Shopping @ 黃埔

二零一五年九月十三日     星期日


學完畫畫，我哋就同彤彤一齊去黃埔行下街，順便睇下 Aeon 有無岩嘅書枱書櫈仔~


點知差不多落車時，彤彤就瞓著咗，我哋唯有行下街先，咁岩 Giordano last day，做 special promotion，$99 有 2 pack 男裝底衫，即買 2 pack 比老公~






之後去行埋 Uniqlo 同埋 H&M，又係 H&M 睇中咗條工人裙，即使無特價，都引唔住手買咗($149)，因為我真係好鍾意~






我哋大約行咗 2 個鐘度，彤彤先瞓醒，所以就帶佢去 Aeon 揀下書枱同埋書橩仔，全套都係佢自己揀的，問咗幾次都堅持要 Hello Kitty，所以就買咗 ($239 + $149)，明天就會送貨去公公婆婆家~





為咗配合彤彤學校嘅寫前訓練及手肌練習，每日都比 d 小任務比小朋友在家時完成，所以我就去買了格仔同埋印仔，比彤彤可以訓練下手眼協調同埋小肌肉~






彤彤都 "及" 得似模似樣嫁，都無乜 "及" 出界~

第十三堂學畫畫

二零一五年九月十五日     星期日




今日係畫班整咗隻飛機，老師話先叫小朋友係一張大嘅畫紙上面畫畫，之後再剪出嚟做機翼~


老師話今日彤彤好肯講想畫乜，同埋想做邊隻色嚟畫，心心係用水彩筆左右點一點先畫一嚟的，老師教咗彤彤一次，佢已經掌握到點畫，自己畫咗好多個心心出嚟~


另外，晝線條都畫得好好，識得控制線條嘅長度，唔會長短不一~


不過，老師話彤彤仍然唔肯影相，一見老師拎部相機出嚟，佢就擰開另一面，叫我哋在家要多點鼓勵佢望鏡頭影相~

無出街的星期六

二零一五年九月十二日     星期六

老公呢個星期返咗 3 次大陸，攪到個人好攰，所以今日無出街~

加上我哋早上要去銀行處理 d 嘢，就一早帶了彤彤過去公公婆婆家~

係銀行辨事後，我哋就返咗屋企瞓下休息下，到晚上先過去公公婆婆家食飯~

唔知由幾時開始，彤彤有個古怪嗜好，鍾意咁樣拎住個飯煲嚟食飯/飲湯，所以錫孫嘅婆婆，就每日除咗正常咁比彤彤自己食飯外，仲有留係小小，倒入 (一早已經裝起所有飯嘅) 飯煲入面，比彤彤自己坐係地下慢慢食~ 





食飽晚飯，我就陪彤彤做功課，一直都無打算咁早買張書枱 & 書櫈 (諗住用住張玩具枱頂住先)，但張玩具枱太細唰，彤彤好離係上面填色/ 做功課，所以要去物色下先~

做完功課，就陪彤彤做學校通告上，每星期要做的寫前訓練同手肌練習，之後再玩多陣，我哋就回家了~

奶奶生日食飯 @ 皇家太平洋酒店

二零一五年九月六日     星期日


今日係奶奶嘅生日，先恭祝奶奶生日快樂、身體健康、生活愉快~


為咗慶祝奶奶嘅生日，我哋就 Book 皇家太平洋酒店嘅 dinner buffet，因為我本身係 Sino Club 嘅會員，近排有 promotion 做 6 折，埋單每位成人只係 $390.6 (已包加一)，可以由 6 點食到 9 點半，真係超低~





呢個為食妹，見到有嘢食，特別開心，我話要比我影完相先準食，佢就即時擺晒 pose 比我影~









由於彤彤未夠 3 歲，所以佢食呢餐係唔駛錢嫁，佢仲一口氣食咗 6 球 Movenpick 雪糕，佢真係識食，識揀貴嘢嚟食~


除咗食雪糕外，佢仲有幾件蛋糕仔，仲有少少乾燒伊麵，仲要全程都係佢自己食，又食得好乾淨，無乜跌到周圍都係，叻叻!~












睇完彤彤食嘅嘢，又睇下我哋大人有乜好食~


我哋得個開邊龍蝦好味呀，同埋個翡翠螺都好好食~


長腳蟹、紅蟹、蝦同埋青口都 OK，反而魚生麻麻，有少少 "un"~










呢個蒸排骨好好味呀，又"林"又夠滑，燒賣同埋蝦餃都好好食~


牛柳同埋串燒海鮮又係好好味~






甜品方面，蛋糕類我覺得比較一般，反而葡撻好好食~






Movenpick 雪糕當然好食啦，所以我都食咗 4 球，但隔離呢個窩夫，我就覺得麻麻了~








到大約 8 點，有職員推咗呢個火炙雪糕蛋糕出嚟，好多人都行埋去圍住嚟影相，但食落覺得好一般~





我哋大約 8:45pm 就離場，個個都好滿意呢餐飯，仲話呢個價錢，有咁多嘢食，算係好好好低，ha ha.....


返到屋企，彤彤都無嘢的，同佢沖完涼飲埋奶，佢走埋嚟我度，e..... 點解手仔咁熱嘅，一探熱，原來發緊高燒 (38.7)，即刻比佢食退燒藥同埋貼退熱貼，好彩第二朝起身就退晒燒，而且仲好精神添~

第十二堂學畫畫

二零一五年九月六日     星期日


數數下，原來彤彤已經學咗畫畫成 12 堂喇，估唔到佢仲 keep 住鍾意去上畫班，仲成日問我哋今日係唔係去畫班呀?


今日去畫廊接彤彤放學，老師話彤彤今堂有進步，好專心自己係度畫畫，無四圍望其他人~


同埋今日彤彤開始講到自己想畫邊種生果，老師話彤彤講想畫士多啤梨同埋蕉蕉，所以老師就幫彤彤係畫紙上點咗幾點，然後叫彤彤自己連線同埋填色~


而中間果舊卷蛋，係老師比個圓形模比彤彤畫的，而轉旋果個位，老師話彤彤明白點畫，但畫得太細範圍，未太掌握到點樣可以畫得大 d，所以就由老師出手代畫~


另外，老師話彤彤填顏色填得好好，好少會油出界，同埋都填得滿滿，而且填嘅色都好實下，不過老師話彤彤畫畫時，左手唔知放邊好，只係放係櫈上/大脾上，唔識襟住張畫紙嚟畫~


至於畫線條方面，老師話彤彤掌握得好好，畫中嘅斜線，粉藍色果 d 係老師畫的，而深藍色果 d 就係彤彤畫的，老師話彤彤識跟住方向同埋長度嚟畫，呢個年紀嚟講，已經算好好~


最後，老師話有時上堂時，想幫彤彤同埋佢嘅作品影下相，用嚟幫佢整 portfolio 但彤彤成日避開鏡頭，攪到好難影，其他同班嘅哥哥姐姐幫手引佢都唔肯望鏡頭，叫我哋在家要提下彤彤，見到鏡頭要望，ha ha.....

Ocean Park 20150905

二零一五年九月五日     星期六

今日快閃海洋公園 3 個鐘(4:30 - 7:30 pm，原先諗住早 d 入去的，但因為有 d 嘢做攪晏咗)，太陽伯伯準備收工，所以唔算好曬，加上有少少海風，所以都唔算熱~

呢個時間，自由人又開始離場，只剩下好少人，鍾意點行就點行，鍾意玩乜就玩乜，完成唔駛排隊，真係爽到爆!~

所以我哋入場後，都慢慢係度影下相先，因為人少少，所以影出嚟嘅相都無出現攝石人，Good!~

















今日彤彤樹熊上身，唔肯坐 BB 車，又唔肯行，全程要人抱，Oh my god!~



既然今日彤彤樹熊上身，我哋就先去探下樹熊先啦~

還記得澳洲館係今年年頭開幕時，排晒長龍嫁，今日去到唔駛點排隊，只係門外等一陣就可以入得，所以我哋可以慢慢同 d 擺設影下相~









入去到，好好彩，今日樹熊係清醒狀況，仲係度食緊由加利葉添~





























探完樹熊，我哋就去搭纜車，又係唔駛排就直入，Good!~

其實今日一入海洋公園時，彤彤就話要坐纜車，有得坐即刻開心晒，仲乖乖擺 pose 比我影相，我當然唔會錯過咁好機會，影多幾張啦，ha ha~













































上到山，原先諗住去睇企鵝的，但老公話有少少頭痛，佢驚入去咁凍嘅地方會感親，所以今日就唔入去喇~

我哋改咗去睇彤彤好鍾意嘅海獅同埋海豹~













呢位小朋友真係好鍾意海洋生物，有得睇海獅同海豹，即刻唔駛人抱，叫我哋抱佢上去，自己企係度睇~



















睇完海獅同海豹，我哋就四圍行咗陣，之後就搭海洋列車落山，去探下熊貓先~







最後就去埋海洋館睇魚魚~



呢位小朋友真係好鍾意海洋生物，今次輛到睇魚魚，佢又即刻要求落地，自己企係度睇~





















Annual Pass 會員生日月入園，有一份神秘生日禮物~