Disneyland (20150218)

二零一五年二月十八日     星期三

 

今日係年三十晚，但我公司無得提早收爐，所以我就請了假，自動提早收爐~

 

放得假當然係有節目啦，因為銀卡都可以入迪士尼，所以就一早起身出發喇~

 

搭巴士去到九龍站，再轉港鐵，車箱內已經勁多自由人，仲有好多 BB 車同埋手拉車，Oh my god!~

 

我哋大約 11:30AM 就到咗，先係例位影下相，之後再入去玩啦~

 

今日帶咗部新相機嚟試下機先，自拍三人合照方便咗好多呀!~

 

 

 

例位影完相，就正式入場喇~

 

因為係做咗銀卡會員後第一次入場，所以要記錄返我同老公嘅手指模先，咁下次入場時，就唔駛再出示身份証喇~

 

 

 

 

入場後，當然要搵我家小 Model 嚟影下相，試下部新相機先，彤彤知我影佢，都好醒好合作，仲不斷擺唔同嘅 pose 比我影添~

 

 

 

 

好鍾意下面呢張相，影得彤彤嘅輪廓好分明，而且景深效果都好好~

 

 

彤彤見我仲係咁影佢，佢仲係度一邊唱歌，一邊跳舞比我慢慢影添~

 

新相機真係唔錯，係彤彤無時停嘅情況下，都可以叫做影得彤彤個樣好清楚，仲對焦對得好快同埋準添~

 

 

 

 

 

 

 

 

 

 

 

 

 

 

 

 

 

原先係想 set 好個位影三人合照的，點知突然見到彤彤扮豬嘴，所以係未對好焦嘅情況下，手快快就影咗落嚟~

 

 

 

 

影完一大輪相，就正式去玩喇~

 

原先想去小小世界坐船先的，但彤彤見到旋轉木馬，就話想玩，所以就叫老公同佢排隊玩咗先~

 

其實都幾多人下，排咗差不多 30 分鐘先有得玩，老公話排緊隊時，彤彤見到隔離有小飛象，又話想玩，但我哋覺得好似有小小刺激，所以無同佢玩到~

 

 

 

 

 

玩完旋轉木馬，彤彤話好開心 wor，之後我哋就去排隊玩小小世界喇，估唔到出奇地小人，只係排了 5 分鐘就可以坐喇!~

 

見唔係咁多人，我哋仲再排隊玩多次添，第二次就多小小人，但都只係排了 10 分鐘就可以上船了~

 

 

 

 

呢次係彤彤第 2 次坐，佢仲識得指住 d 小人仔，叫我睇添，見到佢識嘅動物，仲話比我知係乜嚟添~

 

 

坐完船，我哋就搵地方坐咗一陣，再餵埋彤彤食粥 (今朝出門時買定咗粥，用象印壺保住溫拎嚟)，之後就去搵卡通人物影相喇!~

 

 

 

由細到大，彤彤都好鍾意 Winnie the Pooh Pooh，但佢唔係叫佢做 Pooh Pooh 嫁 wor，佢鍾意叫佢做 Bear Bear，咁都岩嘅，佢都係一隻熊嚟嘅~

 

之前兩次，彤彤都有小小驚呢 d 大公仔，唔敢自己一個行埋去影相，但今次夠膽自己行過去喇，叻叻!~

 

 

 

 

 

 

同 Pooh Pooh 影完相，我哋就去等 Mickey 喇~

 

 

 

 

 

有咩咁好睇呢?

 

 

 

排隊期間，d 大公仔要休息 3 分鐘，休息完會再返嚟，彤彤見咁多隻大公仔一齊出嚟，所以就係咁睇住佢哋喇~

 

 

 

 

 

 

同 Mickey 影相都唔驚呀，仲主動自己行埋去添~

 

 

 

 

 

之後就去排隊等 Duffy 喇~

 

 

 

又係自己行埋去企定定，仲要拍晒手掌擺晒 pose 添~

 

 

 

 

 

影完相，原先諗住去睇巡遊的，但彤彤瞓咗，所以我同老公就搵個位睇埋先走啦~

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

睇完巡遊就走喇，因為仲要回家沖涼，晚上再過將軍澳食團年飯~

新玩具 - Canon PowerShot G7 X

二零一五年二月十七日     星期二

 

除咗單反外，之前一直用開 Nikon P3100(彤彤出世前一個月買的)，細細部又輕又方便，但近排發現，想影彤彤時，好多時都對唔到焦，或者係影到濛濛地，可能彤彤而家大個咗，移動速到都快咗好多有關~

 

所以近排都有上網爬下文，初步都揀定咗 Canon G7 X, Sony RX-100M3, Sony A6000~

 

之後再 filter 走 Sony RX-100M3, 就係心大心細揀可以換鏡頭嘅 Sony A6000 好，定係唔可以換鏡頭嘅 Canon PowerShot G7 X, 最後問咗幾個朋友意見，都係覺得 Canon 好 d，因為要玩換鏡頭，不如用返部單反，買 DC 仔，當然係想輕巧，方便攜帶為主啦~

 

就係咁，就決定買 Canon PowerShot G7 X 喇，有 1.8 大光圈，焦距有 18 - 100，仲可以反 mon 玩自拍，最重要係對焦快~

 

所以今晚放工，就同老公出去旺角隔下價，睇下邊到買會平 d~

 

行咗幾間樓上鋪，同埋星際，始終都係 DC Fever 最平，所以就幫佢買啦，承惠 $3480 (建議零售價: $4680)，仲有 Mon 貼送埋，希望呢部新相機可以追得上彤彤嘅移動速度啦！~

 

官塘花市

二零一五年二月十五日     星期日

 

早 2 星期開始喉嚨痛 + 少少感冒，睇咗 2 次醫生，叫做無晒喉嚨痛，仲個人仲係好攰，又周圍骨痛，唔多願郁，所以今日全日都係屋企瞓下休息下~

 

瞓到晚飯時間，先一齊出去食飯，仲去涼茶鋪飲咗碗感冒茶，過咗陣個人精神咗，亦都無咁周身骨痛，有時真係要靠中藥清下個底先掂~

 

食完飯，就去觀塘花市行下~

 

 

 

雖然觀塘花市唔算大型，但都已經叫做多嘢行過荃灣花市了~

 

彤彤睇咩睇得咁開心呢? 因為有小朋友玩緊識飛上天果 d 衝天炮，再加上現場又有好多大波波，所以彤彤睇得好開心，直情企係度睇，唔願行~

 

 

 

睇咗差唔多 10 分鐘，就抱起彤彤繼續行下花市先~

 

 

 

 

 

行完濕貨，就行埋乾貨果邊，有好多大波波賣，彤彤當然都想要返個喇，仲不斷同我哋講有好多波波，又話見到有 Kitty, Bear Bear, 等等~

 

所以我哋就帶彤彤埋佢比佢自己揀，彤彤就揀咗個大 Kitty，檔主原先開價 $50，我哋回返 $38，最後 $40 成交~

 

有咁大個 Kitty 波波玩，彤彤當然開心啦，仲係咁話靚靚~ 我哋問佢開唔開心，佢仲話開心呀!~ 仲識講 Thank you 添~

 

所以我哋都無即時離開花市，比彤彤係空地玩一陣波波先，之後再行去搭車回家~

 

 

 

 

 

 

 

 

 

 

 

 

 

 

 

 

回家後，我沖完涼出嚟，見到彤彤好嘆咁扒係床上睇巧虎，見到呢個畫面，心諗仲有再嘆 d 添呀?!

 

 

 

 

情人節 2015 + 荃灣花市

二零一五年二月十四日     星期六

 

今日係情人節，祝各位情人節快樂!~

 

今朝特登早 d 起床，趁彤彤仲未瞓醒，我就快手包好 d 利是先，大約用咗 45 分鐘就攪掂，彤彤呢個時間都岩岩瞓醒~

 

 

之後我哋就搭車去荃灣，先去 Aeon 行下先，因為今日大減價，我同老公都想去買下新衫同新鞋~

 

行完 2 間 Aeon 、千色店、一田、H&M等等，總算有收獲，我就買了一年羽絨背心同一對鞋，而老公就買了一件褸同埋褲，但就睇唔岩鞋，所以無買到，而彤彤因為屋企仲有好多新衫未著，所以我都無特別再買比佢，但就買了 2 個睡袋、一對返學黑鞋，仲有一本書仔比佢~

 

 

 

 

 

之後我哋仲去行埋荃灣花市，比較冷清，同埋好細，無乜嘢行~

 

原先諗住買人個波波比彤彤，見到有檔話 $20 一個任揀，點知彤彤揀咗個鬆弛熊波波，個店主話要 $40，話呢個係要貴 d 嘅，我覺得佢好唔老實 lor~

 

本來想唔買的，但彤彤又指住個星星波波，不斷話 Star，咁既然個波波係彤彤指定話要的，就買啦，但我覺呢個星星波波都要 $20 ，真係唔太值 lor~

 

 

行埋花市，我哋就回家了~

 

回家後，同彤彤沖完涼，佢就好開心咁係廳度玩佢個星星波波喇!~

 

 

 

 

團年飯 2015

二零一五年二月十一日     星期三

 

今晚放工後，就返了公公婆婆家，一齊出去食團年飯~

 

點完菜之後，又未有嘢食住，所以就同彤彤玩下自拍先~

 

彤彤真係好鍾意玩自拍的，次次係手機度見到自己個樣，就會係咁笑，又會攏唔到嘅 pose~

 

 

 

玩咗一陣自拍，就開始上菜喇，所以就唔玩住喇，食咗飯先~

 

今日團年，祝各位身體健康、事事順利、心想事成、生活愉快!~