第一次見私家內科醫生 (12wks1d)

二零一二年五月七日 星期一

今日第一次見盧醫生，因為自從有咗 bb 之後，我 d 血壓就偏高, 所以靳醫生 refer 我去睇佢的~

第一次見面盧醫生好詳細咁問咗我有乜問題，又問下我平時的生活習慣、工作情況、家族有無高血壓等等~ 盧醫生之後仲解釋咗血壓高對孕婦同 bb 有乜影響，同埋唔同的血壓高，會有乜嘢併發症等~

傾完之後，都差唔多過咗 20 分鐘，佢就幫我量下 d 血壓，但出奇地一 d 都唔高，仲好正常添，所以佢估計我 d 血壓好易受自身情緒而影響 (e.g. 見到醫生會突然升高咗、遇到一 d 開心/唔開心的事又會有影響等等)，亦即係話我 d 血壓係比較波動，唔夠穩定，但呢個只係初步估計，要 check 下身體機能有無受血壓高而影響先知佢的估計岩唔岩，仲有要我每日早晚都要量血壓，然後 mark 低比佢睇下~

盧醫生叫我星期六朝早返來覆診，要空肚抽血去驗肝/腎功能，同埋睇下我在家時量的血壓係點~