爬到了~

二零一三年七月三日     星期三

今日同老公都因為感冒，所以無返工，變相多咗一日假期同彤彤玩，但結果我哋三個掛住瞓教多 d lor~

瞓咗成日，到咗晚上個人先精神好 d，先可以同彤彤玩下~

今晚如常係床上同彤彤玩，用公仔引下彤彤，等佢試下去爬，佢竟然真係識爬到呀, 唔係拖住來爬，係真係用膝蓋來爬的，我仲即時影低咗，又叫埋老公一齊睇添~

壞蛋獎門人2 @ 青衣城

二零一三年七月一日     星期一

今日係長假期嘅最後一日，由於打風關係，我哋揀咗去港鐵沿線嘅商場來行，起碼落雨都唔駛驚整濕身嘛~

所以我哋今日就去咗青衣城，仲可以去影下相添，因為果度有「壞蛋獎門人2」嘅佈置~

學企

彤彤呢排除咗學爬外，仲學緊企，好鍾意扶住嘢企，但佢對腳仔又唔夠力，所以唔可以自己扶住嘢企，要靠其他人扶住佢先可以企到~

如果附近無其他人可以扶佢，咁點算呢? 咪唯有跪係度 lor，但我哋見佢有嘗試企起身的，但腳仔仍然未夠力，暫時只可以跪係度~

Shopping Day~

二零一三年六月三十日      星期日

今日係長假期嘅第二日，因為今晚要返我父母家食飯，所以費事帶彤彤去咁遠，近近去咗佐敦行下永安~

等咗成朝見我哋都未出街，彤彤係度扭計，扭我哋快 d 出街，ha ha....

過到去永安，先知係什麼震撼減價日 wor，點知人又多， d 嘢又唔係好平，所以都無乜嘢買，係老公買咗對波鞋~

之後我哋過咗去卓悅睇下 Merries 大碼片片有貨未 (之前搵咗好耐都未有貨，要買住其他牌未用住先)，點知好好彩仲有 2 包 wor，即時買咗先，費事比 d b6 掃埋，之後我哋見時間尚早，就去 Coffee Shop 坐下 hea 一陣，再返藍田~

再買埋 3 罐奶粉上我父母度，d 奶粉又加咗 $1 一罐，唉~

今日買咗好多彤彤嘅嘢，拎到我哋 c c 下~

學爬變咗做掌上壓?!

彤彤仲未識爬，仲係努力學習中，好辛苦先爬到一步，而家大部分時間都係好似做掌上壓咁撐係度~



彤彤：媽咪叫我做掌上壓，練下力量wor~

彤彤：我就快頂唔住喇~

彤彤：我要頂埋佢，加油呀~

彤彤：好攰呀~

彤彤：都係唔練喇，食下手手好過~

新城市廣場 & 荃灣一田

二零一三年六月廿九日   星期六

今日係長假期嘅第一天，一早 7 點幾就比彤彤 d 喊聲叫醒咗，因為彤彤肚仔餓，所以唯有起身開奶，餵完奶又瞓唔返，所以就起身煲定粥仔比彤彤一陣食，但彤彤就好快瞓返 lu~

自從有高人指點，煲粥仔要放 2 粒蜜棗落去煲，彤彤開始鍾意食粥粥喇，仲會追食，比遲少少都唔得添，所以而家放心晒~

今日煲咗南瓜肉片粥，等彤彤瞓醒咗，就同佢沖涼洗頭，之後就餵埋粥仔，就換衫出街街，攪得來都成一點先出到門口~

今日真係好鬼熱，所以都幫彤彤塗定 d 防曬先得，唔係費事曬黑晒 (本身皮膚都有少少黑)，仲要戴埋太陽帽先掂~

點知一出到街，可能太熱了，彤彤熱到無晒表情咁，吽晒~

我哋先去沙田行下街先，因為果度好似有 d 羊仔佈置，可以影下相相，去到沙田就去咗 Spaghetti 360 食 lunch & tea~

食飽諗住影下 d 羊仔，點知有活動進行緊，比人圍住晒入唔到去影，所以唯有係外圍影下就算~

之後行咗一陣玩具反斗城同埋 Mothercare ，見到 d 佈置解封咗，諗住入去影下啦，點知彤彤呢個時候先來瞓教，咁就算數唔影了，搭車過去荃灣行下新開嘅一田先~

過到荃灣廣場，嘩..... 勁多人，呢個商場從來未試過咁多人，一田效應真係勁~

再行入一田，真係多人到爆，其實仲撞到我個 friend 一家四口，佢哋又係來行一田，行咗一陣見咁多人，我都轉戰隔離嘅 Aeon 好過，即時舒服晒，起碼唔駛同人迫嘛~

Happy Friday

二零一三年六月廿八日     星期五

返埋今日工，嚟緊有 3 日假期，所以返工嘅心情都特別好~

放工後，帶咗彤彤去油塘行一陣街，再食晚飯~

近排好鍾意過去油塘大本型呢個商場，貪佢夠近屋企(有綠 van 回家)，而且又唔駛係我父母果邊，孭住彤彤行斜路回家，所以我同老公而家多咗過來呢個商場食飯~

今次去咗 Riso Segreto 食，彤彤近排好鍾意睇餐牌，次次我哋同佢食飯，一見到個餐牌就會伸手出來拎，唔比佢掂/拎住，仲會扮喊添~

睇下，佢真係好認真咁睇嫁~

今晚叫咗個 2 人餐，都幾好味，又唔太貴 ($168 + 10%)~