第二次政府產檢 - Oscar Test (11wks5d)

二零一二年五月四日 星期五

 

QE 果邊約咗今日上午 8 點半去做 Oscar test，七點鐘度就同老公出門口去 QE 了，真係比返早仲要早呀~

 

8 點半去到 QE，點知仲未開門，差唔多 5 分鐘後先開門比人入去，之後就自己去磅重，同埋 mark 低係張覆診紙的票尾度，然後就去 13 號房門外坐等叫名~

 

差唔多 9 點先叫我個名入佢，係一位護士長幫手我做 Oscar test，姑娘叫我上床瞓低等佢幫我照，照緊的時候，唔知係唔係阿 b 的位置唔係咁好，姑娘打咗我個肚幾下，仲要幾大力添，攪到我有 d 痛，同時間我見到阿 b 好似蝦仔的彈咗幾下，好得意呢~

之後姑娘用咗 2 個角度來度阿 b 的頸皮厚度，我見到 show 出來分別係 0.16x cm  同埋 0.12x cm，之後我問姑娘見到性別未，佢又串串地話而家 bb 咁細，睇唔到 wor，然後好求其咁掃咗一下 bb 的下身，就話睇唔清楚呀~

姑娘講嘢有d 惡同埋串串地，又唔太解釋照到的地方係乜嘢來，要我問佢先講，佢只係話頸皮唔算厚，佢唔會講有幾多 cm，要自己睇，你唔講人哋點知睇邊度呢?? 好彩我之前係私家照過 ultrasound，都知道 screen 上 show 出來的嘢大約係乜 (因為私家有解釋過)，所以我先識睇少少，相反老公就睇到一頭霧水了~

照完就叫我用佢果塊布抹返身上的啫哩，我當然無用啦，都唔知乾唔乾淨，又咁多人用過，點知上手有無皮膚病嫁~

 

臨走前，姑娘叫我留多次小便，話上次果次可以污染咗，所以用唔到，要留多次比佢哋做研究，另外要去 2 樓抽多次血，分析唐氏綜合症的機率，之後就走得~

 

今次幫我抽血的係一位男士，我覺得手無上次果位咁好，有少少痛，不過佢都有安撫過我唔駛驚，同埋今次佢唔比老公係度陪我 lor，攪到我驚驚地~

百家寶 BB 展

二零一二年五月四 星期五

 

離開 QE 之後，我哋就過咗灣仔，因為有百家寶 BB 展嘅 free ticket，所以就打算入去睇下嘢，另外我仲有剪咗 d coupon，可以換價值 $500 的媽咪百寶袋，但規定咗個鐘限量派發 55 份，由早上 11 點開始派發，所以我哋就去 pizzahut 食個 lunch 先，等 1 點幾轉先入去拎媽咪百寶袋~

 

我哋去到的時候，岩岩 1 點鐘，點知現場廣播話媽咪百寶袋、尿片、奶粉今日的 quota 全部已經派晒，我就好奇怪，跟住問職員，唔係規定咗個鐘限量派發 55 份咩?? 點解會全日 quota 已派晒? 職員話朝早太多人，所以提早派發，真係有無攪錯呀?!

 

後來上百家寶個 facebook，見到好多媽咪留言罵爆主辦單位的安排差，原來今朝有 d 媽咪排咗成 2 個鐘，乜都拎唔到，又有 d 人一個人拎咗 9 份走 (coupon 上寫明每人每日只可拎一份，仲要登記個人資料先可以拎)，亦有婆婆係度排隊拎，亦有男人係度排隊拎，總知就係安排失當啦~

 

咁無得拎都算啦，橫掂都嚟咗，都行下啦~

 

入場時派發咗一本 coupon 集的，好多商戶都話填好資料入會就可以有禮物的，點知又係呃人的，好多商戶的贈品都話已經派晒，但如果你幫佢買嘢，果 d 所謂的禮物又會出現返嫁 wor~ (當時只係 1 時多，現場人又唔係多，個 expo 只係開咗 3 個鐘，咁快就派晒 d 禮物，明眼人都知係乜事啦~)

 

就算有嘢禮物拎的商戶，送咗嘢都係好少，好似試用裝奶粉 1 條、BB 成長身高尺等等，完全同荷花主辦果個 BB 展無得比~

 

仲有就係呢個展，有關 BB 用品的商戶得幾間，d 嘢又貴 wor，仲要勁多sales係度sell旅遊，sell信用咭，sell團購，sell保險，似推銷會多d，冇乜大既嬰兒用品牌子，奶粉商，尿片商都唔多見有，冇嘢買又冇特別優惠，又多影相的 studio，sell 教育 dvd 果 d，真係無乜嘢睇 lor~

 

其實我最想睇就係 BB 用品，同埋 d 奶粉果 d，但真係欠奉 lor~

 

行行下，突然聽到有人話有剪 coupon 的媽咪可以排隊拎媽咪百寶袋 wor，咁我哋咪又去排 lor，原來要拎飛先，叫我哋 4 點返去登記，咁岩我 4 點要去聽雀巢的講座，咪叫老公去拎個媽咪百寶袋 lor，點知老公去到又話無晒，但叫佢留電話，遲 d 通知我哋，可郵寄返比我哋 wor，聽住先 lor~

 

我哋行咗 3 個鐘度，只係買咗 2 pack 紗巾，同埋 3 枝 bio oil，其他嘢買唔落手~

 另外又聽咗雀巢的產婦教室，內容都幾好，聽完仲有份禮物添 (唔聽係唔會有嫁)，斱算係全日裡面收到最「貴」的禮物了~

後記：係 BB 展完咗後的 3 星期度，突然有人聯絡我哋，話會速遞返 2 個媽咪百寶袋比我哋，估唔到佢哋都叫做言出必行，但佢哋送埋嘅嘢，岩唔岩用我就不作評論了~

第三次私家產檢 (11wks5d)

二零一二年五月四日 星期五

 

去完果個所謂 BB 展，我哋就去返 TST，去靳醫生度做第 3 次產檢，今日係靳醫生放完大假返來的第一個工作天，所以診所勁多人 lor，我哋 6:30pm 去到，都要等到差唔多 7:30pm 先有得睇~

 

見到靳醫生，又係問下我呢排身體點，我同佢講上星期感冒，醫生幫我 check過血壓有 d 高，叫我問返產科醫生呢度，咁靳醫生就叫姑娘幫我 check 下血壓，真係高咗好多呀，有成 178/117，我都未試過咁高嫁 (上星期都係 158/102 咋)，靳醫生產婦 20 周前的高血壓唔係個 b 影響，係產婦本身的問題 (但我未有 bb 前，都無血壓高的，真奇怪~)，所以佢 refer 我去睇內科醫生~

 

之後就同我照 ultrasound，睇下阿 b 的情況，阿 b 一切 ok，大小亦屬正常範圍，我哋仲問埋靳醫生有關阿 b 的性別，因為奶奶好心急想知~

 

靳醫生話阿 b 仲係好細過，而家睇唔太準，如果要佢講，佢會覺得有 6 成係囡，聽到時我同老公都有少少唔開心，因為第一我哋唔想老爺奶奶失望；第二我哋只想生一個 b，如果係囝的話，應該唔會有再追的壓力，但如果係囡，肯定會有壓力 lor~

可能靳醫生見我哋有少少失望，所以佢再補多句話而家未準的，下次返來見佢時再睇多次，應該就準喇~

之後，我哋就出返去，等拎埋藥，就去食飯，其間我同阿爸傾電話，講咗比佢知阿 b 係囡來的，佢老阿媽不知幾開心，話囡好呀，第時乖 d，又會照顧父母多 d~

回家後，奶奶打電話來問今日睇成點，又問知道阿 b 性別未，我講咗比佢知，聽得出佢有少少失望，不過佢好快補飛話囝囡都無所謂啦，最緊張健健康康咁出世~

第一次私家產檢 (5wks1d)

二零一二年三月十九日 星期一

由之前 plan 想生 bb 的時候開始，我就已經做定 research，第時有咗會搵邊個醫生幫我接生，同埋做產前檢查，最後決定搵成日接受訪問的靳嘉仁醫生~

所以當我拎咗懷孕証明信後，就即時打電話去 book 靳醫生，點知都要等 2 個星期先有得睇~

好不容易，終於都等到第一次見靳醫生的日子，我同老公係 book 咗的時間到達靳醫生係尖沙咀的診所，大約等咗半個鐘就到我哋入去了~

靳醫生比我第一個感覺係幾 nice 的，不過講嘢唔太多，可能係第一次睇的關係掛，但如果問佢嘢，佢又會好詳細咁解釋比我哋知~

靳醫生先問下我 last m 的日子，又問下我之前 d cycle 準唔準咁，我又話比佢知我不嬲 d m 都準的，同埋我有 check 過自己的排卵日應該係 22/2，靳醫生仲講笑咁嘅口吻話邊日排卵我都知?! ha ha..... 當然啦, 因為我有用排卵棒 check 住嘛~

之後靳醫生就叫我瞓上張床度，幫我照下 ultrasound 先，結果只係見到胎囊，仲未見到胎芯同埋胎兒，胎囊的 size 就有 1.38x0.85cm，位置正確，唔會係宮外孕，靳醫生話而家大約得 4 周，最多都係得 5 周大，所以未見到胎兒同埋心跳都算正常，同埋我又無流啡/紅，所以佢唔幫我照陰超了，叫我哋  2 星期後返來再照，到時應該會見到了~

不過照 ultrasound 時，靳醫生話我個子宮纖維瘤有機會令我唔可以順產，要開刀生，因為個瘤的位置比較低，好接近產道，如果個瘤再增大，有機會阻住 bb 係產道出來，同埋就算開刀，都要避開個瘤的位置，所以唔可以係咁低的位置開刀，佢建議開刀就唔好搵政府醫院了~

之後靳醫生問我想係邊度生 bb，我話想搵佢幫我接生，佢問我想去邊間醫院生，我話想去九龍法國 or 仁安，佢即時話建議我 book 咗九龍法國先，無位先去 book 仁安，因為九龍法國可以最遲 16 周先要比訂金，但仁安就要係 book 咗之後的 2 星期內比訂金，佢覺得好似九龍法國的安排好 d，所以我都照跟佢的做法啦~ (雖然我想係仁安多 d)

 之後就同靳醫生 say goodbye，出返去等拎藥，靳醫生比咗葉酸同埋惠氏多種維他命比我食，仲有 5 張 ultrasound 的相比返我哋添~

第二次私家產檢 (7wks1d)

二零一二年四月二日 星期一

由上次產檢到今日為止呢 2 個星期，簡直係渡日如年呀，我日日都好擔心同好驚，因為我驚見到唔傳說中的閃閃~

今日係預定的時間到達靳醫生的診所，今次好多人等緊呀，我等咗差唔多 45 分鐘先到我咋，係門外等待果 45 分鐘，我真係等到發癲呀，個人又擔心又緊張，個心仲跳得好快添，希望一陣都聽阿 b 強而有力又快的心跳啦~

好彩係等待的呢 45 分鐘，有老公陪住，又有一位係 baby kingdom 識的朋友仔一路同我 whatsapp 傾計，我的心先定返 d 咋~

終於到咗要面對的一刻喇，入到去見到靳醫生，佢先問下我呢 2 星期有冇唔舒服，又問下有無孕吐，我就話比佢知無乜事，只係有 d 身痕，同埋食咗惠氏多種維他命有少少難去便便~

之後就佢就話幫我轉過另一種維他命，同埋比定 d 止痕藥我，然後就叫我瞓上張床度，幫我照 ultrasound，睇下見到阿 b 未~

一照就見到胎囊入面有一 pat 白色嘢，靳醫生話呢 pat 白色嘢就係阿 b 啦，而家阿 b 的 size 有 1.08cm，電腦計出來有 7wks1d，預產期係 11月18日。

我問靳醫生有心跳未，佢話梗係有啦，仲指比我睇添，原來係一點白色閃閃下果個就係心跳了，之後我問靳醫生可唔可以比我聽下心跳聲，當然係無問題啦~

第一次聽到唔係好清，靳醫生再放大 d 比我哋聽，呢次聽到喇，好似火車行緊咁的聲的，好得意呢~

我再問靳醫生，阿 b 的心跳夠快未呀 ? 佢話照佢睇應該 1 分鐘 over 咗 120 下，正常無問題~

靳醫生再話其實心跳快慢其實無乜關係的，就算心跳一直好快，都唔代表阿 b 係健康，所以叫我哋唔駛咁介意快慢，同埋要 mon bb 的心跳，唔係就咁睇一陣就得，起碼要 mon 住半個鐘以上先可以分析到的~

聽完靳醫生所講，即時放下心頭大石，成個人都 relax 晒~

我再問下靳醫生有無得做 oscar 同埋照結構，因為 QE 果邊唔知安唔安排到，之前問過話要等第一次見姑娘時，評估下先知有無得做，靳醫生教我到時同姑娘講，我生時候夠 35 歲 (我 9 月生日前夠 35 歲)，係高齡產婦了，睇下姑娘肯唔肯安排，靳醫生真係蠱惑呢~ (雖然佢唔教我，我都諗住咁做，ha ha.....)

靳醫生再話，如果 QE 真係安排唔到，佢診所都有另一位醫生可以幫我做的，叫我去完 QE，如果真係安排唔到，就即刻打電話來 book 果位醫生，佢仲比定咗 d 資料比我添~

之後就同靳醫生講再見，出返去等拎藥，同埋 book 埋 4 星期後的產檢 booking~

第一次政府產檢 (9wks1d)

二零一二年四月十六日 星期一

 

QE 果邊約咗今日下午 2 點去，仲話要老公都要出席，所以就一齊放半日假去 QE喇~

 

到達QE 時，首先登記，然後就叫我哋睇一段有關唐氏綜合症的短片，之後安排入房聽有關產檢的簡介會，再等叫名見助產士~

 

我係第一個被叫名入去見助產士的，但由於地方有限，姑娘 check 完老公的身份証之後就叫咗老公出外面等，原來今日叫老公來的用途就係來 check 佢的身份証，仲要原來係可以由我帶 ID copy 來 check 都得的，咁上次登記的時候，就唔好同我講要叫埋老公來嘛，留返老公 d 大假遲 d 先用嘛~

 

另外，就係上次去登記時比的小冊子，裡面話每次去檢查都要帶定 vv 去的，點知我帶咗佢，姑娘話今次唔駛，要的時候會再通知，咁你張小冊子又咁寫，唉~

 

不過姑娘真係好好，問症問得好詳細，亦都小心記錄低 d 資料，仲同我安排晒所有必要的產前檢查添，例如：Oscar、結構、飲糖水等等~

 

姑娘話我好彩，因為我係邊緣 case，我而家只係 34 歲，生的時候先夠 35 歲，所以嚴格來講唔可以當我高齡產婦的，亦由於我 cycle長的關係，所以登記時由 last m 個日子來計我的周數，我比其他人第一次來的時間早咗，所以都仲有位安排到比我做呢 d checking~

 

安排完呢 d checking 的期，姑娘仲要叫護士長過來核實 d 資料，同埋約好的期的時候岩唔岩，真係估唔到又幾好 wor，令我對政府醫院有少少改觀啦~

 

成個過程差唔多一個鐘先完成，離開前，姑娘想我幫手佢做一個研究，但要即場留 vv 比佢，我問佢我帶咗 vv 來，可唔可以用呢個，佢又話唔得，咁我見姑娘咁好人，就幫佢手做呢個研究啦~

 

留完 vv 後，要到 2 樓抽血，之後就可以離開~

 

去到 2 樓，有位抽血員見我拎住個產檢袋就叫我埋去，同我講要抽 5 枝血來做檢查，我聽到 5 枝咁多已經有 d 驚驚地 (因為我最怕打針啦，抽血都好少少)，之後佢同老公都不斷安慰我，叫我唔駛驚，又同我傾下計分散我的注意，好快就抽完，仲要一 d 都唔痛添，抽血員真係好好人呢~

 

經過呢次，我真係對政府醫院改觀咗好多，無網上 d 人講到咁差，相反仲好好添~

 

另外，我係QE 成 2 個鐘，所見的 b6 唔多，相反見到幾多印巴籍人士來做產檢。只係見到有幾個 b6係登記處要求 d 姑娘收佢症，等佢哋可以係度生 bb，當然係比 d 姑娘打發走啦~

疑似 bingo ?!

過完農曆新年之後，我就沉迷咗睇台劇，煲完一套又一套，連平時成日掛住生 bb 的嘢，都忘記得一乾二淨~

 

由於太沉迷台劇的關係，係二月尾的時候，突然好想去高雄同墾丁玩下，連旅遊團都已經揀好，仲諗住係 3 月尾去添，但突然腦中閃過一個念頭，叫我等埋 3 月頭 check 咗中唔中先報名，所以就唔報團住喇~

 

二零一二年三月三日 星期六

 

今日係排卵後的第 10 日，晨早 6 點就醒咗，原先諗住用紅 d 同秀兒排卵條 check 下有冇料到，如果無就安心下星期初可以去報團，點知秀兒竟然出現深粗，連紅 d 都有 50%，果刻心入面諗唔好玩我 wor，我想早 d 個有無得去台灣啫，做乜比 d 我未見過嘢我比我睇呀? (因為我排卵後 & m 前係唔會有呢個情形的) 唔通呢次有機會? 果刻好想即時 check 秀兒驗孕棒同埋綠 d，但心諗今日先係排卵後第 10 日，應該無咁快可以 check 到嫁 wor，所以就唔理佢住~

 

下午仲同老公去咗長洲，行咗天后廟同埋張保仔洞，仲買咗 d 長洲好出名的蝦丸添~

 

去完長洲返到屋企，心郁郁想 check 下秀兒驗孕棒同埋綠 d，再加上 check 多次紅 d 同秀兒排卵條，過咗幾分鐘後，紅 d 同秀兒排卵條比今朝更深色；秀兒驗孕棒就有淺線；而綠 d 就有淺控，我即時叫老公來，睇下係我眼花定真係有~

 

老公就話見到秀兒驗孕棒有淺線，綠 d 就見唔到，攪到我個心好亂，決定聽朝用 clearblue digitial check 下先~

 

呢晚由於太緊張了，我成晚都瞓下醒下咁，終於係早上五點瞓著了~

 

Bingo 了!~

二零一二年三月四日 星期日

 

早上九點醒咗，即刻拎枝 clearblue digitial 出來，等待果 3 分鐘，實在太漫長了~

 

終於都過咗 3 分鐘了，clearblue digital 有 result 了，如下圖：

 

我即時叫咗老公來睇，真係難以致信，高雄墾丁之旅要取消了~

 

二零一二年三月七日 星期三

 

今日放工後，老公陪我去了睇開的家庭醫生，再驗多次，同埋拎信去排期~

 

今日亦都係我父母的生日，拎完信後就同我父母一齊食飯慶祝，老公仲將呢個好消息話比我父母知，我媽知道後即時開心到掩埋塊面係咁笑添~

 

食飽飯回到家後，老公就打電話比奶奶，話比佢知呢個消息~

 

唔知係唔係今日行得多，點家後竟然有少少流啡，好驚~

 

老公為安全起見，要我明天在家休息，唔比我返工~

 

二零一二年三月八日 星期四

 

老公返工時我已經醒咗，但又無乜嘢做，所以就上下網，等到九點幾就打電話 book 定靳嘉仁醫生做產檢，如無意外都會搵靳醫生幫我接生~

 

因為仲有少少流啡，原先諗住搵靳醫生照下先，但由於靳醫生太 full，第一次的檢查，最快都要 19/3，唯有 book 咗先~

 

之後又打電話比之前睇開的 Dr. LO，睇佢可有無期可以幫我照下，點知姑娘話而家太早期，就算照都睇唔到 d 乜嘢，Dr. LO 話開 d 安胎藥比我食，叫我即刻過去拎藥，咁我就過咗去 Dr. LO 中環的診所拎藥，拎完藥後就回家，之後就瞓教，一瞓就瞓咗 5 個鐘，都仲係勁眼瞓，crazy!~

 

二零一二年三月十日 星期六

 

早上十時多就出門，去 QE 登記，我哋大約十一點半到達，結果要 12 點三先走得，條隊鬼咁長，只係開一個 counter 做登記，真係等到忟呀!~

 

而家約咗 16/4 第一次產檢(果時應該第 10 周了)，仲要只係見姑娘，再由姑娘評估要唔要做早期唐氏測試同埋照結構，登記果位小姐話未必可以安排到的~

 

第 10 周先做第一次產檢，而早期唐氏測試就要係第 11 至 13 周做，我唔覺得佢哋可以比到期我做 lor~

 

至於照結構，我估應該安排到的，但聽姑仔講，佢係聯合照結構時，個醫生好 hea 下，講嘢又唔 firm 咁，所以 QE 就算會幫我做，我都會再搵私家做多次，心目中想搵照結構權威 – 林勇行醫生，但唔知 book 唔 book 到期~

之後的個多星期，因為仲未有得照 ultrasound 住，所以差不多每日都會用唔同牌字的驗孕棒來驗下孕，咁先可以比到信心我知道小 b 係成長緊的~