馬年第一個工作日 + 彤彤病到了~

二零一四年二月四日     星期二

 

一連 4 天嘅新年假期，話咁快就放完，但放假有時仲辛苦過返工，因為要湊住彤彤四圍去拜年，仲要拎住 d 賀年禮盒同埋彤彤個奶粉袋四圍走，真係少 d 精力都唔得呀!~

 

今日馬年第一日開工，希望今年工作事事順利，特別係老公份工~

 

今日返公司，其實都無乜嘢做，都係派同收下利是咁，lunch 就同同事食餐飯，下午都係無乜嘢做咁就到收工時間了~

 

放工後同老公食飯，之後返我父母家接彤彤，點知一摸，彤彤又係手腳熱熱地，摸下個頭仔又係熱熱地，探一探原來發燒，不過唔係好高，只係 38.5 度~

 

其實尋晚見佢都有 d 熱，但又無發燒，今日已經叫我父母留意住佢，如果發燒就通知我，但就全日都無事，到晚上先真係發出來~

 

由於仲係新年關係，好多醫生都未開門應診，所以我哋就即時同彤彤出去法國醫院睇夜診~

 

我哋大約 9:20pm 到達，之後就同彤彤登記同埋探熱 (38.6 度) & 磅重 (9.74 kg) ，姑娘話今晚暫時得一位醫生，同埋仲有 22 個先到彤彤，可能要等 2 個鐘，都無辦法要照等啦，好彩我哋出來時，比咗次退燒藥佢食，又貼定退熱貼係頭上，所以都有時間可以等下的~

 

 

一路等到 10 點度，多咗一位醫生返來，所以都睇得快咗，大約 10:20pm 就到彤彤入去睇了~

 

今次呢位醫生好細心呀，又幫彤彤慢慢聽佢個肺清唔清，又照下佢個喉嚨，仲慢慢觀察彤彤嘅反應，醫生仲講笑咁話，彤彤睇落咁精神，反應又快，應該無乜大唔舒服~

 

醫生話彤彤有少少感冒，可能係呢幾日天氣突然熱咗焗一焗親，應該無乜大問題，之後我哋就出返去拎藥~

 

今次等拎藥嘅時間好快呀，交咗藥單後 5 分鐘度就可以拎藥了~

 

 

 

今次埋單仲平過上次，只係 $401，真係算平的了~

 

 

 

拎完藥我哋就回家，返到家中都係11:30pm ，之後就餵彤彤飲奶同食藥，之後就陪佢瞓了~

 

食咗藥嘅彤彤，好快就瞓著咗，仲瞓得好"林"添~

 

第二日，我都無返工，留在家中陪彤彤，彤彤一起身就已經好精神，食咗藥退晒燒，成個人都唔同咗，見我用手機影佢，佢仲係咁撲埋來我度想搶我部電話添~