敗家 shopping 之訂造睡房傢俬

自從有咗想生返個 bb 的諗法之後，而家好多嘢都會由小朋友的角度出發，睇下家中有乜嘢需要改善好先開始造人計劃~

初步睇，由於我哋間房的衣櫃空間實在太少，連我哋 2 個的衫的唔夠位放，如果有埋小朋友，都唔知 d 衫放邊好，所以我哋就係度諗，要搵人設計過間睡房，盡量善用空間，放最多的嘢先得~

呢個星期都係周圍行下睇下 d 傢俬鋪，叫佢哋報下價咁，最終我哋決定搵特格幫我哋設計，一來係實木傢俬耐用 d ，二來係價錢比高纖板都係貴 2k 度，所以都係做實木好了~

下面就係特格幫我哋設計的圖，我哋仲特別要求做子母床，咁第時有小朋友的時候，都可以比佢同我哋一齊瞓啦~

 

 

今日 confirm 咗 d 圖，12/9 可以送貨同安裝，真係快手啦~

敗家 shopping 之廚房浴室改善工程

呢排好敗家，買咗好多嘢，但買咗的嘢又好似有 d 唔等駛咁~ (老公都有提出呢個疑問 )

上個星期日行 megabox 的吉之島，買咗個電蒸籠 ($250)，買的時候老公問我係唔係真係咁有需要，果時我都唔係幾肯定真係有需要，不過為咗可以滿足我的購買慾，所以好肯定的答咗好有需要~

用咗一個星期，我真係覺得無買錯，因為真係好方便，一次過可以蒸熱 3 碟餸，而且仲係好短時間就 ok(大約 20 - 25 分鐘)，真係極度推薦各位 blogger 去買返個呀~

尋日陪表哥去睇樓，果個業主整得個廚房好整齊，有好多不锈鋼架掛晒係牆上面，好善用空間啦~

我睇過之後，都心郁郁想將我哋的廚房都整一下，所以等老公放工之後，我哋就去咗上海街行下睇下，結果買咗成千蚊返來~

老公今朝好早就起咗身，仲幫我鑽咗幾個 "lone"，我即時將尋日買返來的嘢掛上廚房的牆上~

連浴室都買咗個架，終於都可以丟咗舊果個生锈架喇~

懷孕前的身體檢查

二零一零年八月七日 (星期六)

一早起身過中環，因為我哋約咗今日做懷孕前的身體檢查，另外再加 check 膽固醇 & 乙肝抗體~

我哋大約 10:45am 就到達化驗所，根住就去咗 washroom 留 sample，然後就返回化驗所度高、磅重及量血壓~

由於我怕打針，今次仲話要抽血，前事我真係好驚啦~

好彩老公話抽血的時候會陪住我，我先放心 d 咋~

老公抽血先的，佢响間房度抽，我無入去，但坐係門口，聽到裡面有聲，係 d 換針筒的聲，果時勁驚啦~

老公抽完到我入去，原先個 staff 叫老公出返來的，但老公同個 staff 講，我怕打針，佢想係度陪我，所以先唔駛出返去~

老公又同我講話唔怕 wor，一 d 都唔痛，點知果 staff 話，唔痛就呃人的，少少咁啦 (真係比佢激死)~

根住就同我講，佢抽咁多次血，未試過整痛人，叫我放鬆 d~

我同佢講，聽人講有 d 吉幾次先搵到條血管啦，我好擔心啦~

根住佢話佢未試過咁 wor，呢 d 事唔會發生係佢身上嘅~

到真係抽血的時候，我唔敢望住，但出奇地我唔覺得痛，只係好似比 d 嘢彈了一下咁~

點知到最尾的時候，比個 staff 玩我，佢同我講話抽完喇，仲叫我望下，點知佢係抽完，但係枝針仲係吉住我隻手嫁，我睇住佢拎返枝針出來，真係有 d 驚啦~

抽完血，就出返去坐一陣就可以離開，等下星期六拎 report~

二零一零年八月十四日 (星期六)

今日又係一早起身過中環，返去化驗所拎 report~

大約 10:30am 我哋就到達，根住就有個 lab manager 同我哋講解返個 report~

我哋大致上無乜問題，無乙肝、無地貧、無性病、大家都係 O+ 血型~

唯有就係膽固醇有點偏高，但又未去 high risk 的 range，而家係 boderline 的 range，要留意下 d 飲食，食返清少少，唔好再多落去就 ok，問題唔大~

因為個 lab manager 話，而家香港人普遍都有呢個問題，只要唔好高過 high risk 果個 range 就 ok~

另外，個 lab manager 知道我哋想生 bb，所以都教咗 d 方法比我哋，我哋差唔多傾咗 1 個鐘先走呀~

根住就去咗味千食 lunch，然後就過咗去 food expo~

BB expo 2010

上篇 blog 都提過，老爺同奶奶好想我哋快 d 生返個 b，所以就呢個問題，我同老公都傾過下，諗住出年生返個~

既然有 planning，自然就係要開始準備的工作，繼之前係 book fair 訂咗本孕媽媽雜誌之後，我哋見有免費的 bb expo 飛，亦都趁下熱鬧，入去睇下有無乜嘢資料拎返來~

由於果 2 張免費飛係 6/8 (星期五) 先可以用，所以我一早就要求老公，6/8 果日一定要準時 5:30pm 放工，一齊過去 bb expo~

入到去 bb expo，其實真係唔多岩我哋去咁，因為好多嘢都係 for 已經出世的 bb 用的，所以我哋只係拎咗 d 臍帶血庫資料咋~

行行下又見到屈臣氏的檔口，強生細包裝的純水濕紙巾好平 wor，3 包都係 $18 咋；另外，強生的 bb 沐浴露都好平呀，$44 就有 2 枝，所以我哋就買咗 6 包濕紙巾同 2 枝沐浴露啦~

又行行下，經過美素佳兒的檔口，原來有 d 奶粉係 for 準備懷孕的女士飲的，飲咗可以唔駛另外再食葉酸，所以我哋就買咗 2 罐 900g 的孕媽媽奶粉 ($149.5 一罐)，仲有好多禮物送返比我哋添~ (有 1 個黑色的媽媽袋、1 枝消妊娠紋的 cream、3 包 20 張的萬寧牌濕紙巾、同埋 1 張 $10 的奶粉coupon)

就係咁，我哋行到 8:15pm 就離開，趕住係 9:00pm 前食飽飽，因為我哋聽日要去做懷孕前檢查，夜晚 9 點後唔可以進食，第二朝要抽血~