2012年7月31日星期二

第五次政府產檢 (23wks2d)

二零一二年七月三十一日星期二

QE 果邊原先約咗係上星期二早上返去做產檢的，點知果朝打風，所以就改期，約咗今日上午 11 點見醫生，由於老公放唔到假，所以今日只係得我自己一個人去做檢查~

我 10:45am 就到咗，又係先驗小便，再磅重同埋量血壓，今日嘅血壓都係高，去到 148/92，姑娘又係叫我過 15 分鐘後再返去量多次，結果都係高~

大約 11:15am 就到我見醫生了，今次呢位醫生好好人，問咗我好多問題，佢想了解多 d 我個 case，睇下係唔係真係有妊娠血壓高，後來我睇到佢個名牌，原來佢係產科主管來的，唔怪之得講嘢 firm 好多啦~

佢先睇咗我帶來的血壓表，之後又問咗我好多問題，又問我係私家果邊有無跟進開血壓高的問題等等~

佢知道我月頭先係私家果邊驗過血同埋小便，就話幫我 mark 低，下次返來呢邊抽血再 check 下啦，之後就叫我可以約 2 星期後返來覆診~

Shopping for our baby Part 1

自從知道有咗阿 B 之後，就開始留意 BB 用品，又會留意下各大百貨公司幾時會有 BB 展，或者係大減價，仲會留意埋幾時有 BB 衫或者 BB 用品開倉~

由 5 月開始，2 個月下來，原本都買咗唔少嘢比阿 B 了~

(5 月 Jusco BB 展時買的 - $546，呢 set 會係我哋家中用)

(5 月 Jusco BB 展時買的)

(5 月 Jusco BB 展時買的 - $414.2)

(5 月永安 BB 展時買的)

(花園街買的)

(5 月Chicco 開倉買的)

(6 月永安大減價時買的)

(6 月千色店大減價時買的)

(馬莎大減價時買的，一包 5 件只係 $125 咋)

(馬莎大減價時買的 - $95)

(馬莎大減價時買的 - $50)

(馬莎大減價時買的 - $95)

(馬莎大減價時買的 - $50)

(GAP大減價時買的)

(7 月 Jusco 大減價時買的 - $413.3，仲送 2 個Bfree 的奶樽，呢 set 會係我父母家中用)

(7 月 Jusco 大減價時買的)

(7 月的時候，Carter's全球免運費時買的)

(7 月書展時買的)

(7 月行永安時買的，$10 一pack)

(7 月LeSportac 做半價時買的，打算用來做媽咪奶粉袋)

2012年7月29日星期日

媽媽會入會禮物 Part 1

由 3 月開始，入咗唔知幾多個媽咪會，慢慢就開始收到入會禮物了~

(美素佳兒媽媽會)

(雅培媽媽會)

(寰宇家庭媽媽會)

(美贊臣媽媽會)

2012年7月26日星期四

第一次見政府內科醫生 (23wks4d)

二零一二年七月廿六日星期四

QE 果邊約咗今日下午 2 點半，第一次見內科醫生，一去到就先驗小便，再度高磅重，然後就量血壓，今日 d 血壓高得有點誇張，有成 177/98，我心諗今日實比人捉入院了，呢次慘喇~

之後就安排咗我做一個簡單的心電圖，然後叫我坐係大堂等叫名見醫生~

等咗大約 30 分鐘，就輪到我了，入到見醫生，就叫我瞓上床，比醫生聽下心跳同埋呼吸，然後就坐係醫生隔離，問下我有無乜唔舒服，點解要來睇內科等等~

我就講咗我個情況比佢知，係產科果邊見我血壓高，所以轉介我過來的，之後我又拎咗我係家中量的血壓表比佢睇，但個醫生好求其咁用眼尾望咗一下，連拎都無拎起過來睇，就話得喇，你在家血壓正常，係見醫生先高嘛~

之後就話，你本身都肥，係易 d 有血壓高的問題，叫我要控制體重 (但我有咗 bb wor，我點去減肥呀 ?)，又話而家無嘢可以做，只係安排我去做 2 個檢查(照心臟超聲波及 24 小時血壓監測)，睇下駛唔駛食血壓藥，就叫我出返去大堂等姑娘叫名，到時會比張約期紙我去做檢查~

我估我入咗房同醫生見面，前後都無 5 分鐘呀，如果我唔係有咗 bb，佢都未必會安排我做呢 d 檢查 lor，因為我係大堂見到有張 notice，話做呢 d 檢查，分別要排期 15個月同埋 23 個月~

大約等多 20 分鐘，就有姑娘叫我名，話同我約咗期，8 月1 日朝早可以做晒呢 2 個檢查，叫我當日準時去做檢查，之後又叫我去 counter 約返下次覆診個期，就可以走得~

2012年7月15日星期日

第五次見私家內科醫生 (22wks0d)

二零一二年七月十五日星期日

前晚收到盧醫生診所的電話，話我嘅小便種菌報告出咗，一切正常，叫我星期日返去見盧醫生拎報告~

我同老公大約 12 點就到咗，之後好快就入去見盧醫生，佢話種菌報告出咗，種唔到菌，同埋今次嘅小便樣本裡面，發現唔到白血球及血絲，所以應該係我身體夠強，自行殺死晒 d 菌了~

上次可能咁岩身體同 d 菌打緊仗，而我又係果個時候拎 d 小便去驗，所以先會 check 到出來，佢話唔駛擔心，既然已經無晒菌，就當然可以唔駛食藥啦~

盧醫生叫我下個月返來見佢，到時又睇下我 d 血壓有無乜嘢大問題~

2012年7月14日星期六

書展 2012

今年行書展的心態有 d 唔同咗，主力唔係買我同老公想睇的書，今年的主力係兒童館同埋點樣教小朋友的書~

因為今日公司有 d 嘢要做，所以即使係星期六，我都要返一返公司，攪到差唔多傍晚的時候，先會合老公一齊入去書展~

行到去稅務大樓就已經開始多人，現場廣播話長者同埋小朋友及其家人可以由特快通道入場(即係唔駛遊花園咁)，我仲老公講笑，話點解大肚婆無得行特快通道呢?

點知行多幾步，就有位保安嬸嬸叫住我，話我可以行特快通道的，點解唔行呀? (其實我個肚真係唔係好大，估唔到嬸嬸會忍出我呢位孕婦，之前行果段路都有幾位警察企係度，佢哋都無叫我行特快通道)

我見嬸嬸咁有誠意叫我行，我當然接受佢的提意啦，仲拉埋老公一齊行過去添~

當時老公仲好好奇，我做乜拉佢行另一邊，仲問我唔係要長者同埋小朋友及其家人先可以走咩? 我咪答佢；因為嬸嬸好人 lor~

老公話估唔到嬸嬸又幾好眼力，睇得出我係大咗肚，而唔係大肚腩，真係比佢激 c 我~

由於行特快通道入場，我哋好快就入咗去行，場內又唔算好多人，都可以慢慢逐檔入去睇下嘢，真係唔錯，我哋大約行到 11:30pm 就離開了~

今次書展都買咗好多書的，收穫如下：

大部份都係買比阿 B 的書來的，有 flash card 同埋 bb 大書，希望呢 d 書對阿 B 有啟蒙的作用啦~

2012年7月11日星期三

第四次見私家內科醫生 (21wks2d)

二零一二年七月十日星期二

尋晚收到盧醫生診所的電話，話我 d 小便有問題，叫我今日返去見盧醫生~

咁今日就叫老公早 d 放工，陪我過去盧醫生度，睇下乜嘢事~

我哋大約 6:30pm 就到咗，等到 6:45pm 就到我入去見盧醫生，佢話我肝腎功能都無問題，指數同上個月果次差唔多，即係 d 血壓高無影響到我身體的機能，但係小便報告就有問題，因為小便內有大量大白球同埋有血絲，估計我有尿道炎，所以叫我聽日再去驗多次小便，同埋拎 d 小便去種菌，睇下係中咗邊隻菌，佢先可以開藥比我食~

同時佢亦都話，孕婦有尿道炎好常見，特別係好似我咁，完全無病徵的尿道炎 (即係小便無變色及唔痛，亦無腰痛或赤痛)，同埋如果身體好的話，係可以响唔駛食藥的情況下，自己好返的~

所以佢而家唔開藥比我食住，等埋個種菌報告出咗，睇下我身體自己攪唔攪到掂 d 菌先，因為孕婦可以避免，都係唔好食消炎藥同埋抗生素好 d~

之後姑娘比咗地址我，叫我聽日交 d 小便樣本去化驗所，個報告應該星期六/日就會返來，到時再見醫生~

2012年7月10日星期二

第四次政府產檢 (21wks1d)

二零一二年七月九日星期一

QE 果邊約咗今日上午 10 點半，第一次見產科醫生，由於老公放唔到假，所以就由我父母陪我去~

我哋飲埋早茶先慢慢搭車去 QE，都仲早咗成 15 分鐘到，入到去都係驗小便，睇下 d 小便裡面有無糖份同埋蛋白，之後姑娘會 mark 返係張飛尾度~

之後就自己量血壓同埋磅重，呢次個血壓又有點高，有成 145/78，姑娘叫我 15 分鐘再返來量多次，之後就磅重，今次無乜重過，同上個月係靳醫生度磅時差唔多~

過咗 15 分鐘後，就返去量多次血壓，呢次仲高 d 添，有成 132/92，結果姑娘話要照 mark 比醫生睇~

係大堂等多 15 分鐘度，就有姑娘叫咗一班準媽媽入房，講解返今日個流程，同埋逐個講返之前的驗血及唐氏的報告，之後就出返大堂等叫名~

原來上次做 Oscar Test，阿 B 的頸皮係厚度係 1.3，驗血分析出來的風險係 1:9100，屬於低風險~

係大堂等多 15 分鐘度，就叫凡咗我入房見醫生，都係聽下我同阿 B 的心跳，仲有按下肚咁，之後醫生就話見我血壓有 d 高，問我平時自己在家有無量開血壓，我就比咗我張血壓記錄表比醫生睇，醫生睇完後，就話我在家的血壓都幾正常，有可能係見醫生時比較緊張先會咁~

醫生話我都休息咗咁耐，而家再量多次睇下會唔會低返先，仲不斷同我傾計諗住分散我注意力，點知我 d 血壓不降反升，仲升到 166/98 添，醫生幫我量咗 2 次，都係咁高，佢話而家我 d 血壓咁高，唔可以比我走住，要我留係度最少 3 個鐘，睇下 d 血壓會唔會正常返，如果都唔得，就今晚唔比走，要留院觀察~

之後仲比咗封轉介信比我去排內科 check 清楚 d，同埋教我去 E1 辦入院手續先，再去 B3 報到~

出返大堂，同咗我父母講今日要留院，叫佢哋返屋企先，佢哋又唔肯，話要陪我，所以就一齊過去 E1辦入院手續先，再去 B3 報到~

大約 12:15pm 上到去 B3，姑娘即時我幫我量多次血壓，仍然係高，叫我留係房內唔好亂走，一陣會有午餐比我食(但一 d 都唔好食，我只係食咗少少咋)，一個鐘後再幫我量~

一個鐘後再量多次，d 血壓仲高 d 添，姑娘話咁樣唔得 wor，今日實無得出院嫁，佢話一係比我入去瞓下 sofa，係一張好舒服的單座位 sofa 來的，睇下一個鐘後 d 血壓會唔會好 d~

再一個鐘後，姑娘再幫我量，呢次好好多呢，降返去正常的度數，只要下個鐘都無升返上去，就可以走得~

又一個鐘後，雖然血壓比一個鐘前高少少，但都屬於正常水平，所以姑娘比我離開，但要等一陣見埋內科醫生先，因為要內科醫生簽名我先可以走得~

結果又要等多成個鐘，果個內科醫生先出現，都係問下我有無乜唔舒，同埋叫我如果之後見頭痛、頭暈或者眼花，而又血理高過 140/90 的話就要即時入院，之後就叫姑娘幫我約埋內科的覆診期，就簽名比我走了~

今日攪到成 5:15pm 先離開 QE，係搭車回家途中，就收到盧醫生診所的姑娘電話，話我的小便報告有小小問題，盧醫生想提前見我，叫我聽晚返去見佢，唉...... 真係一波未平一波又起~

2012年7月8日星期日

照結構 @ 林勇行醫生醫務所 (20wks6d)

二零一二年七月七日星期六

自從知道有咗阿 B 之後，我就上網 check 過，有乜 checking 一定要做的，知道照結構係好重要的 checking，就算政府醫院安排到都要去私家照多次，仲要搵個呢方面的權威去照，果位就係林勇行醫生~

因為政府醫院照得好求其的，同埋政府醫院一聽到林醫生個名，就信晒佢的報告的，所以我係 4 月頭就已經 book 定咗林醫生幫阿 B 照結構~

我哋 book 咗 10:30am，見有時間剩，就過咗去 lab 抽血，因為下星期要返盧醫生度覆診，佢叫我覆診前幾日要去抽定血驗下先~

抽完血就搭車過中環，我哋大約 10:30am 就到達林醫生的醫務所，大約等到 11:15am 先叫我哋入房等，再等多成 20 分鐘林醫生先出現幫阿 B 照結構~

林醫生比我第一個感覺真係好 pro，佢一照就即話係女仔嚟 wor，都唔知有無一秒鐘呀，勁!~

之後就逐樣同阿 B 照，又解釋比我哋知係邊個部位，係個 screen 見到阿 B 隻手仔郁郁下，林醫生仲同阿 B say Hi 添~

大約 10 分鐘度，林醫生就照晒要照的嘢，雖然照得好快，但樣樣嘢都解釋得好清楚，我哋問的問題，都有一一好有耐性呁解答，仲比咗我哋睇阿 B 的 4D 樣，又 print 咗阿 B 的 4D 相比我哋，仲有頭先照結構時的 DVD，最後我哋出返大堂，等多 10 分鐘度，拎埋份報告就走得了~