睇牙醫 Part 1

上星期四，食食下嘢時，突然覺得右邊面的牙肉比嘢吉住咁，但心諗我又唔係食 d 有骨的嘢，無理由有 d 骨碎嫁 ?? 唔通係之前已經藏咗係度 ??

但我都唔理，照用牙籤 "liu" 下先，但又 "liu" 唔到 wor，咁唯洗乾淨隻手，試下用手睇下拎唔拎到 d 骨碎出來啦，點知一摸，就發現右上角最入果隻牙蛀了一角，而且有一個好尖的位突了出來，我估計就係呢個位吉住我 d 肉~

但呢隻牙，我完全無痛過，又會蛀咗咁大 part 我都 feel 唔到痛嘅?? 真係奇怪 !~

由於我好怕睇牙醫，但同時間隻牙又吉住 d 肉，攪到食嘢時勁痛，老公又不斷鼓勵我去睇牙醫，又話會陪埋我一齊入去見牙醫，所以星期六一早 9:30 就去了牙醫診所登記，點知而家 d 牙醫好好生意，姑娘話今日 full booking，最快都要聽朝 11:30 先有位，都唔理咁多了，照 book 咗先，不過我就驚多一日了，唉~

星期六晚，老公仲係度嚇我，叫我有想食的嘢就食埋先，唔係脫完牙，有排都食唔到住!!

攪到我果晚瞓得唔好，成晚係度驚，一來驚隻牙補唔返要脫咗佢，二來又驚脫的時候會好痛，又驚脫咗之後會面腫等等~

結果我星期日果朝 9:00 就醒咗，之後去咗食早餐，然後就去牙醫診所，好有準備行刑 feel lor!~

入到去見牙醫(甘醫生)，原來係一位好後生的靚仔醫生來的，我先講比甘醫生知我而家的情況，之後甘醫生就幫我睇下隻牙而家點先，睇完之後，甘醫生話呢隻牙係一隻智慧齒來的，都蛀得幾犀利，應該都補唔返，一定要脫咗佢，叫我照咗 x-ray 先，如果脫的話，費用就 $1200~

等射張 x-ray 出來的時候，甘醫生話幫我檢查埋其他牙齒有無問題，點知檢查完之後就發現仲有 2 隻牙蛀了，甘醫生仲用鏡照比我睇添~

之後甘醫生就問我呢 2 隻牙有無痛 ? 我話無，咁佢就話應該未係蛀得好深，可以唔洗理佢住都得，當然最好就補返佢好 d 啦~

跟住就睇 x-ray 片，睇完之後，甘醫生更加肯定話比我知，一定要脫咗隻智慧齒，如果唔係遲 d 會開始痛~

聽到後好驚，連續問咗甘醫生幾個問題，例如：聽人講脫智慧齒好痛 & 會腫 wor，咁我呢次會唔會好痛? 脫完後會唔會腫? 要唔要開刀?? 駛唔駛逢針?? 逢針係用舊式要拆線果隻定溶線?? 要打幾多枝麻醉針等等??

不過甘醫生好好人，先安撫咗我，話脫牙無我想像中咁恐怖，再慢慢解釋比我知我的疑慮~

首先脫牙係會打麻醉針的，所以脫牙的過程中唔會有任何感覺，只係知道有工具係口內郁。而麻醉針的數量不是用枝數來計，一般來講係會打响 2 個位置。脫智慧齒唔一定會好痛 & 腫，要睇隻牙生成點，暫時睇我隻生得好好，完全夠位生，所以應該唔駛開牙，好易就脫到。

另外脫完牙當然會有 d 唔舒服，如果傷口唔深 & 無發炎的話，一般來講應該唔會好痛，當然亦都要睇返每個人的忍痛能力。

仲有就係，通常見下排的智慧齒先會腫，脫上排的智慧齒一般都唔會，因為大部份人係下排的智慧齒，都係唔夠位生的，要脫下排的智慧齒多數都要開刀唔可以拎到隻牙出來~

同埋如果唔駛開刀的話，一般都唔駛逢針的。如果真係要逢針，就只會用舊式要拆線果種~

釋除咗我心中的疑慮之後，甘醫生問我準備好可以開始未，我話 ok，咁佢就幫我打麻醉針，然後就同我傾了一陣計，老公又係度安撫我，叫我唔駛驚~

過咗一陣，甘醫生叫我瞓返低，check 下 d 麻醉藥生效未，因為我怕一陣會痛，所以同甘醫生講我仲有少少感覺(實情真係有少少少少的)，所以甘醫生就幫我加多少少麻醉藥，又再同我傾多陣計~

過咗一陣，甘醫生再幫我 check 多次，呢次真係一 d 感覺都無了，之後甘醫生就開始幫我脫牙，而我唔夠膽睇，又唔夠膽聽，所以我聽住 mp3 又合埋雙眼，一切交比甘醫生處理。

係一歌都未聽完的時候，突然姑娘拍一拍我，叫我可以起身，話已經脫咗隻牙出來喇，我即時"下" 了一聲出來，同甘醫生講咁快 ?? 我只係 feel 到有嘢係我個口入面郁了幾下咋 wor ??

甘醫生笑一笑，話係真的脫了，仲埋隻牙我睇，問我要唔要返來做紀念?? 我話唔要，佢就叫我睇下，隻牙都蛀得幾犀利，仲有部份變了黑色添，而且仲見到有一part 好尖的部份，相信就係呢一 part 吉住我呢~

同甘醫生傾多一陣就出返去，等姑娘執藥，呢次甘醫生比了 2 粒特強止痛藥 (有 24 小時功效的) 比我，仲有 1x 粒普通的止痛藥比我，姑娘仲細細聲同我講，估計我應該一粒止痛藥都唔駛食~

之後我 book 埋來緊呢個星期六補牙，就離開咗診所，諗住返屋企先，痛起上來都可以瞓下嘛，點知我返到屋企好精神，過咗幾個鐘都未瞓得著，連麻醉藥都過埋，都無痛過，係食嘢時，比食物掂到先有少少唔舒服 (小痛)~

直止今日，係脫牙後的第三日，我已經可以食到硬嘢了(其實第二日已經可以食返飯喇)，呢三日真係無痛過咁，甘醫生手勢真係好，你令我對牙醫改觀了，我而家唔再驚睇牙醫了!~ 希望星期六補牙時，都可以順順利利啦!~