無痛分娩，半身麻醉時唔可以再加太多麻醉藥，驚有後遺症，除非轉用全身麻醉，但我又好想睇住你出世，所以媽媽只好頂硬上，好彩好快就過了，見到你嘅一刻，所有嘅痛楚都忘記晒了~

過去一年，睇住你慢慢成長，由初時好似一團麵粉、到開始學抬頭、喊住口仍然堅持想反身、學坐、扶住嘢企起身、學爬等等，所有一切我哋同你經歷嘅第一次，我哋都會深深記住，將來到你大個時，會一一與你分享~

雖然你到而家一歲大，你仲未學識唔扶住嘢企，未識學行，唔鍾意食固體餐，仍然以奶奶為主要食糧，但我哋知你努力緊，知你要時間慢慢適應，我哋唔會迫你的，慢慢學習吧，我哋會一直支持你的~

彤彤，你一歲大喇，Daddy & Mami 祝你身體健康、快高長大、聰明伶俐、聽教聽話、天天開心快樂！~

 

Paddington Bear @ 青衣城 + 鬆弛熊 40 週年 @ The One

二零一三年十一月九日     星期六

 

原先今日彤彤要返 Playgroup 的，但見佢仲係好攰，同埋仲有少少鼻水咁，所以就打電話去 Kiddo Zone 請假~

 

之後老公話想去影下相 (商場嘅聖誕節佈置)，所以就去了青衣城影 Bear Bear~

 

 

 

 

 

 

 

 

 

影完相，再行埋青衣城，都只係 6 點，又未想食飯住，所以老公話去埋 The One 影鬆弛熊~

 

 

 

 

 

 

 

 

 

 

影完相，我哋就去沙嗲王食飯，之後就回家~

 

彤彤一歲生日禮物 - iimo 三輪車

二零一三年十一月八日     星期五

 

之前係日本代購到訂咗部 iimo 三輛車比彤彤，作為佢的一歲生日禮物，原先話 11 月中先到香港，點知突然收到通知，可以早 d 送到，真係好，可以趕係彤彤生日前送到~

 

我放工回到我父母家，已經見到個紙盒~ 

 

之後就拆箱，再安裝好部車仔，彤彤見我係度整緊，佢一路望到實，又大叫，真係心急~ (今日彤彤雖然退晒燒，但就開始有少少咳，同埋好似仲係好攰，無乜精神咁，但呢刻佢成個人生猛返晒)

 

 

 

 

見彤彤咁心急，安裝好就即刻比佢試玩下先，佢坐係架車度時勁開心，又四圍擰四圍摸下，見你咁開心，即係好鍾意 Daddy & Mami 送嘅呢份禮物啦~

 

 

 

 

 

 

 

玫瑰疹、咳咳、傷風

二零一三年十一月七至十日     星期四至六

 

之前都係估估下，懷疑彤彤出玫瑰疹，而佢又真係有 d 紅色粒粒出咗，點知以為佢應該好返啦，點知佢又開始咳咳 (應該係我傳咗比佢)，所以就比返之前醫生開定的止咳藥比佢食~

 

過多 2 日，佢 d 咳好返晒，點知又到傷風，仲鼻水長流添，好彩之前個醫生都有比定通鼻塞同止鼻水藥，咁又比佢食埋，先好返咋~

 

呢幾日彤彤病咗，見佢成個人無晒精神，乖乖咁坐/瞓定定，真係好擔心，Daddy & Mami 寧願要一個百厭，愛搗蛋的你，唔好再病病了~

 

 

疑似出玫瑰疹

二零一三年十一月四日     星期一

 

今朝如常係返工前帶彤彤過去我父母家，由於今朝公公有事要出一出去，得婆婆一個照顧彤彤。中午時間，婆婆同我傾電話時，仲話彤彤今朝好乖，瞓咗成 4 個鐘先起床，飲奶時又無扭來扭去~

 

飲完奶，公公就回來，見彤彤好似無乜精神咁，以為佢只係有點攰，又摸過佢無發燒，所以就抱住彤彤瞓多陣啦~

 

點知到 3 點度，公公打電話來話彤彤有少少發燒 (38 度)，帶咗佢去睇醫生，醫生比咗退燒藥，又比定 d 傷風止咳藥比彤彤，之後就回家~

 

回家後，公公話彤彤無晒胃口，唔多肯飲奶，d 藥又食得少少就唔肯食，個身又有 d 熱，攪到我不知幾想即時回家睇佢，好彩仲有一個鐘就放工，所以快手攪掂 d 手尾就回去睇下彤彤~

 

我返到去時，彤彤真係無乜精神，好似好攰咁，但都仲肯玩下玩具，仍然仲有少少燒，所以我係公公家中食咗少少嘢就即帶彤彤回家了~

 

到咗晚上 10 點半度，彤彤開始越來越燙，一量竟然燒到 38.6 度，我即時叫老公換衫，帶彤彤去睇急症~

 

我哋帶住彤彤落樓，即時搭的士去法國醫院，點知今晚勁多人，仲要大部份都係發緊燒嘅小朋友，所以要等成 20 個先到彤彤睇~ 之後我即時 whatsapp 我同事，話比佢知我明天要放假照顧我囡~

 

去到登記時，先量體溫，又升高咗，去到 39.2 度，再磅埋重 (9.22kg)，就比咗塊散熱貼比我哋幫彤彤貼(要收 $10)，再叫我哋坐低等下，同埋叫我幫彤彤除咗部份衫，再用濕布抹下佢的手手腳腳及翼下~

 

 

由於我有帶埋自己果枝搵熱針出來，所以我都有 keep 住 check 下彤彤嘅體溫，點知又升高咗，去到 39.6 度，我即時去問下姑娘仲可以做 d 乜，姑娘見咁的情況，即時提議幫彤彤塞退燒藥(事後先知要收 $40)，我哋當然應承啦~

 

 

塞完藥，彤彤開始扭計，又好似好辛苦咁，但又仲未到佢入去見醫生，我唯有再去問下仲有幾多個先到彤彤啦，姑娘話仲有 5-6 個，唯有再等~

 

結果由登記到入房見醫生，足足等咗個半鐘，真係有少少懷疑，如果當時去政府醫院的急症室，又要唔要等咁耐呢??

 

好不容易見到醫生，醫生先問下彤彤的狀況，檢查後，醫生話唔覺彤彤有感冒的徵狀，中耳亦都無發炎，初步估計係出玫瑰疹，叫我哋留意下幾日後，身體會唔會有紅點出現，如果有就即係玫瑰疹，可以唔駛理，但如果食晒藥仲係發燒，就要返來覆診，因為 bb 發燒有好多原因的，要再 check 下先知乜事~

 

另外，我哋都有問醫生，發燒關唔關出牙仔事，醫生話出牙仔係會發燒，但係唔會咁高燒，所以今次彤彤發燒，應該唔關出牙仔事~

 

之後就去藥房等拎藥，埋單承惠 $465~

 

 

 

 

之後我哋就搭的士回家，返到差唔多 2 點~ 餵埋彤彤飲奶同食藥，差不多 3 點先瞓，但彤彤病了，我又點瞓得著呢，成晚瞓下醒下，又幫下彤彤量下溫度咁，到早上 7 時多，餵埋彤彤飲奶食藥，我先可以瞓一陣~

 

二零一三年十一月五日     星期二 

 

今日我放假在家照顧彤彤，公公婆婆都過埋來我家幫手~

 

彤彤早上好返少少，但仲係 keep 住有微燒 (37.x - 38.x)，所以即使佢瞓了，夠鐘食藥時，我哋都會拍醒佢~

 

飲完奶，食埋藥，就同彤彤一齊玩咗陣，佢雖然攰，但都仲肯玩下玩具，有時都會笑下~

 

 

 

 

到咗晚上，彤彤又開始發高燒，成個無晒精神咁，連玩具都唔太肯玩，只係瞓醒時肯玩一陣，又無四周圍咁爬來爬去，真係好唔慣見到咁文靜的彤彤，見到佢咁，真係好擔心~

 

 

 

 

見佢又高燒到 39 度，我哋又幫彤彤塞了一粒退燒藥，再氹佢瞓，好彩藥力好快就發揮出來，退返去 38 度，今晚我又係無乜點瞓~

 

臨瞓前，見到彤彤面上出了 2 粒紅點，頸後都有 2 粒，可能真係如醫生估計一樣，係出玫瑰疹，唉.... 希望彤彤快 d 好返~

 

 二零一三年十一月六日     星期三 

 今早起床，彤彤已經退晒燒，尋晚發現果 4 粒紅點都唔見咗 (乜 d 疹咁快退嗎?)，所以我今日都有返工，要辛苦公公婆婆照顧彤彤了~

 

好在公公婆婆打電話來話彤彤無乜事，只係間中有少少微燒 (37.x)，但隔一陣又退咗，所以佢哋有依時比彤彤食藥~

 

公公仲話彤彤下午開始活潑返，肯周圍爬下.....一陣咁多，都叫做好過之前果 2 日~

 

我的寶貝囡彤彤，你要快 d 好返，我要見返果個愛笑、愛搗蛋、又百厭的你!!!~

 

 

 

 

 

米奇生日派對 --- 開心“爬地”

二零一三年十一月三日     星期日

 

今日我哋又同彤彤參加咗另一個爬行比賽，係 Mikki 舉行的「米奇生日派對 --- 開心“爬地”」，比賽前，我哋先去醫肚先~

 

 

 

 

 

大約 3 點九，我哋就到達會場登記，今日的比賽，彤彤嘅表現比上星期好，可以爬到大半路程，雖然贏唔到，但總算努力過，Daddy & Mami 就開心的了~

 

 

 

 

 

玩完比賽後，我哋行咗一陣，就去食 tea，彤彤仲竟然 high 爆，係咁係度大叫，又不時係度揮手，攪到我哋有少少尷尬!~