生產過程 Part 2

二零一二年十一月十日     星期六

早上六時多我就被叫醒了，因為醫生會係七時半巡房，所以我哋要早 d 起身梳洗同食早餐~

大約 7 點，就有嬸嬸來同我哋量血壓 & 體溫，醫生就大約 8 :15am 來睇我~

又係尋日果個粗魯女醫生，先問我塞藥後有無陣痛，我照同佢講無規律的痛就有，之後佢同我講我血壓仲係偏高，佢問我想塞藥多一日先，定今日直接催生? 佢話最好今日內生埋 bb 出來，因為我有妊娠毒血症，bb 早 d 出世會好 d，所以我即時答佢咁今日啦~

之後佢話要 check 子宮頸，嘩.... 頂.... 係超痛 lor (仲痛過我開刀後的傷口痛)，佢勁粗魯咁係咁係入面襟同摷，同埋到我眼淚水都標埋出來，嬸嬸見我咁就叫我忍一陣，好快就無事，醫生 check 清楚 d 先，但個女醫生一 d 安慰的說話都無講，check完後只係冷冰冰咁話，你子宮頸仲未 ready，不過都照催生住先啦，唔得就開刀，bb 一定會係今日出世的，之後佢就行開咗，留低我自己一係坐係床上喊~

我喊其中一個原因係痛，另一個原因係覺得個醫生對病人咁粗魯，態度又冷冰冰咁，我覺得佢當我唔係病人看待 lor!~

大約 8:30am，有另一位女醫生來睇我，話要同我抽血化驗，為一陣催生準備，同埋幫我種豆，佢見我係咁喊就問我乜事? 係唔係驚催生，係唔係有乜唔明等等~

我答佢唔係，我講返我的感受比佢知，佢仲好溫柔咁安慰我，話之前位醫生都係想 check 清楚 d 先會整痛我啫，之後佢就幫我種豆，出奇地唔似其他人講到咁痛 lor，只係有少少痛，比抽血痛多少少咁啦 (之後我仲幾鍾意呢粒豆添，因為打針可以直接打落粒豆度，唔駛我痛多次嘛)~

種好豆，我就同隔離床果位媽媽， 先去換好手術袍，再一齊跟嬸嬸行落產房催生 (佢又係塞咗一日藥都未生得，要去催生)，而對面果位媽媽都係要催生，不過佢要遲少少先落去產房，因為暫時未有位住~

生產過程 Part 1

二零一二年十一月八日     星期五

早上返公司交帶埋 d 嘢，下午 2 點由老公陪同下入咗 QE 的產前病房~

老公先幫我去辦理入院手續，之後佢只係可以係病房外等到探病時間(5:00 - 8:00pm)，先再可以入來睇我~

首先有嬸嬸同我度高、磅重、度肚圍，之後就叫我去換咗套住院服，同埋留 d 小便比佢哋化驗~

大約 2 點半度，就安排咗我個床位，係靠窗的，d 冷氣吹唔到，又有少少太陽的關係，所以比較熱~

大約 2:45pm，有位女醫生來咗睇我，先問咗我平時 d 血壓情況，同埋有無乜嘢唔舒服咁，再同我量血壓，有少少高 (15x/9x)，之後話要 check 下子宮頸成熟未，check 的過程有 d 唔舒服，仲有 d d 痛，因為個醫生有 d 粗魯，check 完後話仲未得，要同我塞藥軟化咗個子宮頸先，睇下有無反應，如果聽日都未有反應，先同我吊藥催生~

大約 3:15pm，有位姑來咗，幫我塞藥，佢手勢好好呀，仲好溫柔，塞完都唔覺痛，塞完藥之後的一個鐘都唔可以落床同埋食嘢，之後我仲問埋 upgrade 去二等房要幾錢，但一睇個價錢表，真係離晒譜，d 價錢有 d 仲貴過錢家，所以都係算了~

 

之後姑娘就同我駁機，check 埋 bb 的心跳，又隔半個鐘就過來幫我量血壓，因為我 d 血壓仍然偏高，醫生要我食多一次降血壓藥~

大約 4:30pm，姑娘話可以比我落床，但唔建議我出病房外，因為我 d 血壓始終都係偏高，最好留係床上好 d，所以我唯有等到 5:00pm 先可以見到老公喇~

我隔離床同埋對面床果 2 位媽媽，就係超唔忍得痛，由我入院到而家，一直係咁叫，但原來佢哋係一度都未開，又唔係有規則的陣痛，只係見紅 only，姑娘話駁機 check 都唔係有好強烈的陣痛啫，駛唔駛係咁叫呀?? 真係聽到佢哋 d 叫聲，攪到我都有 d 驚到時我唔知會點~

5:00pm 老公就入咗來陪我直到 8:00pm，老公都話果個位媽媽有無真係咁痛呀，佢哋真係未停過係咁叫痛的，老公話我今晚慘了，肯定比佢哋攪到瞓唔到~

塞藥後都無乜太大反應，只係耐唔中有少少谷 m 痛咁，但唔係有規律的~

大約到咗 10:00pm 度，就開始 feel 到 d 谷 m 痛強烈咗好多，但仲係可以接受的，所以我就係床上曲埋身瞓，可以減到少少痛，仲瞓咗一陣添~

到大約 12 點度，谷 m 完全無晒，我估係 d 藥力過咗，咁我就去洗手間先，打算再瞓過啦，點知聽到隔離床個媽媽係度喊，要求打止痛針，但姑娘唔肯，話因為佢一度都未開，咁快就要打止痛針，咁之後真正陣痛時點頂呀?

之後我又瞓過，瞓到大約 3 點半，果 2 位媽媽又係咁叫痛，姑娘都忍唔住過來叫佢哋靜 d，話佢哋係成個病房叫得最大聲，咁會影響到其他人休息，佢哋係咁同姑娘講好痛，叫姑娘幫佢哋 check 下，夠度數落產房未，點知 check 完後，姑娘話佢哋一度都未開，叫佢再忍下~

就係咁我成晚就比佢哋 d 叫聲，仲有每 2 個鐘過來同我量血壓 d 姑娘，攪到成晚都瞓得唔好，但出奇地，我仲好好精神wor，可能知道今日要迎接彤彤的誕生~

被 QE 捉入院

生咗已經 3 個多月了，日日對住彤彤(bb 的名)，雖然呢幾個月我都無返工，但真係無乜意欲去 update 個 blog~

咁樣唔得嘅，我要記低彤彤的成長過程，留返比佢大過咗時可以睇返 (希望可以做到啦..... )

彤彤唔係自願出來嫁，係醫生要佢提早出來的，等我講返當日的情況先~

二零一二年十一月八日 星期四

係公司忙緊 handover 嘅嘢(因為我的產假係 10 號開始)，大約下午 3 點幾，突然收到 QE 姑娘的電話，當時已經心知不妙，唔通星期二的化驗報告有問題? 果然真係有問題，姑娘話我 d 小便用機 check 過，同用試紙的結果一樣係有蛋白，仲要幾多下添，所以想我明天一早入院 check 清楚，有機會要同我即時催生，如果催生失敗就要開刀拎 bb 出來~

當時真係好驚，但我仲有嘢未 handover 晒，所以問下姑娘可唔可以遲一日(即係 10 號) 先入院 check，但姑娘話唔得，因為我已經有妊娠毒血症的徵狀出現咗，驚遲咗入院會有變化，所以一定要我明天入院，經講數後，姑娘比我下午 2 點入院，咁我仲有一個上午可以 handover 埋呢 d 嘢~

之後我打咗電話比盧醫生，佢好好人好詳細咁同我分析我個情況，我成日擔心係政府醫院生 bb 會好辛苦，又驚到時催生失敗要開刀，政府醫生 d 手勢會好差 (但原來我錯了，後面的 post 會再講)，所以講講下我都有 d 眼濕濕，盧醫生仲安慰我，叫我唔駛驚~

我仲問盧醫生，好唔好即時搵靳醫生同我催生 or 開刀，但盧醫生唔建議我咁做，因為我已經有妊娠毒血症的徵狀出現咗，驚我生的過程會需要用到其他產科以外的藥物 or 治療，會令到條數好襟計，叫我都係入咗 QE check 咗先，如果要催生 or 開刀都留返係 QE 好 d~

原先我係去私家醫院生 b 的，所以都唔駛買定 d 入院的物品，但而家有機會要係 QE 生，所以當晚就同老公去咗黃埔間 jusco 買定 d 入院用品，之後就去咗松屋食放題，因為生咗之後，坐月果個月就好多嘢都唔食得嫁喇~

食飽飽返到屋企都差唔多 12 點 lu，洗頭沖涼後就要執埋個走佬袋，之後就叫老公幫我影下我個大肚肚，留為紀念~