K1 開學日

二零一五年九月二日     星期三

終於輪到彤彤 K1 開學日喇，升上 K1，大個囡喇！~

希望你嘅學習同埋成長之路，可以係快樂嘅環境下渡過！~

由於學校無安排適應周比 K1 學生，所以我都無機會陪彤彤返學~

第十一堂學畫畫 + Megabox

二零一五年八月三十日     星期日

今日彤彤又去上畫畫班，老師話公公今日畫畫時唔太專心，成日四圍望其他人畫乜，同埋手指仔好似唔多夠力咁，唔係好肯畫畫~



之後我哋就去了 Megabox 行街，行完 Megabox 想回家時，點知落大雨，等的士嘅人又多，所以唯有等 Shuttle Bus，過返德福先，一排都排咗超過半個鐘~

過到德福就去食飯先，再搭的士回家~

Disneyland (20150829)

二零一五年八月廿九日     星期六

1 點前係 CWB 仲係落大雨，估唔到 1:30 就停雨，個天又光返，老公就係咁比我說服咗入去迪士尼玩 (事後証明我講得岩，果 d 只係過雲雨，落一陣就唔會再落)~

我哋大約 2:30 就入到嚟迪士尼，無落雨不特止，仲要有小小陽光添~

仲記得上一次入迪士尼，我哋一家都熱到溶咗咁，話咁快就過咗炎熱嘅夏天，三個月後嘅今日，再入嚟迪士尼，已經無咗果股熱氣，換嚟一點點秋意~

入到去，先去 Winnie the Pooh 果度，想拎定 Fast Pass，點知咁快就派晒全日嘅 Fast Pass，咁唯有下次先玩啦~

老公就即時同彤彤一齊排隊玩旋轉木馬，好彩排咗 3  Round 就有得玩，都唔算等得太耐~

睇下彤彤坐上隻馬上面笑得幾開心~





之後老公就同彤彤去排隊玩小飛象，呢個就要排耐少少，都排咗 35 分鐘先有得玩，同樣地，彤彤有得玩就已經好開心了~









之後我哋去小小世界坐船，都幾多人，排咗差不多 15 分鐘已上到船~



呢排叫親彤彤影相，佢都算幾合作，會自己企埋去，同埋用手指篤住面珠笑，不過就成日左擰右擰，要好快手先影到佢望鏡頭嘅相~







之後我哋就過咗去反斗奇兵果邊，影下相先~









老公就陪彤彤玩彈弓狗，玩完後，彤彤仲話狗狗好好玩，想再玩，但排一次要成 40 分鐘，我哋當然無再排過啦~









原先彤彤話想玩呢個傘兵的，我其實都想想地玩，但老公話驚彤彤會驚，所以唔比我哋玩，只好係度影下相算啦~







再影埋三眼仔~













之後我哋就行過去 Frozen Village 果邊，諗住係門外排即場啦 (當時 6 點都未夠)，點知連 2 個鐘後嘅即場位都 Full 埋，所以我哋就行返出小鎮大街，諗住睇埋 Inside Out 先離開，點知原來收 6 點，我哋 6:10 先嚟到，所以又無得睇，唯有打道回府啦~

統感訓練 + 第 7 堂言語表達課程

二零一五年八月廿九日      星期六

之前報呢個言語表達課程，送咗一節 20 分鐘嘅統感訓練，所以就係今日上 last 一堂言語表達課程前，玩埋呢一節嘅統感訓練~

其實全程都無導師的，小朋友可以係課室入面，自己鍾意玩乜都得~

其實家長可以陪埋的，但因為我只係著咗涼鞋，無著到襪，所以就唔可以入去陪玩喇，但都可以拎張櫈坐係門口睇住~

彤彤先入去玩咗一陣波波，之後就跳咗一陣彈床~





呢個曳豬，見我住係度影佢相，走埋嚟用個波扔我，比我影低晒 d 罪證~





之後就自己爬上呢個鞦韆上面玩，仲玩得好開心添~

























玩完鞦韆，我叫彤彤拎個 Fit Ball 過嚟，我就陪佢推咗一陣波~







之後佢就去擒高擒低，不過擒咗一陣佢就無興趣，又走返去玩鞦韆~









20 分鐘好快就過咗，之後就過隔離課室上言語表達課程，而我哋就出去食 Lunch 先~

食完 Lunch 之後勁落大雨，仲諗住會影咗下一站行程添，好彩接彤彤放學落樓，D 雨就差唔多停晒，可以 go ahead!~

講返今日老師嘅 comments 先，老師話彤彤上完呢幾堂之後，有明顯進步，好肯跟老師一齊講 d 句子，有時仲好主動自己回答問題~

另外，老師話彤彤咬字好好，暫時唔覺佢有呢方面問題，講長句子亦都跟到，唯一問題就係攪亂咗「你」同「我」，老師叫我哋要多點教導彤彤~