生產過程 Part 1

二零一二年十一月八日     星期五

早上返公司交帶埋 d 嘢，下午 2 點由老公陪同下入咗 QE 的產前病房~

老公先幫我去辦理入院手續，之後佢只係可以係病房外等到探病時間(5:00 - 8:00pm)，先再可以入來睇我~

首先有嬸嬸同我度高、磅重、度肚圍，之後就叫我去換咗套住院服，同埋留 d 小便比佢哋化驗~

大約 2 點半度，就安排咗我個床位，係靠窗的，d 冷氣吹唔到，又有少少太陽的關係，所以比較熱~

大約 2:45pm，有位女醫生來咗睇我，先問咗我平時 d 血壓情況，同埋有無乜嘢唔舒服咁，再同我量血壓，有少少高 (15x/9x)，之後話要 check 下子宮頸成熟未，check 的過程有 d 唔舒服，仲有 d d 痛，因為個醫生有 d 粗魯，check 完後話仲未得，要同我塞藥軟化咗個子宮頸先，睇下有無反應，如果聽日都未有反應，先同我吊藥催生~

大約 3:15pm，有位姑來咗，幫我塞藥，佢手勢好好呀，仲好溫柔，塞完都唔覺痛，塞完藥之後的一個鐘都唔可以落床同埋食嘢，之後我仲問埋 upgrade 去二等房要幾錢，但一睇個價錢表，真係離晒譜，d 價錢有 d 仲貴過錢家，所以都係算了~

 

之後姑娘就同我駁機，check 埋 bb 的心跳，又隔半個鐘就過來幫我量血壓，因為我 d 血壓仍然偏高，醫生要我食多一次降血壓藥~

大約 4:30pm，姑娘話可以比我落床，但唔建議我出病房外，因為我 d 血壓始終都係偏高，最好留係床上好 d，所以我唯有等到 5:00pm 先可以見到老公喇~

我隔離床同埋對面床果 2 位媽媽，就係超唔忍得痛，由我入院到而家，一直係咁叫，但原來佢哋係一度都未開，又唔係有規則的陣痛，只係見紅 only，姑娘話駁機 check 都唔係有好強烈的陣痛啫，駛唔駛係咁叫呀?? 真係聽到佢哋 d 叫聲，攪到我都有 d 驚到時我唔知會點~

5:00pm 老公就入咗來陪我直到 8:00pm，老公都話果個位媽媽有無真係咁痛呀，佢哋真係未停過係咁叫痛的，老公話我今晚慘了，肯定比佢哋攪到瞓唔到~

塞藥後都無乜太大反應，只係耐唔中有少少谷 m 痛咁，但唔係有規律的~

大約到咗 10:00pm 度，就開始 feel 到 d 谷 m 痛強烈咗好多，但仲係可以接受的，所以我就係床上曲埋身瞓，可以減到少少痛，仲瞓咗一陣添~

到大約 12 點度，谷 m 完全無晒，我估係 d 藥力過咗，咁我就去洗手間先，打算再瞓過啦，點知聽到隔離床個媽媽係度喊，要求打止痛針，但姑娘唔肯，話因為佢一度都未開，咁快就要打止痛針，咁之後真正陣痛時點頂呀?

之後我又瞓過，瞓到大約 3 點半，果 2 位媽媽又係咁叫痛，姑娘都忍唔住過來叫佢哋靜 d，話佢哋係成個病房叫得最大聲，咁會影響到其他人休息，佢哋係咁同姑娘講好痛，叫姑娘幫佢哋 check 下，夠度數落產房未，點知 check 完後，姑娘話佢哋一度都未開，叫佢再忍下~

就係咁我成晚就比佢哋 d 叫聲，仲有每 2 個鐘過來同我量血壓 d 姑娘，攪到成晚都瞓得唔好，但出奇地，我仲好好精神wor，可能知道今日要迎接彤彤的誕生~