2 天半 FTM 生活

二零一五年十一月二日     星期一

上午出咗院，就即時回家快手梳洗，但都趕唔切帶彤彤返學，所以唯有先過去公公婆婆家，食飯同埋休息一下先，到4 點鐘，就同公公一齊出發去接彤彤放學，比個驚喜佢~ (事前我哋無同佢講過的)

由於彤彤學校離家比較遠 (要行 20 分鐘度)，所以我哋就去搭唯一一架岩路嘅車 - E22 (好貴呀，搭幾個站都要 $18)，點知遇著塞車，無車返到嚟，等到成 4:30 先有車返 (彤彤放學放 4:45)，我哋落車時，已經 4:48 了，所以入到學校，大部份家長接送的小朋友都離開晒學校，而彤彤就好心急咁，同班主任何老師一齊企係課室門口四圍望，當見到我同公公出現時，即時笑晒口咁跳跳下，仲同何老師講：「媽咪嚟咗接我放學呀~」

跟住我就拖住彤彤行出學校，彤彤就同老師們講 bye bye，老師就笑彤彤：「今日媽咪接放學，自己行，好叻 wor ，唔駛公公抱~」 (因為平時公公接放學，一出課室門口，彤彤就要公公抱，好少肯自己行，連老師們都叫佢要自己行多 d~

等巴士回家時，彤彤好開心咁同我分享，今日係學校係嘢，又同我講：「媽咪嚟接放學，彤彤好開心呀~」 (可以嚟接放學，媽咪都好開心呀，媽咪都好想成日嚟，可惜要返工搵錢，無辦法，但媽咪應承你，只要就到時間，我一定會接送你返學/放學的)





上到巴士，彤彤話要同媽咪坐，唔同公公坐，全程仲巴士上唱歌添~ (媽咪知道你真係好開心呢~)




二零一五年十一月三日     星期二

放病假嘅第二天，今朝老公如常帶彤彤過去公公婆婆家，而我就係家中再瞓多一陣休息下先~

瞓到 11 點就起床，之後就過公公婆婆家食飯，彤彤見到我出現，又係好開心，仲問我 Daddy 唔會唔嚟帶佢返學? (可惜 Daddy 要返工呢，Daddy 都好想接送你返學嫁)

12:05 我哋就出門，係平台公園仲影咗一陣相，先慢慢行過去巴士站搭車~



睇下彤彤個樣笑得幾開心~







我哋大約 12:35 就去到學校附近嘅商場，彤彤話要有我去睇魚魚，我初時以為係酒樓入面果 d 大魚缸，原來係一間美容院門口的魚缸擺設~

睇完魚魚，再行多陣商場，我就行返去學校準備返學喇，而彤彤就好開心咁行入學校，仲問我會唔會接佢放學，我當然話會啦~



送完彤彤返學，我同公公，就約埋婆婆一齊，去 Supermarket 行下，睇下有無嘢買，幫手拎回家，之後我就瞓咗一陣教，又夠鐘出去接彤彤放學喇!~

今日我同公公都好早就到咗學校，仲聽到校長帶領小朋友們一齊唱放學歌添~

夠鐘就可以入去學校接放學，彤彤見到我又嚟接佢放學，又係好開心咁跳住行出嚟，又係唔駛公公抱，話要自己拖住媽咪行，所以又比老師們笑佢平時蝦公公~






二零一五年十一月四日     星期三

放埋今日病假，明天就要返工喇，真係有點唔捨得添~

今朝老公如常帶彤彤過去公公婆婆家，而我就係家中再瞓多一陣休息下先~

大約 10 點半度，我就過公公婆婆家食飯，彤彤見到我出現，又係好開心，其實媽咪都好開心嫁~

12:05 我哋就出門，又係平台公園仲影咗一陣相，先慢慢行過去巴士站搭車~







去到學校附近嘅商場，又係帶彤彤四圍行一陣先~







到 12:45 先慢慢行過去學校，有媽咪帶返學，全程都係自己行嫁，仲好開心咁跳跳下咁行添~



由於今日早咗少少，學校未入得住，我哋就係學校門口 d 石橩坐下先，彤彤就四圍睇下有螞蟻，當發現到時，仲話比公公知添~









拎埋體溫表，就可以入學校喇~

送咗彤彤入學校，我同公公就回家先~





到 4 點 3 又出發去學校接彤彤放學，同時要話比彤彤知，媽咪明天開始要返工喇，暫時都唔可以再接送佢住，要乖乖聽公公話呀!~

就係咁，2 天半嘅 FTM 生活就此結束了~