早上出席完彤彤學校嘅家長會，我哋就返去公公婆婆家接返彤彤，之後就出發去迪士尼~
講返點解會揀今日入去，因為我哋早幾日 renew 咗張卡，趁住而家有續會85 折優惠，順勢 upgrade 埋去金卡，正所謂早買早享受，當然提早 upgrade 埋去金卡，有多成 7 個週末可以入場，咁就低上加低啦 (其實我哋張卡 2016 年 1 月頭先到期，但提早 renew 同 upgrade，可即時當金卡會員)~
原先以為今日唔係銀卡特選週末，應該唔係好多人啦，點知仲多人過之前嘅銀卡特選週末，真係估佢唔到~
今日仲特登同彤彤著咗公主裙入去，希望有緣同 Elas & Anna 影相啦~
我哋差不多 2 點先入到去，但 Winnie the Pooh 嘅 Fast Pass 已經派晒了，所以今日應該唔會玩呢樣喇!~
既然拎唔到 Winnie the Pooh 嘅Fast Pass，我哋就去火箭餐廳食 Lunch 先，之後先開始去玩~
食飽飽後，係火箭餐廳隔離見到巴斯光年出嚟，所以我哋就去排隊影相先~
彤彤好似有少少驚，表情有點緊張，但都肯走埋去影相~
影完相後，老公就陪彤彤玩太空飛碟，好彩只係排 10 分鐘度就有得玩~
之後我哋見巴斯光年無乜人排隊，所以就入去玩，排咗都無 5 分鐘就玩得，但我哋玩咗出返嚟時，竟然超多人排隊，門口個指示牌話琅排半個鐘，真係好彩~
原先彤彤想玩揸車，但門口個牌寫住要排一個鐘，所以我哋無玩到，去咗小小世界坐船，都要排 20 分鐘度~
之後老公就同彤彤排隊玩旋轉木馬，而我就去排定隊，等 Elsa & Anna 出嚟影相~
彤彤上次同唔到 Anna 影好失望，今日我一早問定職員，Elsa & Anna 會一齊出嚟，不過就要預早少少去排隊~
因為我早排定隊，但老公同彤彤都未排到玩旋轉木馬，所以我只好讓其他人影咗先，好彩佢哋都趕得切行過嚟，彤彤見到 Elsa & Anna 就即刻同佢哋講 Let's it go (其實我無教過佢的，可能同學仔教佢都唔定)，仲話好開心添~
影完相之後，我哋就行去反斗奇兵大本營，原先想同魯蘇影相的，但太多人所以無排到，彈弓奇又係好多人，所以又無排，最後只係玩咗降傘，都要排 45 分鐘先有得玩~
之後老公同彤彤就去玩迷離莊園，只係排了 20 分鐘就有得玩，而我就坐低休息一陣先~
我哋會合後，就趕返出去小鎮大街，諗住睇魔雪奇緣亮燈儀式，點知都係趕唔切，不過唔緊要，因為可以比彤彤睇飄雪，彤彤係咁話 Snowy Day，ha ha.....
之後就搵定個靚位，等睇晚間巡遊，順便比小小嘢彤彤食下，補充下體力先~
由於我哋想睇埋新嘅煙花先走，但仲有成 45 分鐘先開始，所以又去搵嘢玩下先，原先想去玩小飛象的，但係已經截咗龍，但彤彤話好想玩，跟住比佢見到小飛象嘅影相位，佢要求要影相，所以就幫佢影咗幾張，仲影完又影添，ha ha.....
之後我哋去玩多次巴斯光年，好彩無乜人排，排咗 5 分鐘就玩得~
玩完巴斯光年，又要快步行返去城堡，搵定靚位睇煙花，新版嘅煙花真係好靚，個城堡仲有不同嘅投射效果添，彤彤睇得好 hyper，不停話：「嘩...煙花好靚呀~」
臨離開前，影多張飄雪下嘅聖誕樹先~
沒有留言:
張貼留言