彤彤 3 歲生日相 - 拍攝日 + 皇室堡同 Peppa Pig 影相

二零一五年十一月十四日     星期六

今日約咗 6 點，去灣仔嘅 Life Memory Icon Studio 影相，由於想彤彤精神好點先去影相，所以我哋早上同中午都無出街，再氹下彤彤瞓下教，可惜佢又唔肯瞓，所以就拎部單反出嚟，係屋企同彤彤影下相 warm up 下先~

鏡頭下嘅彤彤，都幾多鬼馬表情~




















同彤彤玩咗陣，佢就瞓了，瞓咗個半鐘度，就瞓醒，之後我哋就準備出門口喇~

準時 6 點上到去 studio，地方都算大嘅，但影相嘅位置比較 dirty，除咗鞋係度行完，腳板係黑晒 lor~

由於我哋係買團購 package，所以拍攝時間只係得 60 分鐘，而我哋就加多 $200 改係星期六影，我哋一共影 4 套衫 (其中一套係親子服)，所以一個鐘內要換 3 次衫，再加埋影，時間真係幾趕下~

加上個攝影師態度麻麻，又無乜耐性，又唔多識氹小朋友，所以早段彤彤唔係好合作，之後我哋用 Youtube d 兒歌引彤彤，佢先肯望住鏡頭影相~

影完相後，Sales 姐姐就話我哋個 Package 得 15 張相，加相要 $68 一張，佢而家有個優惠，只要 Like 佢哋 facebook，就可以用 $280 買多 6 張相，所以我哋就加埋，仲約咗下星期日去睇相~

我哋就去 CWB 食飯，順道去埋皇室堡影 Peppa pig，之後就回家了~

Happy 3rd Birthday to 彤彤

二零一五年十一月十日     星期二

今日係彤彤 3 歲生日喇，Daddy & Mami 祝你生日快樂、身體健康、快高長大、天天開心、聽教聽話、聰明伶俐!~

由於今日係平日，所以都無帶彤彤出街慶祝，但就約咗幾家人，同我哋一齊食飯慶祝~ (公公婆婆、爺爺嫲嫲、大姑姐大姑丈、細姑姐同埋表哥仔一齊食飯，多謝大家賞面!~































但今日嘅主角，因為要返學，放學後又無瞓一陣，所以心情麻麻，餐飯嘅尾聲，仲因為太眼瞓而扭晒計添~





多謝各位送嘅禮物!~

彤彤 3 歲舊曆生日慶祝

二零一五年十一月八日     星期日




今天晚上係公公婆婆家食飯後，就為彤彤舉行咗個小型生日會，沒有大型慶祝活動，只有 Daddy、Mami、公公、婆婆同彤彤慶祝舊曆 3 歲生日，只要彤彤快高長大、身體健康、天天開心、聽教聽話、聰明伶俐，我哋就已經好滿足同開心了~







近排彤彤好鍾意妖怪手錶，所以幾日前，我已經去聖安娜訂定妖怪手錶嘅蛋糕比彤彤，隨蛋糕仲有一個小玩具附送，我仲加了 $10，做咗一個朱古力牌添~







彤彤一見到個蛋糕，已經認得係妖怪手錶了，仲即時話好鍾意個蛋糕，多謝媽咪!~







有個靚蛋糕，當然要搵埋小主角一齊影下相先啦!~















之後就到小主角同蛋糕合照，彤彤仲一路唱 Happy Birthday Song 比自己添~


































一路唱 Happy Birthday Song，對眼仔無離開過個蛋糕 lor，ha ha.....










之後由公公陪彤彤一齊吹蠟燭同埋切蛋糕~ Happy Birthday to 彤彤!~