Sharon, Victor and Tung Tung 幸福之家: 特別的 Halloween 慶祝活動

二零一五年十月三十一日星期六

今日係 Halloween，一早起床仲諗緊帶彤彤去邊玩好，點知 ...... 變咗播道醫院 3 日 2 夜之旅~

件事係咁的，話說近排條頸、左邊肩膀同埋左手都好痛，係好似入面成條筋連埋一齊痛，咁就去睇醫生啦，睇完第一次只係好少少，所以再睇多次，仲打埋止痛針同埋食多一隻強力 d 嘅止痛藥~

點知食咗強力止痛藥第二日(28/10)，去便便時發現好多黑色水，起初以為係 d 藥令便便有顏色 (因為我無肚痛又無其他唔舒服)，所以就再觀察下先。第二日 (29/10) 唔知緊張定點，又去唔到便便 wor，第三日 (30/10) 終於有便便，雖然無黑色水，但清潔時係墨綠色 (唔係黑色，但又唔係啡色，係啡黑偏黑果隻)，心裡面有 d 擔心，同老公同埋我父母講咗，佢哋都叫我同返醫生講，睇下係藥物影定其他問題~

所以今日 (31/10) 就打電話去問下醫生先，醫生聽完就話似係痾血，好大機會係胃出血，但要入院照過胃鏡先可以知道真正原因。

聽到呢度，我已經好驚，醫生叫我快 d 落佢醫務所，比佢做 d 簡單檢查，睇下我嘅情況先~

所以我同老公就即刻落去醫務所，又叫咗公公婆婆過嚟我家，幫手睇住彤彤先~

醫生先幫我量血壓，唔知係唔係太緊張，竟然高到不得了 (188/125)，我都嚇咗一嚇，之後醫生叫快 d 入院，最好即去急症室，佢可以寫紙比我，但我唔想入政府醫院，因為怕唔知等幾耐先排到照胃鏡，又驚無得麻醉咗先照胃鏡會好辛苦，再加上我公司有住院保險包，應該都 claim 到部份錢，所以我要求去私家醫院~

醫生好好人，即時幫我打電話去播道 (佢掛單醫院) 問今日有無位照胃鏡同埋有無床位，醫院果邊好快就 confirm 5:00pm 有位，所以醫生就叫我回家拎返少少日用品，就即時入院，醫生話大約預 15-20K 出院~

2 點半去到播道醫院，即時辦理入院手續，3 點前就已經上到我果個床位，根住有姑娘嚟問診，之後叫我換咗手術袍先，再幫我係右手種豆同埋吊葡萄糖~

大約4 點半，醫生都到咗，佢知道我驚，都安慰咗我一陣，之後就叫姑娘幫我過床，準備去照胃鏡~

入到一間小型手術室，醫生見我仲係好驚，就係度攪下笑攪下氣氛，之後有位姑娘幫我係口入面噴咗一啖好苦嘅藥水，再聽到醫生話而家幫你打麻醉針，個「針」一講完我就瞓著了~

唔知過咗幾耐，我開始有返知覺，聽到醫生係度講：「好嚴重嘅胃潰瘍，都好多年未遇過呢 d 咁嚴重嘅 case了」之後我就被推回病房 (果時可能麻醉藥岩岩過，我都唔係好記得點樣返到病房)~

過咗一陣，醫生就嚟到我床位，話我知我有嚴重胃潰瘍，仲要唔係因為今次食止痛而引起，應該一直都有，而我自己唔知，而今次嘅止痛藥，令我有一個新嘅傷口，不過見到已經結咗蕉，暫時無再流血，而其他舊傷口，都有6 個，佢要我留院吊胃藥，等個胃快 d 好返，但由於 d 胃藥要經生理鹽水吊入身體，所以左手都要種埋豆~

姑娘幫我係左手種豆，點知第一次唔成功，仲要拮到我勁痛，佢話等我休息一陣再試。

之後有另一位姑娘嚟幫我再種豆，呢次就成功喇，所以今晚兩隻手都插晒針，唔可以落地了~

晚上奶奶同埋姑仔都嚟咗探我，大家都覺得，好彩 check 一 check ，唔係都唔知有胃潰瘍~

奶奶同埋姑仔就陪我到 9 點半回家，而老公就陪我到晚上 10 點先回家~

左手吊嘅胃藥~

晚上 11 點幾，醫生打電話比我，佢話我情況比較嚴重，佢建議我留多一日院，再吊多一日胃藥，等 d 傷口快 d 好返，問我同唔同意，聽到佢咁講，我當然話好啦~

二零一五年十一月一日星期日

今朝老公 9 點幾就嚟咗陪我，而醫生 10 點嚟巡房，同我解釋返我份驗血報告，同埋比我睇返照胃鏡果 d 片，主要問題都係胃潰瘍，要好好調理，出院後至少要食 3 個月藥，之後要再照多一次胃鏡，睇下好返晒未~

另外，驗血報告話我有點貧血，同埋膽固醇有點高，貧血應該係因為之前出血太多，而家無再出血，問題應該不大~

醫生都覺得奇怪，點解我胃潰瘍咁嚴重，竟然唔覺得痛，唯一解釋係太痛，胃部神經已經麻木咗，所以我唔覺得痛~

同埋醫生估計，我平時應該比自己壓力太大(其實我自己真係唔覺有好大壓力，可能我份人成日都好心急，又對所有嘢都有要求，所以做成壓力而不知)，所以先令我有慢性胃潰瘍~

另外，右手嘅葡萄糖已經吊完，唔駛再吊，所以我可以落地行下。雖然醫生比我食返固體食物，但由於照完胃鏡，喉嚨有少少痛，所以我都係繼續食粥。

中午嘅時候，奶奶都嚟咗探我，仲帶咗一大壺粥比我分 2 餐食，仲陪我傾咗一陣計，之後先回家，而老公就陪我到晚上 10 點先回家~