清胎毒糖水

由於想阿 b 係預產期前出來，所以呢個星期日日都食唔同的清胎毒糖水，不過來來去去都係得 2 款選擇啫，希望阿 b 乖啦，要係預產期前自己作動出來呀!~

第十三次政府產檢 (38wks2d)

二零一二年十一月六日 星期二

今日又係約咗 11:30am 返去 QE 做產檢，由於係當日最後一批產檢的時間，所以又係唔太多人，去到都係先驗小便，再磅重同埋量血壓，今日嘅血壓好正常 (117/57)，但係驗小便就 2 次都驗到有蛋白尿，仲要係 2個+ 添~

大約得到 12:15pm 就可以入房見醫生，都係醫生過來按肚，睇下阿 b 的位置，同埋聽下阿 b 的心跳咁~

之後醫生就話我今日驗到有蛋白尿，加上對腳有少少水腫，同埋之前又有血壓高(雖然今日正常)，所以安全起見，要我留 2 枝小便的樣本拎去種菌，睇下係唔係尿道炎，另外亦要抽 3 枝血化驗，睇下會唔會係有妊娠毒血症~

醫生話個驗血報告應該 1-2 日就會有，有問題會即時打電話比我，叫我即時入院催生，至於小便化驗報告，因為要種菌，所以要下星期返來做產檢時先會同我講返~

之後就叫我出開面的 counter，book 下一次的產檢日期，book 完後就可以去抽血，同埋留小便樣本，之後就可以離開了~

溫暖牌 bb 被仔

今日行過 jusco 的 living plaza，見到有好多冷同埋織冷衫的工具賣，見下星期就開始放產假，認唔住手痕，就買咗冷針同埋 10 舊冷，諗住係我放產假時，織返張溫暖牌被仔比阿 b~

晚上食飽飯回家後，就馬上開工，織咗 4 個鐘，用咗 2 舊冷，只係得咁短咋，同埋睇落都唔係好夠冷，要再去買多 d 冷回來先得，我估要買多 10 舊先夠~

公公婆婆的禮物

我父母一直都話想買對鈪仔比阿 b 做滿禮物，不過我之前成日話唔駛咁心急住，太早買怕 bb 小氣，但而家既然都足月了 (37wks 就已經係足月喇)，又見金價跌咗少少 ($17130)，所以今日就去咗買鈪了~

阿 b 你睇公公婆婆對你幾好，你未出世就已經送咁大份禮物比你呀，遲 d 媽咪坐完月要返工，就係公公婆婆幫手照顧你嫁喇，你第時大過咗，要孝順多 d 佢哋呀!~

第九次私家產檢 (37wks5d)

二零一二年十一月二日 星期五

今日 book 咗靳醫生 7:50pm 的，但我哋早咗，7:30pm就上到去，已經有多人係度等緊，睇來有排先有得睇~

姑娘叫我先驗小便，之後就叫我坐係 sofa 等，再過咗陣，就叫我入去量血壓，今日量出來有 d 高 150/92，姑娘話有 d 高 wor，之後就叫我返出開面等，大約等到 8:45 pm 先到輪到我哋~

入到去見到靳醫生，靳醫生又係問下有冇唔舒服，阿 B 郁得好唔好果 d 問題，之後就話今日同我 check 埋盤骨大細~

之後靳醫生就叫我瞓上床，等佢睇下阿 b 而家個情況先~

(阿 B 的心跳)

(阿 B 的頭圍)

(阿 B 的尾龍骨) 

(阿 B 的肚圍)

(阿 B 的大脾骨長度) 

之後靳醫生幫我照埋阿 b 個 4d 樣，照的時候，阿 b 初時係用隻手遮住咗塊面的，之後靳醫生拍下我個肚，阿 b 不斷郁來郁去，所以都唔係睇得好清楚，不過都比我哋睇到阿 b 個嘴仔郁郁下咁，好得意呢~

今次睇落阿 b 塊面仔都係有 d 肉地，肥嘟嘟咁，同埋阿 b 將自己個頭壓埋我個肚度，所以攪到好似扁咗咁，又闊口闊面咁~

不過靳醫生話阿 b 只係塊面前多 d 肉，個身型都 ok，係中等 size，唔算肥，同埋應該係高妹來的，因為大脾骨大咗個幾星期呀，而家係 100 個bb 入面，都係大約排 75 度，係中碼偏大 size 的 bb 來~

睇完阿 b 個樣，靳醫生就幫我度下盤骨大細，方法係伸 2 隻手指入去，再左右按下，見痛就出聲，度緊的時間，靳醫生又襟下阿 b，睇下佢會唔會落低 d，點知阿 b 唔肯郁 lor，靳醫生話阿 b 唔想咁快出來咁 wor，仲話今次仲落得少過上次，上次都有 1/3 呀，今日連 1/3 都無呀~

度完後，靳醫生話我個盤骨唔算好闊，好彩阿 b 唔算好大隻，如果係預產期前作動都可以試順產的，我可以用做無痛分娩，但要係 24小時內生阿 b 出來，佢唔會幫我落藥催生，亦唔會用產鋏 or 真空吸盤，因為 24 小時內生唔出，一般都唔夠位生的了，所以會幫我開刀；如果預產期之後都唔作動就直接開刀會好 d，因為阿 b 開始大隻，佢驚阿 b 唔夠位出來~

所以靳醫生叫我回家諗一諗，睇下揀定邊日開刀的日子 (20 - 26/11 是旦一日都 ok)，下星期返去做產檢時，幫我 book 定手術室，如果阿 b 乖，肯係預產期前出來，就可以到時先 cancel 返個手術室 booking~

坐月補身藥材

早係 8 月頭的時候，就已經請咗個陪月，當時陪月姨姨比咗張坐月補身需要用到的藥材清單比我，奶奶知道後就叫我拎比佢，等佢幫我買~



奶奶見阿 b 都差唔多出世，就係 10 月中幫我買咗，買的分量，同埋種類都比陪月姨姨的清單上為多添，我哋話比返錢佢，佢又唔肯收，攪到我哋有 d 唔好意思，要奶奶用咗咁多錢~


下面係奶奶送的藥材: 

南棗、紅棗、鹿尾巴切片、鮑汁螺片、罐頭鮑魚、黨蔘、白蓮子、雪耳、杞子、花旗蔘、淮山、冬蟲草、百合、桂圓肉、合核肉、杜仲、北芪、鹿茸、海玉竹

下面係老公的阿姨送的藥材: 

花膠、高麗蔘、燕窩

真係多謝晒奶奶同埋老公阿姨呢!~

第十二次政府產檢 (37wks2d)

二零一二年十月三十日 星期二

今日約咗 11:30am 返去 QE 做產檢，可能係當日最後一批產檢的時間，所以唔太多人，每次去到都係先驗小便，再磅重同埋量血壓，今日嘅血壓有少少高(148/87)，所以要等一陣去量多次，第 2 次就正常返晒 (111/57)~

大約得到 12:10pm 先可以入房見醫生，都係醫生過來按肚，睇下阿 b 的位置，同埋聽下阿 b 的心跳咁~

之後就問返醫生上星期 d 報告出咗未，醫生話驗過血色素好正常，應該唔係貧血，而頭暈係懷孕後期係會成日出現的，只要 d 血壓 keep 得好，就唔緊要，生完 bb 後應該就唔會再有頭暈的情況~

我再問埋 B 鏈個報告有未，開頭醫生睇 file 就搵唔到有，之後就幫我係電腦度 check，就話出咗報告，一切正常，無中到 B 鏈~

之後就叫我出開面的 counter，book 下一次的產檢日期，book 完後就可以離開了~

煲姜醋

早係 10 月頭，奶奶同埋老公的阿姨就已經籌備煲姜醋的了~

先係去買八珍的醋啦，又去買姜，之後又叫姑仔個工人幫手刮姜皮，又要吹乾 d 姜同 d 姜皮留返比我坐月時用來沖涼，之後就要炒姜，同開始煲姜醋，一共煲咗 3 大煲呀，真係辛苦晒各位呢~

第九次見私家內科醫生 (36wks6d)

二零一二年十月廿七日     星期六

今日約咗 11:30am 見盧醫生，我哋準時到達，但要等到 11:45am 先可以入去見盧醫生~

盧醫生見到我，就問返我個情況，我同佢講返，加咗藥之後，在家量的血壓都係差唔多，同埋仍然有頭暈的情況出現~

另外，亦都有同佢提及，QE 果邊覺得我呢個度數的血壓，唔應該會令我出現頭暈的，所以同我抽咗血去驗血色素，睇下會唔會有機係貧血~

之後盧醫生就問我，係乜情況下出現頭暈，同埋出現頭暈時，有無即時量下 d 血壓，睇下有無升高? 我就同佢講，多數都係瞓醒時，準備落床，或者係坐坐下轉姿勢時會出現頭暈，同埋見頭暈時，我都有量過血壓的，都係差唔多，唔會特別高的~

咁廬醫生就先檢查我的下眼皮，佢話 d 血色咁紅潤，應該就唔似係貧血，跟住就幫我量血壓，量咗幾次都係大約 115/70，所以睇落都唔似係因為血壓高而頭暈，同埋聽完我講話多數係姿勢轉換時會頭暈，佢覺得我似係耳水不平衡多 d，佢話好多孕婦到懷孕後期都會有的，而家懷孕期間，無嘢可以做，只係可以減少郁動頭部就可以~

之後廬醫生就問我同咗靳醫生傾順產定開刀未? 我話同佢講返，靳醫生話如果盤骨夠大都可以試順產的，如果唔夠就直接開刀~

盧醫生就同我哋講，以佢個人立場，佢覺得如果我真係好想順產，佢覺得應該返 QE 生會好 d，佢擔心我到時作動時，d陣痛會令我血壓急升，到時係私家比人捉入 ICU 都會襟計，叫我哋考慮清楚~

另外，廬醫生話比佢揀，佢首選一定係揀開刀，因為風險係最低的，但當然都會尊重我的意願~

傾傾下，我又有 d 頭暈，所以就話比廬醫生知，同埋請佢即時幫我量多次血壓，今次量出來都係同頭先差唔多，所以更加肯定我的頭暈唔關血壓事，似係耳水不平衡多 d (因為我一路聽廬醫生講嘢，一路有點頭的)~

仲有就係，我今日有拎埋家中的血壓計來，因為我覺得個血壓計有 d 唔準，成日量出來都偏高，有時又 "cool" 到隻手好緊 wor，所以就想拎埋來比對下廬醫生度出來的度數，同我自己個血壓計的度數岩唔岩，結果相差成 20 度呀，廬醫生話應該我果個血壓計有 d 唔準呢~

同埋廬醫生話，血壓計的運作好簡單，正常係唔會 "cool" 得好緊的，只有佢搵唔到條血管來度的時候，先會不斷收緊，如果個血壓計成日都有呢個情況，就即係開始有問題~

今日同廬醫生傾咗好耐呀，傾咗半個鐘有多，之後廬醫生叫我 2 星期後再返來見到次佢 (如果我未生的話)，睇下仲有乜嘢可以幫到手~

永安 Pre-sales 大減價、荃灣廣場吉之島搬遷大減價及媽媽會禮物

呢排永安又做大減價，當然要去睇下有乜平嘢啦，今次我哋買咗幾樣嘢~

 (電奶揼 - 8 折後 $1592)

原先無諗住咁快買個電奶揼的，因為驚阿 b 唔知到時肯唔肯食人奶，又驚到時我唔知夠唔夠奶比阿 b 食，但見到呢個價錢，真係平見過行貨有咁平的，所以決定買咗先~

 (睡袋 - 7 折後 $170.1)

(仿羊毛衫 - 折後 $51 一件)

(仿羊毛衫 - 12m)

(仿羊毛衫 - 6m)

另外，荃灣廣場果間吉之島要搬，又做緊大減價，所以我哋有時間又過咗去行咗轉，但收穫不大，只係買咗一件衫比阿 b~

 (厚 jacket - 90碼，折後 $57.5)

早幾日收到雪印家庭寄來的禮物，係一本寶寶成長印記~

第十一次政府產檢 - 驗 B 鏈球菌 (36wks4d)

二零一二年十月廿五日 星期四

原先今次的產檢應係 23/10 的，但由於係重陽節的關係，所以就改咗係今日返去~

今日約咗 3:00pm 返去 QE 做產檢，老公都有陪埋我去，因為我哋想問埋 QE d 醫生的意見，睇下我 d 血壓高的問題，會唔會影響我生 b 等等~

我哋大約 3:00pm 就到達，今日勁多人呀，可能之前有日假期的關係，所以將果日的 booking group 埋之後果 1-2 日睇，姑娘話今日下午的都係額外加插的，平時只得上午係有產檢的~

見醫生前又係先驗小便，再磅重同埋量血壓，今日嘅血壓有好正常(127/70)，但我今日都仲係耐唔時有 dd 暈的，所以我有少少懷疑係唔係量錯咗，之後過咗一陣，我又去量多 2 次，但都唔係話好高，只係 141/83 同埋 141/94，真係奇怪~

大約等到 4:10pm 就到我哋入去，姑娘先幫我拎咗 d 分泌，用來 check 有無中到 B 鏈球菌，之後就由醫生來按肚，睇下阿 b 的位置，同埋聽下阿 b 的心跳~

之後我哋就過咗去醫生檯果邊，同醫生傾下我血壓高的問題，但醫生話我 d 血壓都唔係好高，只係偏高 only，不算真正的血壓高，佢話真正的妊娠血壓高係去到 180/100 以上的，同埋佢話睇我而家呢個度數的血壓，應該唔會導致我出現頭暈的的情況，佢估可能有其他原因令我頭暈，所以叫我抽血驗下血色數，睇下會唔會係阿 b 開始大，吸收晒我 d 鐵質，令我出現貧血~

另外我哋又問醫生，到我作動時，會唔會導致我 d 血壓急升，佢話唔排除呢個可能，咁我哋問有無方法可以幫到我，佢就建議我用無痛分娩，但有可以生 b 時唔識用力，要早少少停麻醉藥會好 d，如果再唔得，就可能要緊急開刀云云~

之後醫生就話我而家都 36週有多了，之後的產檢要變為 1 星期一次，叫我哋出返去 5 號 counter 約下次產檢的期，臨出去前，醫生叫我下次記住要問返今日做的 checking 的報告~

之後我哋就落咗去 2 樓抽血，但個抽血員 d 態度好差，手勢更加差，我係 QE 抽咁多次血，未試過見痛的，佢插針果下已經見痛，之後又抽唔到血 wor，就不斷係果個位拉扯咗幾次，先慢慢有 d 血出來，出出下又無血，又再拉扯多幾次，之後又有少少血抽到，如是者比佢拉扯咗好多次，先抽到 1 支血，回家後仲發現條血管谷咗瘀血添~

佈置 bb 床

二零一二年十月廿三日 星期二

今日係重陽節，趁住有假放，就執埋個走佬袋先~

之後見有時間，就開始動手佈置阿 b 張床仔，咁樣攪又攪又整咗 2-3 個鐘，之後諗住係 sofa 休息一陣，就出去行下街同埋食返個 tea 的，點知太攰，竟然瞓著咗，一瞓就瞓咗 3 個鐘，所以今日全日都無出過街呢~

阿 b 你鍾意嗎 ?

第八次私家產檢 (35wks5d)

二零一二年十月十九日 星期五

今日 book 咗靳醫生 7:30pm 的，準時上到去，唔太多人係度等，應該好快就有得睇~

姑娘叫我先驗小便，之後就叫我坐係 sofa 等，再過咗陣，就叫我入去量血壓，唔知係驚定緊張定真係血壓高，量出來竟然係 165/86，姑娘話乜咁高嘅，我當時無出聲，之後就叫我繼續坐係度，下個到我入去睇~

入到去見到靳醫生，我都未出聲，靳醫生已經先出聲話我d血壓好高wor，近排有冇唔舒服，咁我講返近2星期自己在家量血壓都偏高，又有時會頭暈，同埋盧醫生幫我加咗藥比佢聽~



之後佢建議 book 定38週後的開刀日子先，等38週時 check 下盤骨夠唔夠大，如果好多位先揀順產，到時都可以 cancel
個手術室 booking，因為阿B易出，可減少用力而令血壓上升，如果盤骨個位只係剛剛夠位，就開刀生好d~

另外，我又問佢好唔好用無痛分娩，佢唔建議用，因為如果用咗無痛分娩，而子宮頸又開得慢or無乜反應，就要轉緊急開刀，到時又要比多次麻醉師的費用，又要比附加費比佢同醫院，起碼多2萬，唔太值得~

另外，如果作動時已feel到自己有頭痛or頭暈，就去QE生好d，因為入c+生，如果出現抽筋情況，會被送入lCU，保守估計，大約要2萬一日，止少要留2日，條數好襟計，佢覺得唔值~

之後靳醫生就叫我瞓上床，等佢睇下阿 b 而家個情況先~

(阿 B 的心跳
(阿 B 的頭圍)

(阿 B 的肚圍)

(阿 B 的大脾骨長度) 

之後靳醫生幫我照埋阿 b 個 4d 樣，照的時候，阿 b 初時係用隻手遮住咗半邊面的，之後靳醫生拍下我個肚，阿 b 就拎開咗隻手，比我哋睇到佢個樣呀，仲有正面睇添~

今次睇落阿 b 塊面仔無上次咁多肉，但都係有 d 肉地嘅，肥嘟嘟咁，不過靳醫生話阿 b 只係塊面前多 d 肉，個身型都 ok，係中等 size，唔算肥，同埋應該係高妹來的，因為大脾骨大咗個幾星期呀~

而家係 100 個bb 入面，都係大約排 70 度，係中碼偏大 size 的 bb 來~

同埋阿B而家先落咗3份1產道咋，醫生話佢應該唔會咁早出來，而家都成6磅 半，仲有4星期，起碼都7磅 半至8磅 ，聽完佢估阿 b 的重量，我真係有d驚好難生，再加上佢話肥人並不代表盤骨大的~



而家真係好驚2星期後 check 完盤骨唔夠濶，令BB難出來，而令我要開刀；又驚可以順產時，因為太痛而令血壓上升／抽筋，比人捉咗去lCU，唔知幾錢埋單；又驚開刀唔知有幾痛，咁多樣嘢擔心，d血壓想正常都難啦~

二零一二年十月廿日 星期六

唔知阿B係唔係錫住媽媽，今日早午晚量咗3次血壓，都好正常（12x-13x / 7x-8x)，希望可以保持住，直到生咗阿B為止~