第三次私家產檢 (11wks5d)

二零一二年五月四日 星期五

 

去完果個所謂 BB 展，我哋就去返 TST，去靳醫生度做第 3 次產檢，今日係靳醫生放完大假返來的第一個工作天，所以診所勁多人 lor，我哋 6:30pm 去到，都要等到差唔多 7:30pm 先有得睇~

 

見到靳醫生，又係問下我呢排身體點，我同佢講上星期感冒，醫生幫我 check過血壓有 d 高，叫我問返產科醫生呢度，咁靳醫生就叫姑娘幫我 check 下血壓，真係高咗好多呀，有成 178/117，我都未試過咁高嫁 (上星期都係 158/102 咋)，靳醫生產婦 20 周前的高血壓唔係個 b 影響，係產婦本身的問題 (但我未有 bb 前，都無血壓高的，真奇怪~)，所以佢 refer 我去睇內科醫生~

 

之後就同我照 ultrasound，睇下阿 b 的情況，阿 b 一切 ok，大小亦屬正常範圍，我哋仲問埋靳醫生有關阿 b 的性別，因為奶奶好心急想知~

 

靳醫生話阿 b 仲係好細過，而家睇唔太準，如果要佢講，佢會覺得有 6 成係囡，聽到時我同老公都有少少唔開心，因為第一我哋唔想老爺奶奶失望；第二我哋只想生一個 b，如果係囝的話，應該唔會有再追的壓力，但如果係囡，肯定會有壓力 lor~

可能靳醫生見我哋有少少失望，所以佢再補多句話而家未準的，下次返來見佢時再睇多次，應該就準喇~

之後，我哋就出返去，等拎埋藥，就去食飯，其間我同阿爸傾電話，講咗比佢知阿 b 係囡來的，佢老阿媽不知幾開心，話囡好呀，第時乖 d，又會照顧父母多 d~

回家後，奶奶打電話來問今日睇成點，又問知道阿 b 性別未，我講咗比佢知，聽得出佢有少少失望，不過佢好快補飛話囝囡都無所謂啦，最緊張健健康康咁出世~