二零一二年十一月十日 星期六
到達產房已經差唔多點了，首先要磅一磅重，之後就要換上產房的拖鞋，再要除低身上所有配飾，之後就被安排進入我的生產房，由於QE的產房裝修緊，所以有D生產房會有2張床係度，咁岩我被安排果間生產房就係有2張床的，姑娘同我講，佢哋一般都盡量安排一人一間房，但如果同一時間太多人生得，先會安排另一位孕婦入來，到時老公就唔可以留係度陪我，除非隔離床的媽媽唔介意~
大約9:15AM 我就瞓咗上去我張生產床度，當時老公亦已經係門外等候，暫時唔可以入來住，之後有位助產士入來，幫我SET 好鹽水袋同埋催生藥袋，再推埋個笑氣樽入來，之後就同我講，一陣會有醫生來同我人工穿水，叫我等一陣，之後就話而家可以比老公入來陪我~
大約10點，先前係產前房安慰我果個女醫生入咗來，話要同我做人工穿水，當時雖然有少少驚，但都好放心，因為見到係呢位女醫生~
之後醫生就同我人工穿水，佢好快手，只係放個鋏入去一勾就穿咗水了，根住就有一股暖水流出來，當時我一D都唔覺得痛，呢位醫生手勢真係好~
穿水後，醫生就同我量一次血壓，話我D血壓偏高，佢建議我做無痛分娩，應該會減輕對我D血壓嘅影響，其實佢同我講，我都會要求佢幫我做的，所以佢咁樣一問到，我當然即時話好啦~
不過由於麻醉科醫生有嘢做緊，暫時過唔到來幫我做無痛分娩住，醫生叫我用住呼吸法同埋聞笑氣頂住先，之後就開始幫我落催生藥了~
大約11:30AM 度，D催生藥開始嚟料了，我FEEL 到個肚有D痛，之後我想聞下笑氣，但一聞即時好似WING WING 地咁，我即刻唔再聞，之後同老公傾下計分散注意力，大約頂到 12:10AM，麻醉料醫生終於都來咗，佢叫我簽同意書，話之後就幫我做無痛分娩，同時叫老公先去食LUNCH，返來就係外面等~
麻醉料醫生叫我要屈埋個身體，盡量用對手抱住個膝蓋，同埋千祈唔好郁，之後醫生就幫我打麻醉針，然後再插針入去做無痛分娩，過程中會FEEL 到個背脊好似比D橡筋彈彈下咁，但醫生話因為我肥，背部肌肉厚，所以枝針插唔到入去岩果個位，佢不斷試咗 5-6 次都係唔得，當時我個肚咁大，仲要屈埋個身抱住個膝蓋，都真係幾辛苦，佢見已經試過咁多次都唔得，就叫咗個 senior d 嘅麻醉科醫生入來幫我做無痛分娩，我記得佢係姓陳的，係一位女醫生來~
之後陳醫生幫我做無痛分娩，第一次都係唔得，但第二次就OK 咗了，果然 SMO 係唔同D，ha ha……
之後陳醫生就幫我用冰粒測試下我的下身感覺，再教我如果 FEEL 到好痛，就要襟制加大麻醉藥的份量，但記住一個鐘內只可以襟一次，之後佢就離開咗~
做無痛分娩嘅過程，差唔多用咗 1 個鐘，之後助產士就話可以比返老公入來，佢又幫我量下血壓，但點知我D血壓又升高咗D，助產士就通知咗醫生來睇我，之後有1男2女醫生入咗來 (男果位醫生應該係高級D的)，幾位醫生睇完我嘅情況，再傾咗一陣，就話要幫我打防抽筋的降血壓針，枝針一打完，我D血壓即時降返好多(由 17X à 14X)，之後佢哋就話晏D再來睇我~
一路等到下午3 點，助產士入來睇下我的情況，又問下我有無乜嘢感覺，我話條腰好聚，有D急急地大大咁嘅FEEL，之後佢話幫我檢查下，檢查後佢話子宮頸仲未開，但已經開始薄咗，佢話我都幾個鐘無去過小便，問我想唔想試下去小便，我話試下啦，咁佢就放咗個盤係我PAT PAT 位，叫我自己試下去，但去唔到，之後佢就話不如幫我插尿喉，放清D小便，會令子宮頸快D 開，既然佢咁講，我唯有應承啦~
